School Holiday: విద్యార్థులు ఎగిరి గంతేసే వార్త.. ఇక వారానికి రెండు రోజులు సెలవులు?

School 2-days Holiday: తెలంగాణలో పాఠశాలల పనిదినాల విధానంలో మార్పు వచ్చే అవకాశంపై విద్యార్థులు, తల్లిదండ్రుల్లో ఆసక్తి నెలకొంది. ప్రస్తుతం వారానికి ఆరు రోజులు పాఠశాలలకు వెళ్తున్న విద్యార్థులకు మరో రోజు సెలవు కల్పించాలనే ప్రతిపాదన తెరపైకి వచ్చింది. రాష్ట్రంలోని అన్ని పాఠశాలల్లో శనివారం కూడా సెలవు ప్రకటించి, సోమవారం నుంచి శుక్రవారం వరకు మాత్రమే తరగతులు నిర్వహించాలని ఉపాధ్యాయ నియోజకవర్గ ఎమ్మెల్సీ మల్క కొమరయ్య ముఖ్యమంత్రి రేవంత్ రెడ్డిని కోరారు.

రానున్న రోజుల్లో ఎల్‌నినో ప్రభావం, ఉష్ణోగ్రతల పెరుగుదల, నీటి లభ్యతపై ఆందోళనల నేపథ్యంలో ఈ ప్రతిపాదనను పరిశీలించాలని ఆయన తన లేఖలో పేర్కొన్నారు. ముఖ్యంగా వేసవిలో తీవ్రమైన ఎండల కారణంగా చిన్నారులు ఎదుర్కొనే ఇబ్బందులను తగ్గించడానికి వారాంతంలో రెండు రోజుల విశ్రాంతి ఉపయోగపడుతుందని అభిప్రాయపడ్డారు.

అయితే శనివారం సెలవు ప్రకటిస్తే విద్యార్థుల చదువులు, సిలబస్ పూర్తిపై ప్రభావం పడుతుందనే ప్రశ్నలు సహజంగానే ఎదురవుతున్నాయి. దీనికి పరిష్కారంగా ఎమ్మెల్సీ ఒక ప్రత్యామ్నాయాన్ని సూచించారు. సోమవారం నుంచి శుక్రవారం వరకు ప్రతిరోజూ పాఠశాల సమయాన్ని అదనంగా 35 నుంచి 40 నిమిషాలు పొడిగించాలని కోరారు. ఇలా చేయడం ద్వారా శనివారం కోల్పోయే బోధనా సమయాన్ని ఇతర రోజుల్లో సర్దుబాటు చేయవచ్చని ప్రతిపాదించారు.

ఈ విధానం అమల్లోకి వస్తే విద్యార్థులకే కాకుండా పర్యావరణానికి కూడా ప్రయోజనాలు ఉంటాయని ఆయన పేర్కొన్నారు. శనివారాల్లో పాఠశాలలు మూసివేస్తే నీటి వినియోగం, విద్యుత్ ఖర్చులు తగ్గే అవకాశం ఉంది. అలాగే స్కూల్ బస్సులు, ఇతర వాహనాల రాకపోకలు తగ్గడం వల్ల హైదరాబాద్ వంటి నగరాల్లో ట్రాఫిక్ రద్దీ, వాహన కాలుష్యం కొంతవరకు తగ్గవచ్చు. వారానికి రెండు రోజుల విశ్రాంతి లభించడం వల్ల పిల్లలకు కుటుంబ సభ్యులతో సమయం గడపడానికి, ఆటలు ఆడుకోవడానికి, ఇతర అభిరుచులపై దృష్టి పెట్టడానికి అవకాశం ఉంటుంది. విద్యార్థుల మానసిక ఉల్లాసం, శారీరక ఆరోగ్యానికి కూడా ఇది తోడ్పడవచ్చు.

అయితే తల్లిదండ్రులు, పాఠశాల యాజమాన్యాలు గమనించాల్సిన ముఖ్యమైన విషయం ఏమిటంటే.. తెలంగాణలో ప్రతి శనివారం పాఠశాలలకు సెలవు ప్రకటిస్తూ ప్రభుత్వం ఇప్పటివరకు అధికారిక ఉత్తర్వులు జారీ చేయలేదు. ఇది ఎమ్మెల్సీ మల్క కొమరయ్య చేసిన ప్రతిపాదన మాత్రమే. ప్రభుత్వం ఆమోదించిన తర్వాతే కొత్త విధానం అమల్లోకి వస్తుంది. ప్రభుత్వ నిర్ణయం, విద్యాశాఖ ప్రకటన వెలువడే వరకు ప్రస్తుతం అమల్లో ఉన్న పాఠశాలల పనివేళలు, విద్యా క్యాలెండర్‌నే అనుసరించాలి.