కిక్ కొడితే తల పగలాల్సిందే.. పాములను వేటాడే రాక్షస పక్షి.. సెక్రటరీ బర్డ్ వింత ప్రవర్తన వెనుక సీక్రెట్ ఇదే..!!

Secretary Bird: ప్రకృతి సృష్టించిన అద్భుతాల్లో సెక్రటరీ బర్డ్ ఒక నిజమైన వండర్ అనే చెప్పాలి.  ఆఫ్రికాలోని దట్టమైన సవన్నా గడ్డి మైదానాల్లో సంచరించే ఈ పక్షిని చూడగానే పొడవాటి కాళ్లు, నెత్తి మీద విచిత్రమైన ఈకల కిరీటంతో భలే అందంగా ఉందే అనిపిస్తుంది. కానీ.. దీని అందం వెనుక ఒక భయంకరమైన వేటగాడు దాగి ఉన్నాడు. పాము ఎంతటి విషపూరితమైనదైనా సరే..  ఈ పక్షి కంటపడితే ఇక అంతే సంగతులు. అత్యంత ప్రాణాంతకమైన పాములను కూడా సెక్రటరీ బర్డ్ చిటికెలో మట్టికరిపించేస్తుంది. తన పదునైన చూపులు, వేగవంతమైన కదలికలతో పాములకు ఊపిరాడకుండా చేసి, అవలీలగా వేటాడి లంచ్ కింద ముగించేస్తుంది.

సెక్రటరీ పక్షి పాములను వేటాడే పద్ధతి వ్యూహాత్మక పోరాటాన్ని పోలి ఉంటుంది. ఇది గాలిలో కాకుండా, నేల మీద వేటాడుతుంది. పామును చూడగానే, అది తన పొడవాటి కాళ్లను ఉపయోగించి మెరుపు వేగంతో దాడి చేస్తుంది. అదే సమయంలో, పాము దృష్టి మరల్చడానికి తన పెద్ద రెక్కలను విప్పి గిరగిరా తిరుగుతుంది. పాము ఏ దిశలో దాడి చేయాలో నిర్ణయించుకునేలోపే, అది దాని తల లేదా మెడపై బలంగా తన్నుతుంది. కరెంట్ బయాలజీ పత్రికలో ప్రచురించిన ఒక అధ్యయనం ప్రకారం..  ఈ పక్షి తన్నే తన్నుకు సుమారు 195 న్యూటన్ల బలం ఉంటుంది. ఇది దాని శరీర బరువుకు దాదాపు ఐదు రెట్లు. ఈ దెబ్బకు నాగుపాములు.. రక్త సర్పాల వంటి పాములు కూడా చనిపోతాయి.. వాటి తలలు పగిలిపోతాయి.

దాని కాళ్లపై ఉండే మందపాటి, గట్టి పొలుసులు దానిని పాము కాటు నుండి కాపాడతాయి. అది చనిపోయిన పాములను పూర్తిగా మింగేస్తుంది. పాములతో పాటు, ఇది బల్లులు, కీటకాలు, ఎలుకలను కూడా తింటుంది.

దానికి ఈ పేరు ఎందుకు వచ్చింది?
ఈ పక్షి తలపై ఉండే నల్లటి ఈకలు.. 18వ శతాబ్దంలో యూరోపియన్ సెక్రటరీలు తమ చెవుల వెనుక పెన్నులు పెట్టుకునే పద్ధతిని పోలి ఉంటాయి. అందుకే దీనిని  సెక్రటరీ పక్షి అని పిలుస్తారు. ఎగరగల సామర్థ్యం ఉన్నప్పటికీ, ఈ పక్షులు ఆహారం కోసం రోజుకు 20 నుండి 30 కిలోమీటర్లు నడుస్తాయి. ఇది విషపూరిత పాములు.. ఎలుకల సంఖ్యను నియంత్రించడంలో ప్రకృతికి సహాయపడుతుంది. ఆఫ్రికన్ పర్యావరణ వ్యవస్థలో సమతుల్యతను కాపాడటంలో సెక్రటరీ పక్షి కీలక పాత్ర పోషిస్తుంది.