SOCIAL MEDIA

Newsletter

PARTNER SITES
Select Language Select State

ఇది 'డేటా లీక్' కాదు.. చెన్నైకి తగిలిన 'డేటా షాక్'! ఆంధ్రా దూకుడు చూసి పొరుగు రాష్ట్రంలో గగ్గోలు!

తమిళనాడుకు రావలసిన పరిశ్రమలు ఆంధ్రప్రదేశ్కు తరలిపోవడంతో, కొంతమంది ఉద్యోగులు పరిశ్రమలు, పెట్టుబడులకు సంబంధించిన రహస్యాలను లీక్ చేశారనే వివాదం రెండు రాష్ట్రాల మధ్య తీవ్ర దుమారం రేపుతోంది. ఇది డేటా లీక్ కాదు, చెన్నైకే డేటా షాక్ తగిలిందని నిపుణులు చెబుతున్నారు. ఆంధ్ర ప్రదేశ్ దూకుడు చూసి పొరుగు రాష్ట్రాలు గాబరా పడుతున్నాయని కూడా వారు అంటున్నారు. ఆ పూర్తి వివరాలు ఇలా ఉన్నాయి.

Written By Renuka Godugu
Published: Nov 21, 2026, 07:41 IST | Updated: Nov 21, 2026, 07:44 IST
Image Credit: AP vs Tamil Nadu Investments:
Join

AP vs Tamil Nadu Investments: 2017లో దక్షిణ కొరియాకు చెందిన ప్రముఖ ఆటోమొబైల్ సంస్థ కియా మోటార్స్ తమిళనాడుకు బదులుగా ఆంధ్రప్రదేశ్‌లోని అనంతపురానికి వెళ్ళింది. దీనికి ప్రధాన కారణాలు అంతర్గత విధానం, ఆంధ్రప్రదేశ్ ప్రభుత్వం ఇచ్చిన రాయితీలు, భౌగోళిక అనుకూలతలు. అయితే ఇటీవల మరికొన్ని పరిశ్రమలు కూడా ఏపీకి తరలిపోతున్నాయని తమిళనాడు ప్రభుత్వం ఆందోళన వ్యక్తం చేస్తోంది. దీనికి ప్రధాన కారణం 'డేటా లీక్‌' అని ఆరోపిస్తోంది. ప్రస్తుతం ఏపీ ప్రభుత్వం పెట్టుబడుల విషయంలో దూసుకుపోతోంది. అభివృద్ధి చెందుతున్న అమరావతికి పెట్టుబడుల పెరుగుతున్న నేపథ్యంలో, తమిళనాడులో పెట్టాల్సిన కొన్ని కంపెనీలు ఆంధ్రప్రదేశ్‌కు తరలిపోయాయి. దీంతో అక్కడి కొంతమంది ఉద్యోగులు రహస్య సమాచారాన్ని ఏపీకి చేరవేయడం వల్లే ప్రాజెక్టులు తరలిపోయాయని ఆరోపణలు వస్తున్నాయి. ఈ నేపథ్యంలో తమిళనాడు ప్రభుత్వం 15 మంది సీనియర్ అధికారులను తొలగించింది. అయితే ఇది పెద్ద వివాదానికే దారితీసింది. ముఖ్యమంత్రి జోసెఫ్ నేతృత్వంలోని టీవీకే ప్రభుత్వం అనుసరిస్తున్న పెట్టుబడి విధానానికి సంబంధించిన సమాచారం ఏపీకి లీక్ అయినట్లు అనుమానాలు వ్యక్తమయ్యాయి. అయితే, నెల రోజుల నోటీసు పీరియడ్ పూర్తయిన తర్వాతే వారిని తొలగించారు. డేటా లీక్ నిజంగా జరిగితే వెంటనే తొలగించాల్సింది, నోటీసు పీరియడ్ ఇచ్చేవరకు ఎందుకు ఆగారనే ప్రశ్నలు ఇప్పుడు తలెత్తుతున్నాయి.

పెట్టుబడుల పోటీలో వెనుకబడిన రాష్ట్రం చేసే మొదటి ఆరోపణ, ముందున్నవాడు దొంగతనం చేశాడనేదే. ఇప్పుడు తమిళనాడు చేస్తున్న ఆరోపణలు కూడా సరిగ్గా ఇలాగే ఉన్నాయి. గణాంకాల ప్రకారం దేశంలో కొత్త ప్రాజెక్టులను ఆకర్షించడంలో ఆంధ్రప్రదేశ్ వాటా భారీగా పెరిగింది. 2024లో 3.1 శాతంగా ఉన్న వాటా 2026 నాటికి 15.36 శాతానికి చేరింది. అంటే తొమ్మిదో స్థానంలో ఉన్న ఏపీ నేరుగా 2వ స్థానానికి ఎగబాకింది. దీంతోనే ఈ ఆరోపణలు వెల్లువెత్తుతున్నాయి. కర్ణాటక వాటా 8.25 శాతం నుంచి 5.67 శాతానికి తగ్గి, నాలుగో స్థానం నుంచి ఆరో స్థానానికి పడిపోయింది.

ఇటీవల విశాఖలో జరిగిన సీఐఐ సదస్సులో ఏపీ ప్రభుత్వం 303 ఒప్పందాలు చేసుకుంది. రూ. 9.89 లక్షల కోట్ల పెట్టుబడి ప్రతిపాదనలు, 3.48 లక్షల ఉద్యోగ అవకాశాలు వచ్చాయి. గణాంకాల ప్రకారం 74 శాతం కన్వర్షన్ రేటు కూడా నమోదైంది. ఈ వేగాన్ని చూసి పొరుగు రాష్ట్రాలు ఆందోళన చెందడం సహజమే. ఇందులో మూడు దక్షిణ కొరియా కంపెనీలు రూ.1,614 కోట్ల పెట్టుబడులతో ఆంధ్రప్రదేశ్‌కు వచ్చాయి. తమిళనాడు ప్రతిపక్షం ఈ కంపెనీలపైనే సూటిగా ప్రశ్నలు సంధిస్తోంది. ఈ ప్రశ్నల వేడిలోనే, తమిళనాడు నుంచి 15 మందిని తొలగించారని, వారు రహస్య సమాచారాన్ని లీక్ చేశారని మీడియా కథనాలు వెలువడ్డాయి.

అయితే 2026 గైడెన్స్‌ తమిళనాడు సంస్థలో సామూహిక రాజీనామాలు జరగలేదని, మీడియా కథనాలకు విరుద్ధంగా ఇది కేవలం ఉద్యోగుల వలస మాత్రమేనని సంస్థ అధికారికంగా వివరణ ఇచ్చింది. మెరుగైన కెరీర్, ఉన్నత విద్య, వ్యక్తిగత కారణాలతో ఉద్యోగులు ఇతర సంస్థలకు వెళ్లడం సహజమే. అయితే అదే సంస్థపై ఇప్పుడు గూఢచర్యం ఆరోపణలు వచ్చాయి. దీనిపై ఇప్పటికీ అధికారిక ధృవీకరణ లేదు.

గూఢచారులైతే నోటిస్‌ పీరియడ్‌ ఎలా?
ముఖ్యమంత్రి కార్యాలయమైన టీవీకే కూడా ఎలాంటి ప్రకటన చేయలేదు. అసలు ఏమి జరిగిందో స్పష్టత లేదు. నిజంగా గూఢచారులైతే, నెల రోజులు ఎందుకు పని చేయనిచ్చారనే ప్రశ్న కూడా ఉంది. ప్రభుత్వ హయాంలో అంతర్గత వేధింపులు, పక్షపాతం పెరిగాయని, అందుకే నోటీసు పీరియడ్ పూర్తి చేసుకుని వెళ్లామని మాజీ ఉద్యోగులు ముఖ్యమంత్రి కార్యాలయానికి లేఖ రాసినట్లు సమాచారం. నెల రోజులు అక్కడే ఎందుకు పని చేయించారనే ప్రశ్నలూ వస్తున్నాయి.

ఉద్యోగులు కెరీర్ అభివృద్ధి కోసం ఉద్యోగాలు మారితే గూఢచారులుగా మారిపోతారా? ఏపీ ఈడీబీలో చేరిన ముగ్గురికి నాన్-కాంపిటీట్ నిబంధన లేదని చెబుతున్నారు. ఒక రాష్ట్ర సంస్థ నుంచి మరో రాష్ట్ర సంస్థకు మారడం నేరం కాదు. ప్రధానంగా ఆ అధికారులను 2016 నుంచి 2021 వరకు అప్పటి డీఎంకే ప్రభుత్వమే నియమించిందని, ఆ తర్వాత వారు డీఎంకే ప్రభుత్వంలోనూ కొనసాగారని అక్కడి ప్రతిపక్ష నేత టి.ఆర్.బి. రాజా గుర్తు చేశారు.

చిట్టీలను చూసి నిర్ణయించం..
టీడీపీ రాష్ట్ర అధ్యక్షుడు పల్లా శ్రీనివాసరావు ఈ ఆరోపణలను ఖండించారు. "మా పెట్టుబడి అనుకూల విధానాలతో పారిశ్రామికవేత్తలను ఆకర్షిస్తున్నాం. ఎవరి ఫైళ్లను చూడాల్సిన అవసరం మాకు లేదు. వేల కోట్లు పెట్టే సంస్థలు ఎవరో ఇచ్చే చిట్టాలను చూసి మేము నిర్ణయాలు తీసుకోలేదు. విద్యుత్, భూమి, నీరు, అనుమతులు, విధాన స్థిరత్వం, నాయకత్వ సామర్థ్యం వంటివి చూసే పెట్టుబడులు వస్తాయి. చంద్రబాబు అనుభవం, లోకేష్ నాయకత్వంతోనే ఈ వేగం సాధ్యమైంది. వ్యాపార సౌలభ్యంలో ముందు నిలవాలంటే ఆరోపణలు కాదు, పనితీరు కావాలి. ఒక్క పైసా కూడా కరెంటు చార్జీలు పెంచకుండా నాణ్యమైన విద్యుత్ ఇవ్వగలగాలి" అని ఆయన సమాధానమిచ్చారు. ఆధారాలు లేకుండా పక్క రాష్ట్రంపై నిందలు వేస్తే పెట్టుబడులు తిరిగి రావు. సంస్థలో జరిగింది సాధారణ ఉద్యోగుల వలస మాత్రమేనని సంస్థే స్పష్టం చేసిన తర్వాత కూడా ఇలాంటి నిందలు వేయడం సరికాదు. గూఢచారుల వేట ఆపి, పెట్టుబడులను ఆకర్షించే మార్గాలపై దృష్టి పెట్టాలని ఆయన అన్నారు

Add Zee News as a Preferred Source
TAGS:

About the Author

రేణుక గొడుగు జీ తెలుగు డిజిటల్ మీడియాలో సబ్ ఎడిటర్‌గా 2024 నుంచి పనిచేస్తున్నారు. హెల్త్‌, లైఫ్‌స్టైల్‌, ఆస్ట్రోలజీ, బ్రేకింగ్, వైరల్‌ వ్యవహరాలకు సంబంధించిన వార్తలు రాస్తున్నారు. గతంలో ప్రముఖ మీడియా సంస్థల్లో వివిధ రంగాలకు సంబంధించిన 6 ఏళ్ల అనుభవం ఉంది.
Read More

ZEENEWS TRENDING STORIES