Arnab Cyclone: తుఫాన్‌ బాధితులు కోలుకునేదాకా ప్రజలకు అండగా ఉంటాం: సీఎం చంద్రబాబు

Arnab Cyclone Review: అర్నబ్ తుఫాన్‌.. అది సృష్టించిన బీభత్సంపై సీఎం చంద్రబాబు అప్రమత్తంగా ఉన్నారు. తుఫాన్‌ బాధితులకు సాధ్యమైనంత సహాయం చేయాలని అధికార యంత్రాంగానికి ఆదేశించారు. క్షేత్రస్థాయిలో సాధారణ పరిస్థితి నెలకొనేంత వరకు విశ్రమించొద్దని అధికార యంత్రాంగానికి సూచనలు చేశారు. కొన్ని ప్రాంతాలు మినహా మిగిలిన తుఫాన్ ప్రభావిత ప్రాంతాల్లో సాధారణ స్థితి నెలకొంది అని తెలిపారు. తుఫాన్ నష్టంపై ఇవాళ ప్రాథమిక నివేదికను అందిస్తామని అధికారులు తెలిపారు. పంట నష్టం మినహా బాధితులందరికీ నష్టపరిహారాన్ని అందించే పనిని వేగవంతం చేయాలని ఆదేశించారు.అర్నబ్ తుఫాన్ సమయంలో అధికార యంత్రాంగం అద్భుతంగా పని చేసింది

తుఫాన్ ప్రభావిత ప్రాంతాల్లోని క్షేత్ర స్థాయి పరిస్థితులు, పునరుద్దరణ పనులపై వివిధ శాఖల అధికారులు, జిల్లా కలెక్టర్లతో ముఖ్యమంత్రి సమీక్ష చేశారు. అనంతరం మాట్లాడుతూ అధికారులకు సీఎం చంద్రబాబు కీలక వ్యాఖ్యలు చేశారు. ఏపీలో ప్రస్తుతం విభిన్నమైన వాతావరణ పరిస్థితులు నెలకొన్నాయి. రాయలసీమ ప్రాంతంలో ఎల్ నినో ప్రభావంతో ఇబ్బందులు. మిగిలిన ప్రాంతాల్లో అర్నబ్ తుఫాన్ వల్ల సమస్యలు ఉత్పన్నమయ్యాయి. ఈ రెండింటి విషయంలో అధికార యంత్రాంగం సమర్థవంతంగా వ్యవహరించి ప్రజలను ఆదుకోవాలి' అని సీఎం చంద్రబాబు ఆదేశించారు. రాయలసీమలో పంటలు వేసుకునే పరిస్థితి లేదని.. ఉత్తరాంధ్ర, కోస్తా, గోదావరి జిల్లాల్లో వేసుకున్న పంటలను, కొబ్బరి చెట్లను నష్టపోయిన దుస్థితి అని ఆవేదన వ్యక్తం చేశారు.

'పక్కా ప్రణాళికతో ఈ ప్రకృతి విపత్తుల బారీ నుంచి ప్రజలను బయటపడేయాలి. అర్నబ్ తుఫాన్‌తో ప్రాణ, ఆస్తి నష్టం వీలైనంత మేర తగ్గించేలా చూశాం. చెరువులు, కాల్వలకు గండ్లు పడకుండా జాగ్రత్తలు తీసుకున్నాం. పడిపోయిన చెట్లను ఇప్పటికే చాలావరకు తొలగించాం. ఇంకా ఎక్కడైనా పడిపోయిన చెట్లు రోడ్లపై ఉంటే వాటిని వెంటనే తొలగించాలి' అని అధికారులకు సీఎం చంద్రబాబు దిశానిర్దేశం చేశారు. తుఫాన్ కారణంగా పోగైన చెత్తను కూడా తీసేయాలని.. రేపటిలోగా అన్ని ప్రాంతాల్లో విద్యుత్ సరఫరాను పునరుద్దరించాలని ఆదేశించారు.

'నష్ట పరిహారానికి సంబంధించిన అంశాలపై జీవో జారీ చేశాం. పంట నష్టం మినహా బాధితులకు నష్టపరిహరం అందించాలి. త్వరగా తుఫాన్ నష్టంపై అంచనాలు సిద్దం చేయాలి. నీట మునిగిన పంటలను ఏ మేరకు కాపాడగలమో చూడాలి. దీనిపై వ్యవసాయ అధికారులు, శాస్త్రవేత్తలు, విద్యార్థులు అధ్యయనం చేయాలి' అని సీఎం చంద్రబాబు సూచించారు. పంట మట్టిపాలు కాకుండా ఎలాంటి చర్యలు తీసుకోవచ్చో ఆలోచించాలని.. కొబ్బరి చెట్లు సహా వివిధ ఉద్యాన పంటలకు చెందిన చెట్లు, మొక్కలను తిరిగి ప్లాంట్ చేయగలిగే పరిస్థితులు ఉన్నాయా అనే అంశాన్నీ పరిశీలించాలని చెప్పారు.

'తుఫాన్ బాధిత వ్యవసాయ, ఉద్యాన రైతులకు వాటిల్లిన నష్టాన్ని భర్తీ చేయడానికి వివిధ పథకాలలను వర్తింప చేయాలి. తుఫాన్ ప్రభావిత ప్రాంతాల్లో సాధారణ స్థితి నెలకొనేంత వరకు ప్రభుత్వ యంత్రాంగం అండగా నిలవాలి. ప్రభుత్వం చేసే పనులను ఎప్పటికప్పుడు ప్రజలకు తెలపాలి.. అప్పుడే ప్రజల నుంచి సహకారం లభిస్తుంది. త్వరితగతిన పంట నష్టం అంచనాలను సిద్దం చేసేందుకు టెక్నాలజీని వినియోగించాలి' అని సీఎం చంద్రబాబు ఆదేశించారు.