IND Vs NZ 4th T20 Playing 11: క్లీన్‌స్వీప్‌పై భారత్ గురి.. తుది జట్టులో భారీ మార్పులు..!

India Predicted Playing XI: న్యూజిలాండ్‌తో జరుగుతున్న ఐదు మ్యాచ్‌ల టీ20 సిరీస్‌ను ఇప్పటికే 3-0 తేడాతో సొంతం చేసుకున్న భారత్.. క్లీన్ స్వీప్ చేసే లక్ష్యంతో ప్రణాళికలు రచిస్తోంది. శుక్రవారం ఆక్లాండ్‌లోని ఈడెన్ పార్క్ వేదికగా నాలుగో టీ20 పోరు జరగనుంది. ఈ మ్యాచ్‌కు టీమిండియా తుది జట్టులో మార్పులు చేసే అవకాశం కనిపిస్తోంది. సిరీస్ గెలవడంతో రిజర్వ్ బెంచ్‌ను పరీక్షించే దిశగా కెప్టెన్, మేనేజ్‌మెంట్ ప్లాన్ చేస్తోంది. గాయం నుంచి కోలుకుంటున్న వికెట్ కీపర్ బ్యాటర్ ఇషాన్ కిషన్ రీఎంట్రీ ఇచ్చే అవకాశాలు కనిపిస్తున్నాయి.

వరుసగా మూడు మ్యాచ్‌ల్లో కివీస్‌పై పూర్తి ఆధిపత్యం ప్రదర్శించిన భారత జట్టు, నాలుగో పోరులోనూ జోరు కొనసాగించాలనే పట్టుదలతో ఉంది. అయితే సిరీస్ తేలిపోవడంతో రాబోయే మెగా టోర్నీలను దృష్టిలో ఉంచుకుని ఇప్పటివరకు అవకాశం దక్కని ఆటగాళ్లను బరిలోకి దించాలని టీమ్ మేనేజ్‌మెంట్ భావిస్తోంది. ముఖ్యంగా తొలి టీ20లో గాయపడి గత రెండు మ్యాచ్‌లకు దూరమైన ఇషాన్ కిషన్ పూర్తి ఫిట్‌నెస్ సాధిస్తే అతడిని నేరుగా తుది జట్టులోకి తీసుకోవడం దాదాపు ఖాయం.

ఇషాన్ కిషన్ తుది జట్టులోకి వస్తే టాప్ ఆర్డర్‌లో మార్పులు చేయాల్సి ఉంటుంది. గత మ్యాచ్‌లో ఓపెనర్‌గా వచ్చిన యువ సంచలనం వైభవ్ సూర్యవంశీకి తుది జట్టులో చోటు దక్కడం కష్టంగా మారుతుంది. ఎలాగూ సిరీస్ గెలిచేశాం కాబట్టి.. సంజు శాంసన్‌కు విశ్రాంతి ఇచ్చి అభిషేక్ శర్మ-వైభవ్ సూర్యవంశీని కొనసాగించే ఛాన్స్ కూడా ఉంది. గత మ్యాచ్‌లో వీరిద్దరి విధ్వంసంతో 199 పరుగుల లక్ష్యం కూడా చిన్నబోయింది. అభిషేక్ శర్మ సెంచరీతో ఫామ్‌లో ఉండగా.. 45 పరుగులతో వైభవ్ సత్తాచాటాడు. ఒకవేళ ఇషాన్‌ను పూర్తిగా కోలుకునేంత వరకు ఆఖరి మ్యాచ్ వరకూ వేచి చూడాలనుకుంటే.. బ్యాటింగ్ ఆర్డర్‌లో ఎలాంటి మార్పులు చేయాల్సిన అవసరం ఉండదు.

ఇక బౌలింగ్ విభాగంలో మార్పులు ఖాయంగా కనిపిస్తున్నాయి. ఆక్లాండ్ స్టేడియం చిన్న బౌండరీలకు పెట్టింది పేరు. ఇక్కడ స్పిన్నర్ల నియంత్రణ ఎంతో ముఖ్యం. ఆల్‌రౌండర్ అక్షర్ పటేల్‌కు విశ్రాంతినిచ్చి.. బెంచ్‌కే పరిమితమైన చైనామన్ స్పిన్నర్ కుల్‌దీప్ యాదవ్ లేదా మిస్టరీ స్పిన్నర్ వరుణ్ చక్రవర్తిని బరిలోకి దింపాలని మేనేజ్‌మెంట్ భావిస్తోంది. సీనియర్ పేసర్ భువనేశ్వర్ కుమార్ రీఎంట్రీలో ధారళంగా పరుగులు సమర్పించినా.. తుది జట్టులో అవకాశం దక్కనుంది. అర్ష్‌దీప్ సింగ్, నితీశ్ కుమార్ రెడ్డి కంటిన్యూ కానున్నారు. వర్క్‌లోడ్ మేనేజ్‌మెంట్‌లో భాగంగా పేసర్ల రొటేషన్ ఉండే వీలుంది.

భారత్ తుది జట్టు (అంచనా): అభిషేక్ శర్మ, సంజు శాంసన్ (వికెట్ కీపర్), శ్రేయస్ అయ్యర్ (కెప్టెన్), ఇషాన్ కిషన్/వైభవ్ సూర్యవంశీ, తిలక్ వర్మ, నితీశ్ కుమార్ రెడ్డి, నమన్ ధీర్, కుల్‌దీప్ యాదవ్/అక్షర్ పటేల్, అర్ష్‌దీప్ సింగ్, భువనేశ్వర్ కుమార్, ప్రిన్స్ యాదవ్.