నేటి నుంచి తిరుమల శ్రీవారి నవరాత్రి బ్రహ్మోత్సవాలు.. టీటీడీ విస్తృత ఏర్పాట్లు..

TTD Brahmotsavalu: అనంతరం వైఖానస ఆగమోక్తంగా అంకురార్పణ ఘట్టం నిర్వహించారు. చాంద్రమానం ప్రకారం ప్రతి మూడు సంవత్సరాలకోసారి అధికమాసం వస్తుంది. ఇలావచ్చిన సందర్భాల్లో భాద్రపదంలో వార్షిక బ్రహ్మోత్సవాలు, దసరా నవరాత్రుల్లో అంటే ఆశ్వయుజంలో నవరాత్రి బ్రహ్మోత్సవాలు నిర్వహిస్తారు. నవరాత్రి బ్రహ్మోత్సవాల్లో ధ్వజారోహణం, ధ్వజావరోహణం ఉండవు.

ఈ రోజు నుంచి 20వ తేది వరకు బ్రహ్మోత్సవాలు..

ఇక ఇవాళ ఉదయం 9 గంటలకు బంగారు తిరుచ్చి ఉత్సవం, రాత్రి పెద్దశేష వాహన సేవ  ఉంటుంది. అక్టోబరు 13న ఉదయం  చిన్నశేష వాహనం, రాత్రి హంస వాహన సేవ నిర్వహిస్తారు. ఇక అక్టోబరు 14న ఉదయం సింహ వాహన సేవ , రాత్రి ముత్యపుపందిరి వాహనంపై శ్రీవారు విహరిస్తారు. అక్టోబరు 15 ఉదయం  కల్పవృక్ష వాహనం, రాత్రి సర్వభూపాల వాహన సేవ వుంటుంది. ప్రధానంగా అక్టోబరు 16న గరుడ వాహనం, 17న పుష్పక విమానం, అక్టోబరు 19న స్వర్ణ రథం, 20న చక్రస్నానం జరుగనున్నాయి. ఉదయం వాహనసేవ 8 నుండి 10 గంటల వరకు, రాత్రి వాహనసేవ 7 నుండి 9 గంటల వరకు జరుగుతుంది. గరుడ వాహనసేవ రాత్రి 6.30 నుండి 11.30 గంటల వరకు జరుగుతుంది.

ట్రాఫిక్ నియంత్రణకు పెద్ద చర్యలు..

బ్రహ్మోత్సవాలను వీక్షించేందుకు పెద్ద సంఖ్యలో భక్తులు తరలివచ్చే అవకాశం ఉండటంతో టీటీడీ విస్తృత ఏర్పాట్లు చేపడుతోంది. నాలుగు మాడ వీధుల్లో బ్యారికేడ్లు, క్యూలైన్లు, ఫెన్సింగ్ ఏర్పాటు చేయడంతో పాటు భక్తులకు తాగునీరు, అన్నప్రసాదం, వైద్య సదుపాయాలు కల్పిస్తున్నారు. పారిశుద్ధ్య నిర్వహణపై కూడా ప్రత్యేక దృష్టి సారిస్తున్నారు. అక్టోబర్ 16న జరగనున్న గరుడ వాహనసేవ సందర్భంగా భారీ రద్దీని దృష్టిలో ఉంచుకుని భద్రత, ట్రాఫిక్ నియంత్రణకు ప్రత్యేక చర్యలు చేపడుతున్నారు.

టీటీడీ విస్తృత ఏర్పాట్లు.. 
ఇక గత నెలలో జరిగిన సాలకట్ల బ్రహ్మోత్సవాల తరహాలో నేటి నుంచి 20వ తేదీ వరకు నవరాత్రి బ్రహ్మోత్సవాలనూ వైభవంగా నిర్వహించనున్నారు. దసరా సెలవులతోపాటు తమిళ పెరటాశి మాసం చివరి వారం కావడంతో ఈ బ్రహ్మోత్సవానికి భక్తులు భారీగా వస్తారనే అంచనాతో టీటీడీ విస్తృత ఏర్పాట్లు చేపట్టింది.