India Inflation Rate: సామాన్యులకు మరో షాక్.. 6 శాతం దాటిన ద్రవ్యోల్బణం..!

India Inflation Rate: దేశంలో నిత్యావసర వస్తువుల ధరల పెరుగుదలతో సామాన్యులు ఆందోళన చెందుతున్నారు. అక్టోబర్ నెలలో రిటైల్ ద్రవ్యోల్బణం ఏకంగా 6.09 శాతానికి చేరింది. దీంతో రిజర్వ్ బ్యాంక్ ఆఫ్ ఇండియా నిర్దేశించిన 6 శాతం గరిష్ఠ పరిమితిని దాటింది. ముఖ్యంగా ఆహార పదార్థాల ధరలు పెరగడం ఈ పరిస్థితికి ప్రధాన కారణంగా మారింది. ఉల్లిపాయలు, వెల్లుల్లి, అల్లం వంటి వాటి ధరల పెరుగుదలతో సామాన్య కుటుంబాల బడ్జెట్‌పై భారం పెరుగుతోంది. అక్టోబర్ నెలలో రిటైల్ ద్రవ్యోల్బణం 6.09 శాతానికి చేరినట్లు కేంద్ర గణాంకాల మంత్రిత్వ శాఖ వెల్లడించింది. సెప్టెంబర్‌లో నమోదైన 5.54 శాతంతో పోలిస్తే అక్టోబర్‌లో ద్రవ్యోల్బణం మరింత పెరిగింది. రెండేళ్ల తర్వాత తొలిసారిగా రిటైల్ ద్రవ్యోల్బణం ఆర్బీఐ నిర్దేశించిన గరిష్ఠ పరిమితి 6 శాతాన్ని దాటడం గమనార్హం.

ద్రవ్యోల్బణం పెరగడానికి ఆహార పదార్థాల ధరలు కీలకంగా మారాయి.  ఉల్లిపాయల ధర 116 శాతం పెరగగా.. వెల్లుల్లి 60 శాతం, అల్లం 48 శాతం, నిమ్మకాయలు 47 శాతం ధరలు పెరిగాయి. అక్టోబర్‌లో ఆహార ద్రవ్యోల్బణం 8.94 శాతానికి చేరింది. సెప్టెంబర్‌లో ఇది 7.74 శాతంగా ఉంది. ముఖ్యంగా ఉల్లిపాయలు, వెల్లుల్లి, అల్లం ధరలు పెరగడం వినియోగదారులపై ప్రభావం చూపింది. కూరగాయలు, ఇతర నిత్యావసర సరుకుల ధరలు కూడా పెరగడంతో ఇంటి ఖర్చులు అధికమవుతున్నాయి. పట్టణాలతో పోలిస్తే గ్రామీణ ప్రాంతాల్లో ద్రవ్యోల్బణం అధికంగా నమోదైంది. అక్టోబర్ గణాంకాల ప్రకారం గ్రామీణ ప్రాంతాల్లో రిటైల్ ద్రవ్యోల్బణం 6.63 శాతంగా ఉండగా.. పట్టణ ప్రాంతాల్లో 5.41 శాతంగా ఉంది. అంటే గ్రామీణ ప్రజలు ధరల పెరుగుదల ప్రభావాన్ని మరింత ఎక్కువగా ఎదుర్కొంటున్నారు.

రిటైల్ ద్రవ్యోల్బణం RBI గరిష్ఠ పరిమితిని దాటడంతో ఇప్పుడు అందరి దృష్టి కేంద్ర బ్యాంకు తదుపరి నిర్ణయంపై పడింది. ధరలను అదుపులోకి తీసుకురావడానికి ఆర్బీఐ వడ్డీ రేట్లను పెంచే అవకాశం ఉందని ఆర్థిక నిపుణులు అంచనా వేస్తున్నారు. డిసెంబర్‌లో జరిగే ద్రవ్య విధాన సమీక్షలో మరోసారి రెపో రేటు పెంపు ఉండవచ్చని విశ్లేషకులు భావిస్తున్నారు. అదే జరిగితే హోమ్, పర్సనల్ లోన్లు తీసుకున్నవారిపై ఈ ప్రభావం పడే అవకాశం ఉంటుంది. మొత్తంగా చూస్తే ఆహార పదార్థాల ధరల పెరుగుదలతో మొదలైన ద్రవ్యోల్బణ ఒత్తిడి ఇప్పుడు ఆర్థిక వ్యవస్థకు సవాలుగా మారుతోంది. రానున్న నెలల్లో ధరలు ఏ మేరకు అదుపులోకి వస్తాయన్నది కీలకంగా మారనుంది.

RBI ద్రవ్యోల్బణం సేఫ్ జోన్ అంటే..

దేశంలో ధరల పెరుగుదలను నియంత్రించేందుకు RBI ఒక నిర్దిష్ట ద్రవ్యోల్బణ పరిధిని నిర్ణయించింది. దీన్నే ఇన్‌ఫ్లేషన్ టాలరెన్స్ బ్యాండ్ లేదా సేఫ్ జోన్ అంటారు. ఈ పరిధి కనిష్ఠంగా 2 శాతం.. గరిష్ఠంగా 6 శాతంగా ఉంటుంది. అయితే ద్రవ్యోల్బణాన్ని దీర్ఘకాలంలో 4 శాతం వద్ద కొనసాగించాలని RBI లక్ష్యంగా పెట్టుకుంది. ధరల స్థిరత్వాన్ని కాపాడుతూనే దేశ ఆర్థిక వృద్ధికి ఆటంకం కలగకుండా చూడటం ఈ విధానం ప్రధాన ఉద్దేశం.