Jio Bharat 4G Offer: జియో కస్టమర్లకు అదిరిపోయే ఆఫర్..6 నెలల పాటు రీఛార్జ్ పూర్తిగా ఉచితం..ఎలా?
Jio Bharat 4G Recharge Offer: దేశంలో 2G నెట్‌వర్క్ ఉపయోగిస్తున్న వినియోగదారులను 4G వైపు ప్రోత్సహించే దిశగా రిలయన్స్ జియో ఒక ప్రత్యేక ఆకర్షణీయ ఆఫర్‌ను ప్రవేశపెట్టింది. కంపెనీ తన 10వ వార్షికోత్సవ సందర్భాన్ని పురస్కరించుకుని 'జియోభారత్' 4G ఫోన్‌ను కొనుగోలు చేసే వినియోగదారులకు 6 నెలల పాటు ఉచిత రీఛార్జ్ సదుపాయాన్ని అందించనుంది. ఈ ఫోన్ ప్రారంభ విక్రయ ధర రూ. 1,499 కాగా, అందులో లభించే ఆరు నెలల ఉచిత రీఛార్జ్ విలువను తీసివేస్తే ఫోన్ వాస్తవ ధర కేవలం రూ. 299 మాత్రమే అవుతుందని జియో వెల్లడించింది.
Jio Bharat 4G Recharge Offer: భారతదేశాన్ని 2G రహితంగా మార్చడమే ప్రధాన ధ్యేయంగా దాదాపు ఐదేళ్ల క్రితం నిర్వహించిన తమ వార్షిక సమావేశంలో రిలయన్స్ గ్రూప్ ఒక ముఖ్యమైన లక్ష్యాన్ని ప్రకటించింది. దేశంలోని పాత 2G ఫీచర్ ఫోన్ వినియోగదారులందరి చేతుల్లోకి వేగవంతమైన 4G సేవలను తీసుకురావడమే ఈ నిర్ణయం ముఖ్య ఉద్దేశం. ఆ హామీని నెరవేరుస్తూ, జియో తన 10వ వార్షికోత్సవ ఆఫర్‌లో భాగంగా పాత 2G వినియోగదారుల కోసం ప్రత్యేకంగా 'జియోభారత్' 4G ఫోన్‌ను అందుబాటులోకి తీసుకువచ్చింది.
ధర, ఉచిత రీఛార్జ్ వివరాలు..
ఈ ప్రత్యేక ఆఫర్‌లో భాగంగా జియోభారత్ ఫోన్‌ను కొనుగోలు చేసే సమయంలో వినియోగదారులు ప్రారంభంలో మొత్తం ధర అయిన రూ. 1,499 చెల్లించాల్సి ఉంటుంది. అయితే కొనుగోలు చేసిన కస్టమర్లకు తదుపరి ఆరు నెలల పాటు ఉచిత రీఛార్జ్ లభిస్తుంది.
ఈ ఆరు నెలల కాలంలో వినియోగదారులకు ప్రతి నెలా 14 GB డేటాతో పాటు అపరిమిత HD వాయిస్ కాలింగ్ సదుపాయాలు అందుతాయి. దీనివల్ల రాబోయే ఆరు నెలల పాటు రీఛార్జ్ ఖర్చుల గురించి ఎలాంటి ఆందోళన చెందాల్సిన అవసరం ఉండదు.
సాధారణంగా 2G ఫీచర్ ఫోన్‌లు వాడే వినియోగదారులు రీఛార్జ్ కోసం నెలకు సుమారు రూ. 199 వరకు ఖర్చు చేస్తుంటారు. ఆ లెక్కన 6 నెలల కాలంలో ఈ రీఛార్జ్ ఖర్చు దాదాపు రూ. 1,200 అవుతుంది. ఫోన్ మొత్తం ధర రూ. 1,499 నుండి ఈ రూ. 1,200 రీఛార్జ్ విలువను తీసివేస్తే, 2G నుంచి 4Gకి మారడానికి కస్టమర్‌‌కు అయ్యే వాస్తవ అదనపు ఖర్చు కేవలం రూ. 299 మాత్రమేనని జియో తెలిపింది. ఇంత తక్కువ ధరకు 4G ఫోన్‌ను అందించడం టెలికాం మార్కెట్‌లో తీవ్రమైన పోటీని సృష్టించనుంది.
సాంకేతిక వివరాలు, సేవలు..
2G నుండి 4Gకి అప్‌గ్రేడ్ అయ్యే వినియోగదారులకు హై-స్పీడ్ ఇంటర్నెట్ సదుపాయం లభిస్తుందని టెలికాం సంస్థ జియో ప్రకటించింది. జియోభారత్ ఫోన్ 2.4-అంగుళాల డిస్‌ప్లే, 2000mAh బ్యాటరీని కలిగి ఉంటుంది. ఈ ఫోన్ ద్వారా JioTV యాప్‌లో 500కి పైగా టీవీ ఛానెళ్లను ఉచితంగా చూడవచ్చు.
అలాగే JioHotstar ద్వారా క్రికెట్, సినిమాలు, వినోద కార్యక్రమాలు చూడడం సహా పాటల్ని వినొచ్చు. అదనంగా JioPay ద్వారా డిజిటల్ UPI చెల్లింపుల సదుపాయం కూడా లభిస్తుంది. ఈ ప్రత్యేక ఆఫర్ ఎంపిక చేసిన జియోభారత్ మోడళ్లు అయిన A1, B1, B2, B3 ఫోన్‌లకు మాత్రమే వర్తిస్తుందని సంస్థ పేర్కొంది.
Also Read: BSNL Insurance Offer: బీఎస్ఎన్ఎల్ కస్టమర్లకు బంపర్ ఆఫర్..రీఛార్జ్ చేసుకుంటే ఫ్రీ ఇన్సూరెన్స్ మీ కోసం!
Also Read: D2M Live TV Without Internet: మొబైల్‌లో సిమ్, ఇంటర్నెట్ లేకుండానే లైవ్ టీవీ..'D2M' టెక్నాలజీతో సరికొత్త విప్లవం!
