మీ పీఎఫ్ డబ్బులు విత్‌డ్రా చేస్తున్నారా? ఏ అవసరానికి ఎంత లిమిట్ ఉందో ఇలా తెలుసుకోండి!

PF Advance New Rules: ప్రతి ఉద్యోగి పీఎఫ్ ఖాతాలోకి ప్రతి నెలా జీతం నుండి కొంత భాగం, అలాగే యజమాని తరపున కూడా కొంత మొత్తం జమ అవుతుంది. పీఎఫ్ అనేది అత్యవసర సమయాల్లో ఎంతో ఉపయోగపడే ఒక అద్భుతమైన పెట్టుబడి. EPFO మెంబర్స్ కొన్ని ప్రత్యేక సందర్భాలలో సులభంగా డబ్బు విత్‌డ్రా చేసుకోవచ్చు. ముఖ్యంగా చదువు, వైద్యం, అత్యవసర అవసరాలు, వివాహం, ఇల్లు కొనడం లేదా ఇంటి నిర్మాణం వంటి సందర్భాల్లో మీరు ఈ డబ్బును విత్‌డ్రా చేసుకోవచ్చు. అయితే ఏ సందర్భంలో ఎంత మొత్తాన్ని తీసుకోవచ్చో మీకు తెలుసా?

సాధారణంగా పీఎఫ్ నుండి డబ్బు విత్‌డ్రా చేయడానికి ఐదు ప్రధాన కారణాలకు అడ్వాన్స్ తీసుకునే అవకాశం ఉంది. EPFO గైడ్ లైన్స్ ప్రకారం, ఇంటి అవసరాల కోసం డబ్బు విత్‌డ్రా చేయాలంటే కొన్ని అర్హతలు కూడా ఉండాలి. అవేంటో ఇప్పుడు తెలుసుకుందాం..

మెడికల్ ట్రీట్మెంట్..
వైద్య చికిత్స కోసం విత్‌డ్రా చేయడానికి ఎలాంటి పరిమితి లేదు. మీకు లేదా మీ కుటుంబ సభ్యులకు వైద్య అవసరాలు ఉన్నప్పుడు, మెడికల్ ఎమర్జెన్సీ సందర్భంలో మీరు పీఎఫ్ నుండి అడ్వాన్స్ తీసుకోవచ్చు.

ఎడ్యుకేషన్..
చదువుల కోసం కూడా మీరు పీఎఫ్ డబ్బులను విత్‌డ్రా చేసుకోవచ్చు. మీ సర్వీస్ పీరియడ్‌ను బట్టి, మీ పిల్లలకు లేదా కుటుంబ సభ్యులకు అవసరమైనంత మొత్తాన్ని తీసుకోవడానికి సౌలభ్యం ఉంది.

పెళ్లికి..
మీ స్వంత వివాహం లేదా మీ తోబుట్టువులు, పిల్లల వివాహ అవసరాల కోసం కూడా పీఎఫ్ డబ్బులు విత్‌డ్రా చేసుకోవచ్చు. మీ సర్వీస్ పీరియడ్‌లో ఐదు సార్లు ఈ సౌలభ్యాన్ని ఉపయోగించుకోవచ్చు.

ఇంటి ఖర్చులు..
ఇల్లు కొనాలన్నా, రెడీమేడ్ ఫ్లాట్ కొన్నా లేదా ఇంటి నిర్మాణానికి సంబంధించిన ఇన్స్టాల్‌మెంట్స్, రిపేర్ల కోసం కూడా ఈ డబ్బును విత్‌డ్రా చేసుకోవచ్చు. మీ సర్వీస్ కాలంలో మొత్తం ఐదు సార్లు ఈ ఆప్షన్‌తో పీఎఫ్ అడ్వాన్స్ తీసుకోవచ్చు.

కొన్ని ప్రత్యేక సందర్భాల్లో..
ఇవి మాత్రమే కాకుండా, కొన్ని ప్రత్యేక పరిస్థితుల్లో కూడా పీఎఫ్ నుండి అడ్వాన్స్ తీసుకోవచ్చని సెంట్రల్ బోర్డ్ ఆఫ్ ట్రస్ట్ తెలిపింది. ఒక ఏడాదిలో రెండు సార్లు విత్‌డ్రా చేసుకునే సౌలభ్యం కూడా ఉంది. పీఎఫ్ విత్‌డ్రా చేసుకోవాలంటే మీకు EPFO ఖాతా ఉండాలి. కనీసం ఒక సంవత్సరం సర్వీస్ పూర్తి చేసిన వారు మాత్రమే దీనికి అర్హులు. మెంబర్స్ తమ పిఎఫ్ ఖాతాలోని 75 శాతం వరకు విత్‌డ్రా చేసుకోవచ్చు.