Pakistan Dry Dates Seized: దొంగదారిలో భారత్‌లోకి పాకిస్థాన్ ఎండు ఖర్జూరాలు.."ఆపరేషన్ డీప్ మ్యానిఫెస్ట్" 362 మెట్రిక్ టన్నుల సరుకు సీజ్!

Pakistan Dry Dates Seized: పాకిస్థాన్ నుంచి భారత్‌కు ఎండు ఖర్జూరాలు (Dry Dates) దొంగచాటుగా తరలిస్తున్నారనే పక్కా సమాచారంతో డైరెక్టరేట్ ఆఫ్ రెవెన్యూ ఇంటెలిజెన్స్ (DRI) అధికారులు తనిఖీలు చేపట్టారు. పాక్ నుంచి దిగుమతులపై ఆంక్షలు ఉన్నప్పటికీ, ఆ దేశానికి చెందిన దాదాపు 362 మెట్రిక్ టన్నులకు పైగా ఎండు ఖర్జూరాలు మహారాష్ట్రలోని నాసిక్‌కు చేరినట్లు నిఘా వర్గాలు డీఆర్ఐకి సమాచారం అందించాయి. దీంతో నాసిక్‌లోని అంబాడ్ కంటైనర్ ఫ్రైట్ స్టేషన్ వద్ద ముంబయికి చెందిన ఒక సంస్థ దిగుమతి చేసుకున్న 13 కంటైనర్ల ఎండు ఖర్జూరాలను డీఆర్ఐ అధికారులు స్వాధీనం చేసుకున్నారు.

యూఏఈ మార్గంలో నకిలీ పత్రాల సృష్టి..
సదరు ఎండు ఖర్జూరాలను యునైటెడ్ అరబ్ ఎమిరేట్స్ (యూఏఈ) నుంచి దిగుమతి చేసుకున్నట్లు ముంబయికి చెందిన సదరు సంస్థ పత్రాల్లో పేర్కొంది. అయితే, అధికారుల ప్రాథమిక దర్యాప్తులో ఈ సరుకు పాకిస్థాన్ నుంచి వచ్చినట్లు వెల్లడైంది.

అధికారులకు అనుమానం రాకుండా ఉండేందుకు ఈ ఎండు ఖర్జూరాలను మొదట పాకిస్థాన్‌లోని కరాచీ పోర్టు నుంచి యూఏఈలోని జెబెల్ అలీ పోర్టుకు తరలించారు. అక్కడ వాటిని మరొక నౌకలోకి లోడ్ చేసి, నకిలీ పత్రాలు సృష్టించి భారత్‌కు పంపినట్లు అధికారులు తెలిపారు. ఈ అక్రమ వ్యవహారంలో సదరు కంపెనీపై కేసు నమోదు చేసి పోలీసులు విచారణ జరుపుతున్నారు.

ఉగ్రదాడి నేపథ్యంలో నిషేధం..
పహల్గాంలో గతేడాది జరిగిన ఉగ్రదాడి తర్వాత పాకిస్థాన్ నుంచి వచ్చే అన్ని రకాల దిగుమతులపై భారత కేంద్ర ప్రభుత్వం కఠిన నిషేధం విధించింది. ఇకపై ఇరుదేశాల మధ్య ఎలాంటి వాణిజ్య సంబంధాలు ఉండబోవని భారత్ స్పష్టం చేసింది.

ఆ నాటి నుంచి పాకిస్థాన్ నుంచి వివిధ మార్గాల్లో జరిగే అక్రమ దిగుమతులను అడ్డుకునేందుకు డీఆర్ఐ అధికారులు 'ఆపరేషన్ డీప్ మ్యానిఫెస్ట్' పేరిట నిరంతరం తనిఖీలు నిర్వహిస్తున్నారు. ఈ తనిఖీల క్రమంలోనే యూఏఈ మీదుగా సాగిన ఈ భారీ ఎండు ఖర్జూరాల అక్రమ రవాణా రాకెట్ బయటపడింది.

Also Read: ఇరాన్‌తో భీకర యుద్ధం వేళ అమెరికాలో మధ్యంతర ఎన్నికలు..ట్రంప్ అధ్యక్ష పదవి కోల్పోతాడా?

Also Read: ఇండోనేషియాలో బద్దలైన అగ్నిపర్వతం..209 విమానాలపై ప్రభావం, ప్రయాణికులకు తీవ్ర అంతరాయం