Breast Cancer: లక్షణాలు లేకపోయినా రొమ్ము క్యాన్సర్ వస్తుందా.. ముందుగానే గుర్తించడం ఎలా..?

రొమ్ము క్యాన్సర్

రొమ్ము క్యాన్సర్ ప్రారంభ దశలో ఉన్నప్పుడు కొంతమంది మహిళలకు ఎలాంటి ఇబ్బందులు ఉండకపోవచ్చు. రొమ్ములో గడ్డ కనిపించకపోవచ్చు. నొప్పి కూడా ఉండకపోవచ్చు. అలాంటి సమయంలో క్యాన్సర్‌ను గుర్తించడానికి స్క్రీనింగ్ పరీక్షలు ఉపయోగపడతాయి. ఈ పరీక్షల ద్వారా బయటకు కనిపించని చిన్న మార్పులను కూడా గుర్తించే అవకాశం ఉంటుంది వ్యాధిని ప్రారంభ దశలో గుర్తిస్తే చికిత్స సులభంగా ఉండటంతో పాటు, కోలుకునే అవకాశాలు కూడా మెరుగుపడతాయి.

రొమ్ము క్యాన్సర్‌ను గుర్తించే పరీక్షలు ఏవి?

1. మామోగ్రఫీ: రొమ్ము క్యాన్సర్‌ను ముందుగానే గుర్తించడానికి ఉపయోగించే ముఖ్యమైన పరీక్ష ఇది. తక్కువ మోతాదులో ఎక్స్‌రే కిరణాలను ఉపయోగించి రొమ్ము కణజాలాన్ని పరిశీలిస్తారు. చేతికి గడ్డ తగలకముందే కొన్ని అసాధారణ మార్పులను గుర్తించవచ్చు. 2. అల్ట్రాసౌండ్: రొమ్ము కణజాలం దట్టంగా ఉన్న మహిళలకు ఈ పరీక్ష ఉపయోగపడుతుంది. అవసరాన్ని బట్టి వైద్యులు మామోగ్రఫీతో పాటు అల్ట్రాసౌండ్‌ను సూచించవచ్చు. 3. ఎంఆర్‌ఐ పరీక్ష: కుటుంబంలో రొమ్ము క్యాన్సర్ చరిత్ర ఉన్నవారు లేదా ఇతర కారణాలతో అధిక ముప్పు ఉన్నవారికి వైద్యులు ఎంఆర్‌ఐ పరీక్షను సూచించవచ్చు. థర్మల్ ఇమేజింగ్ వంటి ఇతర పరీక్షలు కూడా కొన్ని సందర్భాల్లో ఉపయోగిస్తారు. అయితే, వీటిని మామోగ్రఫీకి ప్రత్యామ్నాయంగా భావించకూడదు.

ఏ వయస్సు నుంచి పరీక్షలు చేయించుకోవాలి?

సాధారణంగా రొమ్ము క్యాన్సర్ ముప్పు ఉన్న మహిళలు 40 ఏళ్ల వయస్సు నుంచి స్క్రీనింగ్ గురించి వైద్యులతో చర్చించాలి. అయితే, పరీక్షలు ఎప్పుడు ప్రారంభించాలి, ఎంత తరచుగా చేయించుకోవాలి అనేది వ్యక్తిగత ఆరోగ్య పరిస్థితులు, కుటుంబ చరిత్రపై ఆధారపడి ఉంటుంది. కుటుంబంలో రొమ్ము లేదా అండాశయ క్యాన్సర్ ఉన్నవారు, BRCA1 లేదా BRCA2 జన్యు మార్పులు ఉన్నవారు ముందుగానే వైద్యుల సలహా తీసుకోవాలి. అధిక ముప్పు ఉన్నవారికి అవసరాన్ని బట్టి చిన్న వయస్సులోనే పరీక్షలు సూచించవచ్చు.

ఎలాంటి మార్పులు కనిపిస్తే జాగ్రత్తపడాలి?

రొమ్ములో కొత్తగా గడ్డ కనిపించడం, చర్మం లోపలికి లాగినట్లు మారడం, చనుమొన ఆకృతిలో మార్పులు రావడం, చనుమొన నుంచి రక్తంతో కూడిన ద్రవం రావడం వంటి లక్షణాలను నిర్లక్ష్యం చేయకూడదు. ఇవి కనిపించినంత మాత్రాన క్యాన్సర్ ఉందని అర్థం కాదు. అయినప్పటికీ, వైద్యుడిని సంప్రదించి పరీక్షలు చేయించుకోవాలి.

ముందస్తు గుర్తింపు ఎందుకు ముఖ్యం?

రొమ్ము క్యాన్సర్‌ను ప్రారంభ దశలో గుర్తిస్తే చికిత్స ఫలితాలు మెరుగ్గా ఉండే అవకాశం ఉంటుంది. కొన్ని సందర్భాల్లో రొమ్ములో వ్యాధి ఉన్న భాగాన్ని మాత్రమే తొలగించే శస్త్రచికిత్స సరిపోవచ్చు. క్యాన్సర్ రకం, దశను బట్టి ఇతర చికిత్సలను నిర్ణయిస్తారు. చాలామంది భయంతో లేదా లక్షణాలు లేవనే కారణంతో పరీక్షలకు దూరంగా ఉంటారు. కానీ స్క్రీనింగ్ అనేది వ్యాధి ఉందని నిర్ధారించడానికి చేసే పరీక్ష మాత్రమే కాదు; లక్షణాలు రాకముందే ప్రమాదాన్ని గుర్తించడానికి ఉపయోగపడే ముందస్తు జాగ్రత్త కూడా.

గమనిక

మీ వయస్సు, కుటుంబ ఆరోగ్య చరిత్ర ఆధారంగా ఏ పరీక్ష అవసరమో వైద్యుడిని సంప్రదించి తెలుసుకోండి. రొమ్ములో కొత్త మార్పులు కనిపిస్తే ఆలస్యం చేయకుండా వైద్య పరీక్ష చేయించుకోవడం మంచిది.