దసరా, సద్దుల బతుకమ్మ ఎప్పుడంటే? పండితులు ప్రకటించిన పండుగ వివరాలు!

Dussehra 2026 Dates: మన దేశంలో విజయదశమి అత్యంత ముఖ్యమైన పండుగలలో ఒకటి. చెడుపై మంచి సాధించిన విజయానికి ప్రతీకగా ఈ పండుగను నవరాత్రుల అనంతరం నిర్వహిస్తారు. ఇదే సమయంలో తెలంగాణా అంతటా పది రోజుల పాటు బతుకమ్మ వేడుకలు కూడా జరుగుతాయి. దసరా నవరాత్రుల తేదీల విషయంలో చాలా మందికి ఉన్న సందేహాలను పండితులు నివృత్తి చేశారు. అక్టోబర్ 11 నుంచి నవరాత్రులు ప్రారంభమవుతాయి. తెలంగాణలో అమావాస్య నుంచే బతుకమ్మ పండుగ మొదలవుతుంది. పండితుల సూచనల ప్రకారం, అక్టోబర్ 18న సద్దుల బతుకమ్మను, 19న మహర్నవమి, 20న విజయదశమి పండుగను నిర్వహించాలి. 20వ తేదీ సాయంత్రం జమ్ము చెట్టు పూజతో వేడుకలు జరుగుతాయి. అలాగే తెలంగాణలో దసరా రోజున పాలపిట్టను చూడటం కూడా ఒక ఆచారం.

దసరా పండుగకు ప్రత్యేక ప్రాముఖ్యత ఉంది. ఈసారి దసరా అక్టోబర్ 20, మంగళవారం నాడు వస్తుంది. దేశవ్యాప్తంగా విజయదశమి వేడుకలు ఎంతో వైభవంగా జరుగుతాయి. ఈ రోజు ఏదైనా కొత్త పని ప్రారంభించడం శుభప్రదమని, ఇది విజయ ముహూర్తం అని నమ్ముతారు. దీనికి ముందు రోజు ఆయుధ పూజ కూడా నిర్వహిస్తారు. దసరా సందర్భంగా దేశంలోని పలు ప్రాంతాలలో సూర్యాస్తమయం సమయంలో రావణ దహనం జరుగుతుంది. ముఖ్యంగా రాంలీల మైదానంలో ఈ వేడుకలు అత్యంత ఘనంగా నిర్వహిస్తారు.

విజయదశమి అంటేనే చెడుపై మంచి సాధించిన విజయం కాబట్టి, ఈ రోజున గృహప్రవేశాలు, కొత్త వ్యాపారాలు ప్రారంభించడం చాలా మంచిదని చెబుతారు. ఈ రోజు ప్రారంభించిన వ్యాపారం విజయవంతం అవుతుందని నమ్మకం. అలాగే ఉత్తరాదిలో అపరాజిత దేవితో పాటు జయవిజయలను ప్రతిష్టించి ప్రత్యేక పూజలు నిర్వహిస్తారు.

తెలంగాణలో అమావాస్య నుంచే బతుకమ్మ వేడుకలు ప్రారంభమై, తొమ్మిది రోజుల తర్వాత సద్దుల బతుకమ్మతో ముగుస్తాయి. మొదటి రోజు ఎంగిలి పూల బతుకమ్మతో మొదలై, చివరిగా సద్దుల బతుకమ్మతో వేడుకలు పూర్తవుతాయి. అక్టోబర్ 18న సద్దుల బతుకమ్మ రాగా, 20వ తేదీన విజయదశమి పండుగను నిర్వహించుకోవాలి. (Disclaimer: ఇక్కడ అందించిన జ్యోతిష్య సమాచారం సాధారణ నమ్మకాలు, పంచాంగాలు, జ్యోతిష్య అభిప్రాయాల ఆధారంగా మాత్రమే ఇవ్వబడింది. దీనిని శాస్త్రీయంగా నిర్ధారించబడిన సమాచారంగా పరిగణించరాదు. ఈ సమాచారాన్ని మా Zee Telugu News స్వతంత్రంగా ధృవీకరించలేదు.)