టీడీఆర్ సేవలకు ఆధార్ అథెంటికేషన్.. తెలంగాణ సర్కార్ కీలక నిర్ణయం.. పూర్తి వివరాలు ఇవే!

Telangana GO 255: తెలంగాణ ప్రభుత్వం రాష్ట్రంలో ట్రాన్స్‌ఫరబుల్ డెవలప్‌మెంట్ రైట్స్ (TDR) ప్రక్రియను మరింత పారదర్శకంగా, భద్రంగా నిర్వహించేందుకు ఒక ముఖ్యమైన అడుగు వేసింది. టీడీఆర్ ఆన్‌లైన్ పోర్టల్‌లో ఆధార్ ఆధారిత అథెంటికేషన్‌ (Aadhaar Authentication) విధానాన్ని అమలు చేయాలని పురపాలక, పట్టణాభివృద్ధి శాఖ నిర్ణయిస్తూ అధికారిక ఉత్తర్వులు జారీ చేసింది. లావాదేవీల్లో జరిగే మోసాలు, ఫేక్ రిజిస్ట్రేషన్లు, అనఫిషియల్ లాగిన్స్ వంటి అక్రమాలకు చెక్ పెట్టడమే ఈ చర్య ప్రధాన ఉద్దేశ్యంగా పేర్కొంది.

నూతన విధానం ప్రకారం.. ఆస్తి యజమానులు, బిల్డర్లు, డెవలపర్లు టీడీఆర్ పోర్టల్లో రిజిస్ట్రేషన్, లాగిన్ దరఖాస్తుల సమర్పణ వంటి సేవలకు ఆధార్ అథెంటికేషన్ వినియోగించుకోవచ్చు. దీనివల్ల ఆస్తుల వివరాలను డేటాబేస్ తో అనుసంధానం చేయడం మరింత సులభం అవుతుంది. కేవలం వినియోగదారులకే కాకుండా.. డైరెక్టరేట్ ఆఫ్ టౌన్ అండ్ కంట్రీ ప్లానింగ్, గ్రేటర్ హైదరాబాద్ మున్సిపల్ కార్పొరోష్ అధికారుల పరిపాలనాపరమైన లావాదేవీలకు కూడా ఆధార్ అథెంటికేషన్ వర్తిస్తుంది. దీంతో రికార్డుల కచ్చితత్వం మెరుగుపడటంతోపాటు.. మొత్తం ప్రక్రియలో జవాబుదారీతనం మరింత పెరుగుతుందని సర్కార్ భావిస్తోంది.

ఇక టీడీఆర్ ప్రక్రియలో ఆధార్ వినియోగాన్ని తప్పనిసరి చేయలేదు. ఇది పూర్తిగా స్వచ్చందమని ఉత్తర్వుల్లో ప్రభుత్వం స్పష్టం చేసింది. ఆధార్ కార్డుదారుల ముందస్తు అనుమతితోనే ఈ ప్రక్రియను పూర్తి చేయాలి. ఎవరైనా ఆధార్‌ను ఉపయోగించకూడదనుకుంటే లేదా సాంకేతిక కారణాల వల్ల దానిని ఉపయోగించలేకపోతే, వారికి ఎలాంటి సేవలు నిరాకరించబడవని ప్రభుత్వం స్పష్టం చేసింది. అటువంటి సందర్భాలలో, అదనపు గుర్తింపు రుజువుగా పాస్‌పోర్ట్, ఓటర్ ఐడి కార్డు, డ్రైవింగ్ లైసెన్స్, పాన్ కార్డు లేదా ఏదైనా ఇతర ప్రభుత్వ ఫోటో గుర్తింపు కార్డును సమర్పించవచ్చని తెలిపింది.

ఆధార్ చట్టం.. దాని సంబంధిత నిబంధనలకు అనుగుణంగా ఈ నిర్ణయం తీసుకున్నట్లు మున్సిపల్ కార్పొరేషన్ శాఖ పేర్కొంది. కేంద్ర ఎలక్ట్రానిక్స్,  ఇన్ఫర్మేషన్ టెక్నాలజీ మంత్రిత్వ శాఖ   యూనిక్ ఐడెంటిఫికేషన్ అథారిటీ ఆఫ్ ఇండియాతో సంప్రదించిన తర్వాత ప్రభుత్వం ఈ విధానాన్ని ఆమోదించినట్లు తెలిపింది.