తెలుగు రాష్ట్రాల్లో ఘనంగా దసరా ఉత్సవాలు..

Vijaya Dashami Festival: ఇక ప్రముఖ జ్యోతిర్లింగం మరియు అష్టాదశ శక్తిపీఠాల్లో ఒకటైన శ్రీశైలంలో మొదటిరోజు  మొదటి రోజు అమ్మవారు శైలపుత్రి అలంకారంలో భక్తులకు దర్శనమిచ్చారు. అమ్మవారి ఆలయ ప్రాంగణం బయట ఏర్పాటు చేసిన ప్రత్యేక వేదికపై శైలపుత్రి అలంకారంలో ఉన్న అమ్మవారిని పలురకాల పూలతో అలంకరించారు. బిల్వదళాలతో శాస్త్రోక్తంగా వేదమంత్రాలతో మంగళవాయిద్యాల నడుమ.. సుగంధ ద్రవ్యాలు, ధూప దీప నైవేద్యాలతో పూజించి మంగళ హారతులిచ్చారు.  శైలపుత్రి అలంకారంలో ఉన్న భ్రమరాంబికాదేవిని, మల్లికార్జునస్వామిని బృంగివాహనంపై ఆశీనులను చేసి ప్రత్యేక పూజలు చేశారు.  సంప్రదాయ నృత్యం, నాట్యాల నడుమ శ్రీస్వామి అమ్మవార్లు గ్రామోత్సవంలో విహారించారు. ఉత్సవ కార్యక్రమంలో ఆలయ అధికారుల, పెద్దఎత్తున భక్తులు పాల్గొన్నారు.రెండో రోజు బ్రహ్మచారిణి రూపంలో భక్తులకు దర్శనమిస్తున్నారు.

బాసర పుణ్యక్షేత్రం..

బాసర పుణ్యక్షేత్రంలో  నవరాత్రి వేడుకలు ఘనంగా కొనసాగుతున్నాయి. రెండవ రోజు శ్రీ జ్ఞాన సరస్వతి అమ్మవారు.. బ్రహ్మచారిణీ దేవి అలంకారంలో భక్తులకు  దర్శనమిస్తున్నారు. వేకువ జామున 4 గంటలకు బాలాలయంలో అమ్మవారికి అభిషేకం, మహా హారతి నిర్వహించి, నైవేద్యం సమర్పించారు అర్చకులు. దేవి నవరాత్రి సందర్బంగా వస్తున్న భక్తులకు నాందేడ్ కు చెందిన జగదీశ్ మహారాజ్ గాడిపుర శిష్యుల ఆధ్వర్యంలో అన్నదానం కొనసాగుతోంది. భక్తులకు ఇబ్బందులు కలగకుండా పోలీసులు, అలయ అధికారులు ప్రత్యేక చర్యలు చేపట్టారు. బ్రహ్మచర్యానికి ప్రతీక అయిన బ్రహ్మచారిణీ రూపంలో ఉన్న అమ్మవారిని దర్శించుకోవడం వల్ల.. ప్రశాంతత, జ్ఞానం, సకల శుభాలు కలుగుతాయని భక్తుల నమ్మకం.

ధవళేశ్వరం..
రాజమండ్రి రూరల్‌ ధవళేశ్వరంలోని ఎర్రకొండ పెద్ద దుర్గమ్మ ఆలయంలో దేవీ శరన్నవరాత్రి ఉత్సవాలు ఘనంగా ప్రారంభం అయ్యాయి. 39వ నవరాత్రి వేడుకలను ఆలయ కమిటీ ఘనంగా ఏర్పాటు చేసింది. ప్రత్యేక అలంకారంలో అమ్మవారికి భక్తులు పూజలు చేశారు. బాల త్రిపుర సుందరీ దేవికి 21 రకాల అఖండ హారతి ఇచ్చారు. పెద్ద సంఖ్యలో భక్తులు, ఆలయ కమిటీ సభ్యులు పాల్గొన్నారు. ఈ రోజు గాయత్రి దేవి అలంకారంలో దర్శనమిచ్చాు.

తిరుమలలో దసరా ఉత్సవాలు.. 
తిరుమల శ్రీవారి నవరాత్రి బ్రహ్మోత్సవాలకు సర్వాంగ సుందరంగా ముస్తాబైంది.. శ్రీవారి ఆలయం ముందు టీటీడీ ఏర్పాటు చేసిన ప్రత్యేక పుష్పాలంకరణలు భక్తులను విశేషంగా ఆకట్టుకుంటున్నాయి.. స్వామివారి వివిధ రూపాలతో ఏర్పాటు చేసిన అలంకరణలు చూపరులను కట్టిపడేస్తున్నాయి.. మరోవైపు నవరాత్రి బ్రహ్మోత్సవాలను తిలకించేందుకు తిరుమలకు భక్తుల తాకిడి పెరిగింది.. తొమ్మిది రోజుల పాటు స్వామివారు వివిధ వాహనాలపై మాడ వీధుల్లో విహరిస్తూ భక్తులకు దర్శనమివ్వనున్నారు.