BC Reservations: స్థానిక ఎన్నికలపై ఏపీ మంత్రివర్గం కీలక నిర్ణయం.. బీసీ రిజర్వేషన్లు ఎన్ని కేటాయించారంటే?

AP BC Reservations: స్థానిక సంస్థల ఎన్నికల్లో బీసీ రిజర్వేషన్ల అంశం ముగిసిపోయింది. హైకోర్టు, సుప్రీంకోర్టు ఆదేశాలతో బీసీ రిజర్వేషన్ల పెంపు ఆగిపోయింది. త్వరలో రానున్న స్థానిక సంస్థల ఎన్నికల కోసం ఆంధ్రప్రదేశ్‌ ప్రభుత్వం కీలక నిర్ణయం తీసుకుంది. స్థానిక సంస్థల ఎన్నికల్లో బీసీ రిజర్వేషన్లను ఆంధ్రప్రదేశ్ మంత్రివర్గం ఖరారు చేసింది. వెనుకబడిన తరగతులు (బీసీ) రిజర్వేషన్లకు సంబంధించి రాష్ట్ర మంత్రివర్గం కీలక నిర్ణయం తీసుకుంది. బీసీ రిజర్వేషన్ల శాతాలను ప్రభుత్వం అధికారికంగా ఖరారు చేసింది.

రిటైర్డ్ ఐఏఎస్ అధికారి రాజేష్ రంజన్ నేతృత్వంలోని కమిషన్ అందించిన నివేదిక, సిఫార్సుల ఆధారంగా మొత్తం 8 విభాగాల్లో (కేటగిరీలలో) రిజర్వేషన్ల శాతాన్ని కేటాయిస్తున్నట్లు ప్రభుత్వం వెల్లడించింది. కేటగిరీల వారీగా బీసీ రిజర్వేషన్ల మేయర్‌, మున్సిపల్‌ చైర్మన్‌, అర్బన్‌ వార్డులు, సర్పంచ్‌ స్థానాలు, పంచాయతీ వార్డులు, ఎంపీటీసీ, జెడ్పీటీసీ, ఎంపీపీ, జెడ్పీ చైర్మన్‌కు సంబంధించి బీసీ రిజర్వేషన్లు ఏపీ మంత్రివర్గం ఖరారు చేస్తూ నిర్ణయం తీసుకుంది. స్థానిక సంస్థల్లో బీసీ వర్గాలకు జనాభా ప్రాతిపదికన, నిబంధనలకు అనుగుణంగా న్యాయమైన ప్రాతినిధ్యం కల్పించేందుకే రాజేష్ రంజన్ కమిషన్ నివేదిక ఆధారంగా ఈ కేటాయింపులు చేపట్టినట్లు ఏపీ ప్రభుత్వం వెల్లడించింది. రిజర్వేషన్లు ఖరారు చేయడంతో త్వరలోనే స్థానిక సంస్థల ఎన్నికల ప్రక్రియ మరింత వేగవంతం కానుంది.

బీసీ రిజర్వేషన్లు ఇలా
మేయర్ పదవులు: 35.29 శాతం

మున్సిపల్ చైర్మన్ పదవులు: 33.02 శాతం

అర్బన్ వార్డులు: 32.78 శాతం

సర్పంచ్ స్థానాలు: 27.95 శాతం

పంచాయతీ వార్డులు: 26.73 శాతం

ఎంపీటీసీ స్థానాలు: 25.55 శాతం

ఎంపీపీ పదవులు: 24.60 శాతం

జెడ్పీటీసీ స్థానాలు: 24.60 శాతం

జడ్పీ చైర్మన్ పదవులు: 23.08 శాతం