AP Diwali Ration: ఏపీలో రేషన్ కార్డుదారులకు కూటమి ప్రభుత్వం దీపావళి కానుక..నవంబరులో ఈ సరుకుల పంపిణీ!

Diwali Ration Andhra Pradesh: పండుగ సమయంలో ఇళ్లలో కిరాణా సరుకుల అవసరం అధికంగా ఉంటుంది. ఈ విషయాన్ని దృష్టిలో ఉంచుకుని, ప్రభుత్వం రేషన్ షాపుల ద్వారా నాణ్యమైన సరుకులను అత్యంత సబ్సిడీ ధరలకు అందించనుంది. ప్రభుత్వం నిర్ణయించిన కొత్త ధరల ప్రకారం.. బహిరంగ మార్కెట్లో అధికంగా ఉన్న కందిపప్పును కిలో కేవలం రూ. 100కే పంపిణీ చేస్తారు. అలాగే, గోధుమ పిండిని కిలో రూ. 25కు, పామాయిల్‌ను లీటరు రూ. 125కే డిపోల ద్వారా అందించేలా ఏర్పాట్లు చేస్తున్నారు. ఈ పామాయిల్ సేకరించడానికి ప్రభుత్వం ప్రత్యేక టెండర్లను కూడా ఆహ్వానించింది.

తక్కువ ధరకే నాణ్యమైన బియ్యం విక్రయం..
ప్రస్తుతం బయట మార్కెట్లో సన్నబియ్యం ధర కిలో రూ. 100 వరకు ఉంటోంది. ఈ భారాన్ని తగ్గించేందుకు ప్రభుత్వం ప్రత్యేక సంచార (మొబైల్) వాహనాల ద్వారా 'ధరణి' బ్రాండ్ పేరుతో ఫైన్ రకం బియ్యాన్ని కిలో రూ. 49కి, సూపర్ ఫైన్ బియ్యాన్ని కిలో రూ. 50కే విక్రయించనుంది.

మరోవైపు, రైస్ మిల్లర్లు, హోల్‌సేల్ అసోసియేషన్లతో అధికారులు చర్చలు జరిపి బియ్యం ధరలను నియంత్రణలోకి తెచ్చారు. ఈ ఒప్పందం ప్రకారం బీపీటీ స్టీమ్ రైస్ కిలో రూ. 66కు, సాధారణ స్టీమ్ రైస్ కిలో రూ. 47కు మించకుండా అమ్మడానికి మిల్లర్లు అంగీకరించారు.

రైతు బజార్లలో ఉల్లి విక్రయాలు, నిఘా చర్యలు.. 
ఇప్పటికే రైతు బజార్లలో సన్నబియ్యంతో పాటు ఉల్లిపాయలను కిలో రూ. 35కే పంపిణీ చేస్తున్నారు. త్వరలోనే మరో 800 టన్నుల ఉల్లిపాయలను కూడా సబ్సిడీ ధరలకు అందించడానికి ప్రణాళిక రూపొందించారు.

రాష్ట్రంలో ధరల స్థితిగతులపై సమీక్ష నిర్వహించిన సీఎం చంద్రబాబు, బియ్యం అక్రమ రవాణా కాకుండా చెక్ పోస్టులు, టోల్ గేట్ల వద్ద నిఘా తీవ్రతరం చేయాలని ఆదేశించారు. మార్కెట్ సెస్సు భారాన్ని తగ్గించి, దీపావళి నాటికి ధరలు అదుపులో ఉండేలా నిరంతరం పర్యవేక్షించాలని అధికారులకు సూచించారు.