సాంబారులో బల్లి.. 19 మంది విద్యార్థినులు ఆసుపత్రికి తరలింపు!

Government Girls Junior College:  ప్రభుత్వ జూనియర్ కళాశాలలో జరిగిన ఘటన కలకలం రేపింది. బల్లి పడిన సాంబారు తిన్న 19 మంది విద్యార్థినులు ఆసుపత్రి పాలయ్యారు. ఈ ఘటన తూర్పుగోదావరి జిల్లా తునిలో జరిగింది. స్థానిక ప్రభుత్వ బాలికల జూనియర్ వసతి గ్రుహంలో వండిన సాంబారులో బల్లి పడింది. దీంతో 19 మంది విద్యార్థినులు తీవ్ర అస్వస్థతకు గురయ్యారు. ఈ ఘటన శనివారం మధ్యాహ్నం సమయంలో చోటుచేసుకుంది.

పూర్తి వివరాల్లోకి వెళ్లితే.. కాలేజీ హాస్టల్లో ఉంటున్న 49 మంది విద్యార్థినులు శనివారం మధ్యాహ్నం భోజనం చేశారు. మధ్యాహ్న భోజనం చేసిన తర్వాత కొద్దిసేపటికే, 19 మంది విద్యార్థులు తీవ్ర కడుపు నొప్పితో ఇబ్బంది పడ్డారు. అయితే అనుమానం వచ్చిన విద్యార్థినులు సాంబార్ గిన్నెలో చూడగా, అందులో చనిపోయిన బల్లి కనిపించింది. దీంతో విద్యార్థులు, సిబ్బంది ఆందోళనకు గురయ్యారు. కళాశాల ప్రిన్సిపాల్ వెంటనే  తీసుకుని వైద్యులకు సమాచారం అందించారు.

సాయంత్రానికి విద్యార్థినులకు కడుపునొప్పి తీవ్రం కావడంతో వారిని వెంటనే తుని ప్రభుత్వాసుపత్రికి తరలించారు. ప్రస్తుతం విద్యార్థులందరి ఆరోగ్యం నిలకడగా ఉందని.. ఎవరికీ ఎలాంటి ప్రమాదం లేదని ఆసుపత్రి సూపరింటెండెంట్ డాక్టర్ మహేశ్వరరావు తెలిపారు. ముందు జాగ్రత్తగా చర్యగా రాత్రంతా వారిని వైద్యుల పర్యవేక్షణలో ఉంచారు. పూర్తిగా కోలుకున్న తర్వాతే  డిశ్చార్జ్ చేస్తామని స్పష్టం చేశారు. ఈ ఘటన పై సమాచారం అందుకున్న స్థానిక ఎమ్మెల్యే యనమల దివ్య అధికారులతో ఫోన్లో మాట్లాడి వివరాలు తెలుసుకున్నారు.

అటు వైఎస్సార్ కడప జిల్లాలోనూ విద్యార్థులు అస్వస్థతకు గురయ్యారు. కలుషిత ఆహారం తిన్న విద్యార్థులు ఆసుపత్రి పాలయ్యారు. వైఎస్సార్ కడప జిల్లా తొండూరులోని గురుకుల పాఠశాలలో మధ్యాహ్నం భోజనం వికటించడంతో 20 మంది విద్యార్థులు ఒక్కసారిగా అస్వస్థతకు గురయ్యారు. భోజనం చేసిన విద్యార్థులకు తీవ్రమైన వాంతులు, విరేచనాలు అయ్యాయి. వెంటనే అప్రమత్తమైన ఉపాధ్యాయులు, సిబ్బంది విద్యార్థులను తొండూరు ప్రభుత్వాసుపత్రికి తరలించారు. పాఠశాలలో వండిన ఆహారం కలుషితం కావడం వల్లే విద్యార్థులు అనారోగ్యానికి గురయ్యారని ప్రాథమిక విచారణలో తేలింది. ప్రస్తుతం విద్యార్థులు కోలుకుంటున్నారు. ఈ ఘటనపై విద్యాశాఖ అధికారులు, స్థానిక యంత్రాంగం ఆరా తీసింది.