TDP Vs YSRCP: టీడీపీ Vs వైసీపీ..పుంగనూరులో తీవ్ర ఉద్రిక్తత..ఎంపీ మిథున్ రెడ్డి కాన్వాయ్‌పై రాళ్ల దాడి!

TDP Vs YSRCP In Punganur: పుంగనూరు పరిధిలో స్థానిక సంస్థల ఎన్నికల నామినేషన్ల ప్రక్రియ ప్రారంభమైన మొదటి రోజే రాజకీయ వాతావరణం ఒక్కసారిగా వేడెక్కింది. తమ పార్టీ అభ్యర్థుల నామినేషన్ల ప్రక్రియలో పాల్గొనేందుకు వైసీపీ ఎంపీ మిథున్ రెడ్డి నామినేషన్ కేంద్రానికి విచ్చేశారు. ఆయన రాకతో అక్కడే ఉన్న టీడీపీ, వైసీపీ శ్రేణుల మధ్య తీవ్ర స్థాయిలో ఆరోపణలు మొదలై ఘర్షణ వాతావరణం నెలకొంది.

కాన్వాయ్‌పై రాళ్ల దాడి - వాహనాలు ధ్వంసం..
రెండు వర్గాల మధ్య గొడవ ముదిరి పరస్పరం రాళ్ల దాడులకు దిగారు. ఈ క్రమంలో ఎంపీ మిథున్ రెడ్డి ప్రయాణిస్తున్న వాహనంతో పాటు పలు కార్లు తీవ్రంగా ధ్వంసమయ్యాయి. వైసీపీ శ్రేణులు కూడా తిరిగి ప్రతిదాడులు చేయడంతో వాతావరణం మరింత ఆందోళనకరంగా మారింది. ఈ రాళ్ల దాడులలో ఇరు వైపులా ఉన్న కార్యకర్తలకు, ముఖ్యంగా టీడీపీ శ్రేణులకు గాయాలయ్యాయి. ఇరు వర్గాలు పోటీపడి పెద్ద ఎత్తున నినాదాలు చేయడంతో నామినేషన్ కేంద్ర పరిసర ప్రాంతాలు హోరెత్తాయి.

అదుపులోకి తెచ్చిన పోలీసులు.. 
పరిస్థితి తీవ్రరూపం దాల్చడంతో పోలీసులు, అధికారులు అప్రమత్తమై ఎంపీ మిథున్ రెడ్డిని నామినేషన్ కేంద్రంలోని ఒక సురక్షిత గదిలోకి తరలించారు. అయితే, టీడీపీ శ్రేణులు ఆ గదిలోకి చొచ్చుకెళ్లేందుకు ప్రయత్నించడంతో ఎంపీ దాదాపు గంటసేపు ఆ గదిలోనే ఉండిపోవాల్సి వచ్చింది. అనంతరం పోలీసులు వెంటనే రంగంలోకి దిగి దాడులకు పాల్పడుతున్న ఇరువర్గాలను చెదరగొట్టారు. నామినేషన్ కేంద్రం వద్ద భారీ ఎత్తున పోలీసు బలగాలను మోహరించి పరిస్థితిని పూర్తి అదుపులోకి తెచ్చారు.

న్యాయపోరాటానికి వైసీపీ నిర్ణయం..
ఈ ఘర్షణల అనంతరం రెండు పార్టీల నాయకులు పరస్పరం తీవ్ర ఆరోపణలు గుప్పించుకున్నారు. తమ పార్టీ అభ్యర్థులను నామినేషన్లు వేయకుండా అడ్డుకోవడానికి టీడీపీ నేతలు అధికారాన్ని దుర్వినియోగం చేస్తున్నారని వైసీపీ తీవ్రంగా ఆరోపించింది. ఈ వరుస పరిణామాల దృష్ట్యా ఆన్‌లైన్ పద్ధతిలో నామినేషన్లు స్వీకరించాలని, ఎన్నికలు నిష్పాక్షికంగా జరిగేలా కేంద్ర బలగాల రక్షణ కేటాయించాలని వైసీపీ డిమాండ్ చేస్తోంది. ఈ అంశాలపై న్యాయపోరాటం కోసం హైకోర్టును ఆశ్రయించాలని ఆ పార్టీ నిర్ణయించింది.