బంగారం కొనాలా?.. ఆగాలా? తెలుగు రాష్ట్రాల్లో నేటి గోల్డ్ రేట్లు ఎలా ఉన్నాయంటే!

Gold Rate Today: దేశంలో బంగారం ధరలు రోజుకు తీరుగా మారుతున్నాయి. పశ్చిమాసియా ఉద్రిక్తలతో పెరుగుతున్న ద్రవ్యోల్బణం భయాలు, బంగారానికి డిమాండ్ పెరిగేలా చేస్తున్నాయి. డాలర్ బలపడటం.. బాండ్స్ పై రాబడులు పెరగడం కూడా ధరలను మరింత కిందకు లాగుతున్నాయి. ఫలితంగా ఒక రోజు ధరలు పెరుగుతుంటే.. మరుసటి రోజు భారీగా పడిపోతున్నాయి. నేడు అక్టోబర్ 2వ తేదీ హైదరాబాద్ బులియన్ మార్కెట్లో 24 క్యారెట్ల పది గ్రాముల బంగారం ధర రూ. 1,49, 230గా ఉంది. 22 క్యారెట్ల 10 గ్రాముల పసిడి ధర రూ. 1,36,790వద్ద ట్రేడ్ అవుతోంది. కిలో వెండి ధర రూ. 2,39,900పలుకుతోంది.

గత సంవత్సరం బంగారం ధరలు విపరీతంగా పెరగడంతో.. బంగారు ఆభరణాల కొనుగోళ్లు గణనీయంగా తగ్గాయి. ప్రత్యేకంగా చెప్పాలంటే.. గత సంవత్సరంతో పోలిస్తే బంగారం ధరలు సుమారు 70శాతం పెరిగాయి. ఫలితంగా, సామాన్య పౌరులు, మధ్యతరగతి ప్రజలు బంగారు ఆభరణాల కొనుగోళ్లను గణనీయంగా తగ్గించుకున్నారు. పెళ్లిళ్ల వంటి ముఖ్యమైన శుభకార్యాలు మినహా, బంగారు ఆభరణాలు కొనుగోలు చేసే వారి సంఖ్య గణనీయంగా తగ్గిపోయింది.

పండుగ సీజన్‌లో బంగారం అమ్మకాలు ఎలా ఉండే అవకాశం ఉంది?

బంగారం ధరలు కొద్దిగా తగ్గినందున.. వినియోగదారులు బంగారు ఆభరణాలు కొనుగోలు చేయడానికి ముందుకు రావచ్చని నిపుణులు అంచనా వేస్తున్నారు. 22 క్యారెట్ల బంగారం ధర ప్రస్తుతం రూ. 1.36 లక్షలుగా ఉంది. ఇది గత వారంతో పోలిస్తే తక్కువ. పండుగ సీజన్ సమీపిస్తుండటంతో, భారతీయులు బంగారు ఆభరణాలు కొనుగోలు చేయడానికి ఎక్కువ ఆసక్తి చూపుతున్నారు. ఫలితంగా, అమ్మకాలు పెరుగుతాయని నగల దుకాణాల యజమానులు ఆశాభావంతో ఉన్నారు. మరోవైపు, భవిష్యత్తులో బంగారం ధరలు పెరుగుతాయా లేదా తగ్గుతాయా అనే దానిపై చాలా మంది సందేహాలు వ్యక్తం చేస్తున్నారు.

బంగారం ధరలు తగ్గుతాయా లేదా పెరుగుతాయా?

భవిష్యత్తులో బంగారం ధరలు పెరిగే అవకాశం ఉంది. ముఖ్యంగా మనం అంతర్జాతీయ మార్కెట్‌ను పరిశీలిస్తే.. ఈ నెల చివరి వారంలో ఫెడరల్ రిజర్వ్ వడ్డీ రేట్లపై నిర్ణయం తీసుకునే అవకాశం ఉంది.  గత నెలలో.. ఫెడరల్ రిజర్వ్ వడ్డీ రేట్లను 0.25శాతం పెంచాలని నిర్ణయించింది. దీని కారణంగా, బంగారం ధరలు తీవ్రంగా పడిపోయాయి. ఇది కాకుండా.. యూఎస్ ట్రెజరీ బాండ్లపై రాబడి కూడా గరిష్ట స్థాయికి చేరుకుంది. ఇది కూడా బంగారం ధరలపై ప్రభావం చూపుతుందని అంచనా. యూఎస్ ట్రెజరీ బాండ్లపై రాబడి పెరిగితే, పెట్టుబడిదారులు బంగారం వంటి సురక్షిత పెట్టుబడుల నుండి తమ పెట్టుబడులను ఉపసంహరించుకోవచ్చు. దీని కారణంగా బంగారానికి డిమాండ్ తగ్గుతుందని భావిస్తున్నారు.