Dil Raju: పవన్ కళ్యాణ్ కాంబినేషన్‌పై దిల్ రాజు కీలక వ్యాఖ్యలు.. ఐదు సినిమాల లైనప్ ఇదే!

Dil Raju Movies lineup: నితేష్ తివారీ దర్శకత్వంలో రణబీర్ కపూర్, యశ్, సాయి పల్లవి ప్రధాన పాత్రల్లో తెరకెక్కిన రామాయణం ప్రపంచవ్యాప్తంగా భారీ విజయాన్ని అందుకుంది. ఈ సినిమా రూ.1000 కోట్లకు పైగా వసూళ్లు సాధించడం పట్ల దిల్ రాజు సంతోషం వ్యక్తం చేశారు. ఇలాంటి ప్రతిష్టాత్మక చిత్రాన్ని తెలుగు రాష్ట్రాల్లో విడుదల చేయడం తమకు ఎంతో గర్వంగా ఉందన్నారు. తమపై నమ్మకం ఉంచిన నిర్మాతలకు, నటుడు యశ్‌కు ప్రత్యేకంగా ధన్యవాదాలు తెలిపారు. మంచి, చెడుల మధ్య జరిగే పోరాటాన్ని అద్భుతంగా చూపించిన ఈ చిత్రాన్ని ప్రతి ఒక్కరూ చూడాలని ఆయన అభిప్రాయపడ్డారు. తెలుగు రాష్ట్రాల్లో కూడా ఈ సినిమా రూ.100 కోట్ల మార్కును చేరుకుంటుందనే నమ్మకాన్ని వ్యక్తం చేశారు.

ఇదే సమయంలో సూర్య నటించిన సీన్ సినిమా గురించి కూడా దిల్ రాజు ఆసక్తికరంగా మాట్లాడారు. ఈ చిత్ర తెలుగు హక్కులను తిరుపతి ప్రసాద్ కొనుగోలు చేయగా, తమ పంపిణీ సంస్థ ద్వారా ప్రేక్షకుల ముందుకు తీసుకొచ్చామని చెప్పారు. థియేటర్లలో సినిమా చూస్తున్నప్పుడు ప్రతి పది నిమిషాలకు ప్రేక్షకుల నుంచి విజిల్స్ వినిపించాయని తెలిపారు. ఒక స్టార్ హీరో ఉన్నప్పటికీ, బలమైన కథనం, అద్భుతమైన స్క్రీన్‌ప్లేతో దర్శకుడు జిత్తు మాధవన్ ప్రేక్షకులను ఆకట్టుకున్నారని ప్రశంసించారు. తక్కువ బడ్జెట్‌లో కూడా మంచి కథతో అద్భుతమైన సినిమాలు తీయవచ్చని సీన్ నిరూపించిందన్నారు.

మరోవైపు తన నిర్మాణ సంస్థలో రాబోయే సినిమాల గురించి కూడా దిల్ రాజు కీలక వివరాలు పంచుకున్నారు. పవన్ కళ్యాణ్‌తో ఒక సినిమా చేయాలనే ఆలోచన తనకు ఉందని, ఇప్పటికే ఈ విషయంపై ఆయనతో మాట్లాడే ప్రతిపాదనను ముందుంచినట్లు వెల్లడించారు. ఈ కాంబినేషన్ సెట్ అయితే ప్రేక్షకులకు మంచి సినిమాటిక్ అనుభూతిని అందిస్తామని చెప్పారు. అయితే దీనిపై పూర్తి స్పష్టత వచ్చిన తర్వాతే అధికారిక ప్రకటన ఉంటుందన్నారు.

ఇక బాలీవుడ్‌లో సల్మాన్ ఖాన్, అక్షయ్ కుమార్‌లతో రూపొందుతున్న సినిమాలు కూడా పనులు కొనసాగించుకుంటున్నాయి. అక్షయ్ కుమార్ సినిమా వచ్చే ఏడాది ఫిబ్రవరిలో, సల్మాన్ ఖాన్ చిత్రం ఈద్ సందర్భంగా విడుదల చేయాలని ప్లాన్ చేస్తున్నారు. వేణు దర్శకత్వంలో దేవిశ్రీ ప్రసాద్ హీరోగా నటిస్తున్న ఎల్లమ్మ సినిమాను మార్చి 5న విడుదల చేయాలని లక్ష్యంగా పెట్టుకున్నారు.

విజయ్ దేవరకొండతో రౌడీ జనార్దన, ఆశిష్ హీరోగా దేత్తడి చిత్రాలు కూడా నిర్మాణంలో ఉన్నాయి. దర్శకుడు అనిల్ రావిపూడితో మరో సినిమాను 2027లో ప్రారంభించి, 2028 సంక్రాంతికి విడుదల చేయాలని భావిస్తున్నట్లు తెలిపారు. మొత్తానికి రామాయణం, సీన్ విజయాలతో ఉత్సాహంగా ఉన్న దిల్ రాజు తన తదుపరి సినిమాల విషయంలోనూ భారీ ప్రణాళికలతో ముందుకు వెళ్తున్నారు.