Ramayana: రణబీర్ కపూర్ రామాయణం చూసి కన్నీళ్లు పెట్టుకున్న ఆలియా భట్ నాన్న..!
Ramayana: బాలీవుడ్‌లో ప్రస్తుతం అందరి దృష్టిని ఆకర్షిస్తున్న సినిమాల్లో 'రామాయణం' కూడా ఒకటి. దర్శకుడు నితేష్ తివారీ తెరకెక్కిస్తున్న ఈ సినిమాలో రణ్‌బీర్ కపూర్ శ్రీరాముడి పాత్రలో కనిపిస్తున్నారు. ఈ పాత్ర కోసం ఆయన ఎంతో కష్టపడుతున్నారు. ఇప్పటికే ఈ సినిమాపై ప్రేక్షకుల్లో భారీ అంచనాలు ఉన్నాయి. తాజాగా ఈ సినిమాను చూసిన ప్రముఖ బాలీవుడ్ దర్శకుడు మహేష్ భట్ తన అనుభవాన్ని పంచుకున్నారు. రణ్‌బీర్ నటన చూసి తాను కన్నీళ్లు పెట్టుకున్నానని చెప్పడం ఇప్పుడు చర్చనీయాంశంగా మారింది.
Ramayana: రణ్‌బీర్ కపూర్‌కు మహేష్ భట్ మామ అవుతారు. రణ్‌బీర్ భార్య అలియా భట్ ఆయన కుమార్తె. తాజాగా ఒక ఇంటర్వ్యూలో మహేష్ భట్ 'రామాయణం' సినిమా గురించి మాట్లాడారు. ముఖ్యంగా శ్రీరాముడు 14 సంవత్సరాల వనవాసానికి వెళ్లే సన్నివేశం తనను ఎంతగానో కదిలించిందని చెప్పారు.
ఆ సన్నివేశం చూస్తున్నప్పుడు తన గొంతు కూడా మూగబోయిందని, కన్నీళ్లు ఆపుకోవడానికి ప్రయత్నించినా సాధ్యం కాలేదని వెల్లడించారు. తన చుట్టూ ఉన్న యువ దర్శకులు, రచయితలకు తాను రణ్‌బీర్‌కు మామననే విషయం తెలుసని అన్నారు. అయినప్పటికీ సినిమా చూస్తున్నప్పుడు తన భావోద్వేగాలను దాచుకోలేకపోయానని తెలిపారు.
రణ్‌బీర్‌లో మరో నటుడిని చూశాను
శ్రీరాముడి పాత్రలో రణ్‌బీర్ చాలా సహజంగా కనిపించారని మహేష్ భట్ ప్రశంసించారు. ముఖ్యంగా రణ్‌బీర్ చేతులు జోడించి నమస్కరించే సన్నివేశం తనకు ప్రత్యేకంగా అనిపించిందన్నారు. ఇప్పటివరకు ఆయన చేసిన సినిమాలతో పోలిస్తే ఇందులో మరో కొత్త నటుడిని చూస్తున్నానని అభిప్రాయపడ్డారు.
అదే సమయంలో రావణుడి పాత్రలో నటిస్తున్న యశ్‌ను కూడా మహేష్ భట్ ప్రశంసించారు. యశ్ మాస్ ఇమేజ్‌ను దృష్టిలో పెట్టుకుని దర్శకుడు నితేష్ తివారీ ఆయన పాత్రను చాలా జాగ్రత్తగా రూపొందించారని చెప్పారు.
రణ్‌బీర్‌పై అలియా భట్ ప్రశంసలు
మరోవైపు రణ్‌బీర్ భార్య అలియా భట్ కూడా సోషల్ మీడియాలో స్పందించారు. కుమార్తె రాహాతో కలిసి రామాయణం సినిమా సెట్స్‌లో దిగిన ఫోటోలను పంచుకున్నారు. ఈ సినిమా కోసం రణ్‌బీర్ ఎంతో కష్టపడ్డారని, పని ఎంత బిజీగా ఉన్నా కుమార్తె కోసం సమయం కేటాయించారని ప్రశంసించారు.
దీంతో రణ్‌బీర్ నటనపై కుటుంబ సభ్యులు వ్యక్తం చేస్తున్న ప్రశంసలు ఇప్పుడు సోషల్ మీడియాలో వైరల్ అవుతున్నాయి.
