Aadarsha Kutumbam: ఆదర్శ కుటుంబం సినిమాలో పర్ణశాల పాట.. కాపీరైట్ వివాదంపై నిర్మాత వెంకట్ ఆవేదన

Aadarsha Kutumbam Copyright Controversy: 'పర్ణశాల’ సినిమాలోని ‘జిమ్ జిమ్ తార’ పాటను ‘ఆదర్శ కుటుంబం’ చిత్రంలో సుమారు 15 సెకన్ల పాటు ఉపయోగించారని నిర్మాత వెంకట్ తెలిపారు. ఈ పాటను ఆదిత్య మ్యూజిక్ ద్వారా అధికారికంగా విడుదల చేసినట్లు పేర్కొన్నారు.

తమ అనుమతి లేకుండా పాటను మరో సినిమాలో ఉపయోగించడం వల్ల ‘పర్ణశాల’ ప్రచారానికి నష్టం కలిగే అవకాశం ఉందని ఆయన ఆందోళన వ్యక్తం చేశారు. కష్టపడి రూపొందించిన పాటలను ఇతర సినిమాల్లో వాడేటప్పుడు సంబంధిత హక్కుల గురించి ఆలోచించాలని అన్నారు.

చిన్న సినిమాల నిర్మాతలు తమ చిత్రాలను ప్రేక్షకుల దగ్గరకు తీసుకెళ్లేందుకు ఎంతో కష్టపడతారు. ప్రచారం కోసం కూడా పరిమిత బడ్జెట్‌తో అనేక ప్రయత్నాలు చేస్తుంటారు. ఇలాంటి సమయంలో తమ సినిమాకు సంబంధించిన కంటెంట్‌ను అనుమతి లేకుండా ఉపయోగిస్తే ఎలా ముందుకు వెళ్లాలని వెంకట్ మంచి ప్రశ్నించారు.

చిన్న సినిమాల హక్కులను గౌరవించాలని, వాటిని కాపాడేందుకు అందరూ సహకరించాలని కోరారు. ఇకపై కూడా తమ అనుమతి లేకుండా పాటను ఉపయోగిస్తే చట్టపరమైన చర్యలు తీసుకుంటామని హెచ్చరించారు.

ఎస్‌ఎల్‌టీ ఫిలిమ్స్ బ్యానర్‌పై వెంకట్ మంచి నిర్మిస్తున్న ‘పర్ణశాల’ సినిమాకు వై.జి. భరత్ దర్శకత్వం వహిస్తున్నారు. ఈ చిత్రం హారర్ కామెడీ, సస్పెన్స్ థ్రిల్లర్ అంశాలతో రూపొందుతోంది.

ఈ సినిమా ప్రచారంలో భాగంగా ‘జిమ్ జిమ్ తార’ పాటను ప్రత్యేకంగా ప్రమోట్ చేశారు. లక్ష్మీదేవి వేషధారణలో పాటను పాడిస్తూ వినూత్నంగా ప్రేక్షకుల దృష్టిని ఆకర్షించారు. ఈ పాట సోషల్ మీడియాలో కూడా మంచి స్పందన పొందింది.

వెంకటేష్ హీరోగా నటించిన ‘ఆదర్శ కుటుంబం’ సినిమాకు త్రివిక్రమ్ శ్రీనివాస్ దర్శకత్వం వహించారు. శ్రీనిధి శెట్టి హీరోయిన్‌గా నటించారు. అక్టోబర్ 30న విడుదలైన ఈ చిత్రం ప్రస్తుతం థియేటర్లలో ప్రదర్శితమవుతోంది.

మరి ‘జిమ్ జిమ్ తార’ పాట వినియోగంపై వస్తున్న ఆరోపణలకు ‘ఆదర్శ కుటుంబం’ చిత్ర బృందం ఎలా స్పందిస్తుందో చూడాలి. ఈ వివాదం చిన్న సినిమాల కాపీరైట్ హక్కులపై మరోసారి చర్చకు దారితీసింది.

Also Read: 

అన్ని బంధాల కన్నా రక్త సంబంధమే బలమైందని.. స్వార్థంతో జీవించే వారికి నష్టం తప్పదని చెబుతున్న అన్నదమ్ముల నీతికథ..!!