అమెరికా, ఇరాన్ల మధ్య మళ్లీ వార్.. ఖేష్మ్ దీవిపై దాడి..
America Iran again Attacks: గత కొద్ది రోజుల పాటు నివురు గప్పిన నిప్పులా ఉన్న పశ్చిమాసియాలో మళ్లీ అమెరికా, ఇరాన్ల మధ్య మళ్లీ భగ్గుమంది. తాజాగా, హర్మూజ్ జలసంధిలోని ఇరాన్కు చెందిన ఖేష్మ్ ద్వీపంపై అమెరికా పలు దాడులకు పాల్పడిందని ఒక స్థానిక ఇరాన్ అధికారి మంగళవారం తెలిపారు.
Iran Vs America: ముఖ్యంగా బహ్రెయిన్లోని అమెరికా స్థావరాలను ఇరాన్ లక్ష్యంగా చేసుకున్న కొద్దిసేపటికే ఈ దాడులు జరిగాయి. గత నాలుగు రోజుల్లో బహ్రెయిన్పై ఇరాన్ దాడి చేయడం ఇది మూడోసారి. అమెరికా దాడి వల్ల ఎలాంటి నష్టం జరగలేదని ఇరాన్ తెలిపింది.
ఇరాన్లో అత్యంత కీలకమైన ఖేష్మ్ ద్వీపంలోని ప్రాంతాలపై అమెరికా జరిపిన దాడి వల్ల నివాస, వాణిజ్య, లేదా మౌలిక సదుపాయాల ప్రాంతాలకు ఎలాంటి నష్టం జరగలేదని హోర్మోజ్గాన్ దక్షిణ ప్రావిన్స్ డిప్యూటీ ప్రావిన్షియల్ గవర్నర్ అహ్మద్ నఫీసీని ఉటంకిస్తూ అధికారిక ఐఆర్ఎన్ఏ వార్తా సంస్థ పేర్కొంది. ఖేష్మ్ ద్వీపంలో పరిస్థితి అదుపులో ఉంది.. అన్ని సహాయక, సేవా, కార్యనిర్వాహక సంస్థలు పూర్తి అప్రమత్తతతో ఉన్నాయని IRGC తెలిపింది. ఖేష్మ్ ద్వీపం ఇరాన్ గుండె కాయ వంటిది. ఇక్కడే వాళ్ల ఆయిల్ నిల్వలకు సంబంధించిన అన్ని గౌడౌన్స్ ఉన్నాయి.
ఐఆర్ఎన్ఏ వార్తా సంస్థ ప్రకారం.. మంగళవారం సాయంత్రం ఖేష్మ్లో కనీసం ఐదు లేదా ఆరు పేలుళ్లు వినిపించాయి. దీనికి ముందు బహ్రెయిన్లోని ఒక అమెరికా రాడార్ వ్యవస్థపై డ్రోన్లతో దాడి చేసినట్లు ఇరాన్ రివల్యూషనరీ గార్డ్స్ వెల్లడించారు. ‘‘బహ్రెయిన్లోని షేక్ ఇసా ఎయిర్ బేస్లో అమెరికా దళాలు నిర్వహిస్తున్న రాడార్ వ్యవస్థను లక్ష్యంగా చేసుకుని, రివల్యూషనరీ గార్డ్స్కు చెందిన వార్ డ్రోన్లు ఈ ఉదయం ఒక కచ్చితమైన ఆపరేషన్ నిర్వహించాయి’’ అని ఉన్నత శ్రేణి గార్డ్స్ నడుపుతున్న 'సెపా' వార్తా వెబ్సైట్ తెలిపింది. ‘అమెరికా సైనిక డ్రోన్లు ఇరాన్ గగనతలాన్ని పదేపదే ఉల్లంఘించడానికీ’ ప్రతిస్పందనగా ఈ దాడి జరిగిందని కూడా అది పేర్కొంది.
గత కొన్ని వారాలుగా ఇరాన్, అమెరికాల మధ్య పరస్పర దాడులు నెమ్మదిగా మొదలవుతున్నాయి. నవంబర్ 2న హర్మూజ్ జలసంధిలోని కీలకమైన ద్వీపంపై అమెరికా దాడి చేసింది. ఈ ఏడాది ఫిబ్రవరిలో అమెరికా-ఇరాన్ యుద్ధం ప్రారంభమైనప్పటి నుంచి తాము నిర్దేశించిన మార్గాల్లో మాత్రమే నౌకలు ప్రయాణించాలని స్పష్టం చేసిన ఇరాన్.. హర్మూజ్ జలసంధి గుండా రాకపోకలను నియంత్రించేందుకు ప్రయత్నిస్తోంది. తమ ఆదేశాలను పాటించని నౌకలపై దాడులను ముమ్మరం చేస్తోంది.