Shreyas Iyer Gill Rankings: ఐసీసీ ర్యాంకింగ్స్‌లో టీమ్ఇండియా హవా..టాప్‌ గేరులో దూసుకెళ్తున్న శ్రేయస్ అయ్యర్, శుభ్‌మన్ గిల్!

Shreyas Iyer Gill ICC Rankings: లక్నో వేదికగా వెస్టిండీస్‌తో జరిగిన తొలి టీ20 మ్యాచ్‌లో భారత టీ20 కెప్టెన్ శ్రేయస్ అయ్యర్ అద్భుత ఇన్నింగ్స్ ఆడి జట్టుకు 8 వికెట్ల తేడాతో విజయాన్ని అందించారు. ఆయన కేవలం 43 బంతుల్లో 10 ఫోర్లు, 6 సిక్సర్లతో అజేయంగా 102 పరుగులు సాధించారు. ఈ మెరుపు శతకంతో శ్రేయస్ ఐసీసీ టీ20 బ్యాటింగ్ ర్యాంకింగ్స్‌లో ఏకంగా 18 స్థానాలు ఎగబాకి, తన కెరీర్‌లోనే అత్యుత్తమంగా 7వ స్థానానికి చేరుకున్నారు. 

ప్రస్తుతం టీ20 బ్యాటింగ్ జాబితాలో ఇషాన్ కిషన్ మొదటి స్థానంలో కొనసాగుతుండగా, అభిషేక్ శర్మ రెండో స్థానంలో ఉన్నారు. తిలక్ వర్మ 10వ స్థానంలో నిలవడంతో టీ20 టాప్ - 10 బ్యాటర్లలో నలుగురు భారతీయులే చోటు దక్కించుకోవడం విశేషం.

శుబ్‌మన్ గిల్ ఆధిపత్యం..
వన్డే ఫార్మాట్‌లో భారత కెప్టెన్ శుబ్‌మన్ గిల్ తన అగ్రస్థానాన్ని మరింత సుస్థిరం చేసుకున్నారు. గువాహటిలో వెస్టిండీస్‌తో జరిగిన రెండో వన్డే విజయవంతమైన ఛేదనలో గిల్ అజేయంగా 223 పరుగులు చేసి తన కెరీర్‌లో రెండో ద్విశతకాన్ని నమోదు చేశారు. ఈ ఇన్నింగ్స్‌తో ఆయన కెరీర్ బెస్ట్ 841 రేటింగ్ పాయింట్లను సాధించారు.

అదే వన్డే సిరీస్‌లోని మూడో మ్యాచ్‌లో 129 పరుగులతో అజేయ శతకం బాదిన వికెట్ కీపర్ బ్యాటర్ కేఎల్ రాహుల్ 7 స్థానాలు మెరుగుపరుచుకుని తిరిగి టాప్ - 10లోకి ప్రవేశించారు. ఈ సిరీస్‌ను భారత్ 2 - 1 తేడాతో కైవసం చేసుకుంది. కాగా, మాజీ కెప్టెన్ విరాట్ కోహ్లీ ఒక స్థానం పడిపోయి మూడో ర్యాంకుకు చేరుకున్నారు

బౌలింగ్ విభాగంలో రషీద్ ఖాన్, అక్షర్ పటేల్ సత్తా..
టీ20 బౌలింగ్ విభాగంలో ఆఫ్ఘనిస్థాన్ లెగ్ స్పిన్నర్ రషీద్ ఖాన్ పాకిస్థాన్‌కు చెందిన అబ్రార్ అహ్మద్‌ను వెనక్కి నెట్టి 8వ సారి నంబర్-1 స్థానాన్ని దక్కించుకున్నారు. భారత స్పిన్ ఆల్ - రౌండర్ అక్షర్ పటేల్ గత మూడు మ్యాచ్‌ల్లో నిలకడగా రాణించి 16 స్థానాలు ఎగబాకి 7వ ర్యాంకుకు చేరుకున్నారు.

ఇతర ఆటగాళ్లలో 15 ఏళ్ల యువ ఓపెనర్ వైభవ్ సూర్యవంశీ 46వ స్థానానికి చేరగా, పాకిస్థాన్ ఆటగాడు హసన్ నవాజ్ 48వ స్థానాన్ని దక్కించుకున్నారు. వెస్టిండీస్ వన్డే కెప్టెన్ షాయ్ హోప్ 6వ ర్యాంకును, జేడెన్ సీల్స్ 10వ ర్యాంకును సాధించి వన్డేల్లో టాప్-10లో నిలిచారు.