Students Organic Farming: సర్కారు బడిలో చదువు.. తోటలో వ్యవసాయం.. ఆదర్శంగా ఫత్తేపూర్ స్కూల్..!

Students Organic Farming: సాధారణంగా ఏ బడిలోనైనా చదువు, పరీక్షలు, ఆటలు మాత్రమే ఉంటాయి. ప్రభుత్వ పాఠశాలల పట్ల సమాజంలో ఉన్న అపోహలను తిప్పికొడుతోంది మహబూబ్‌నగర్ రూరల్ మండలం ఫత్తేపూర్ గ్రామంలోని ZP ఉన్నత పాఠశాల. ఇక్కడ చదివే 153 మంది విద్యార్థులకు చదువుతో పాటు వ్యవసాయంపై కూడా పూర్తి అవగాహన కల్పిస్తున్నారు. ఉపాధ్యాయుల ప్రోత్సాహంతో గత మూడేళ్లుగా విద్యార్థులే స్వయంగా తమ బడి ఆవరణలో బీర, వంకాయ, టమాట, పచ్చిమిర్చి వంటి కూరగాయలను సేంద్రియ పద్ధతిలో పండిస్తున్నారు."

పాఠశాల ఆవరణలో పండిన  తాజా కూరగాయలను పిల్లలకు  మధ్యాహ్న భోజనంలోనే ఉపయోగిస్తున్నారు. దీనివల్ల విద్యార్థులకు పోషకాహారం అందడమే కాకుండా... చిన్నతనంలోనే రైతుల కష్టనష్టాల గుర్తించి తెలుస్తోందని ప్రధానోపాధ్యాయురాలు వెంకటమ్మ గర్వంగా చెబుతున్నారు. అంతేకాదు.. ఈ బడిలో ఒక మంచి ఆనవాయితి కొనసాగుతోంది! సాధారణంగా పుట్టినరోజు నాడు చాక్లెట్లు పంచడం అలవాటు. కానీ ఇక్కడి పిల్లలు చాక్లెట్లకు స్వస్తి చెప్పారు! ప్రతి విద్యార్థి తన పుట్టినరోజున బడికి ఒక పూలమొక్క, కుండీ తీసుకెళ్లి నాటుతారు. ఆ మొక్కలపై విద్యార్థుల పేర్లు రాసి ఉంచుతారు. దీనివల్ల బడి పచ్చదనంతో కళకళలాడటమే కాకుండా...తమ జ్ఞాపకాలు ఎప్పటికీ బడిలో నిలిచిపోతాయని పిల్లలు సంతోషంగా చెబుతున్నారు.

ఫత్తేపూర్ పాఠశాల ఆవరణ అంతా ఇప్పుడు కూరగాయలు, పూలతోటలతో పచ్చని వనంలా కనువిందు చేస్తోంది. వ్యవసాయ కుటుంబాల నుంచి వచ్చిన విద్యార్థులకు ఈ అనుభవం భవిష్యత్తులో ఎంతో ఉపయోగపడుతుందని ఉపాధ్యాయులు రాము, జగదీష్ అంటున్నారు. చేసే పనిలో కొంత నిబద్ధత, బాధ్యత ఉంటే ఏ ప్రభుత్వ బడి అయినా ఒక ఆదర్శ పాఠశాలగా మారుతుందనడానికి ఈ ఫత్తేపూర్ హైస్కూలే నిదర్శనం!. పట్టుదల ఉండాలే గానీ, ప్రభుత్వ బడుల రూపురేఖలనే మార్చవచ్చని ఫత్తేపూర్ స్కూల్ ఉపాధ్యాయులు, విద్యార్థులు నిరూపించారు. ఇతర ప్రభుత్వ పాఠశాలలకు కూడా ఈ బడి ఒక ఆదర్శంగా నిలుస్తోంది.