సింగిల్ టీచర్ పాఠశాలల్లో నాణ్యమైన విద్య ప్రశ్నార్థకం.. ప్రభుత్వ ఉపాధ్యాయుల తీవ్ర ఆవేదన..!!

Single Teacher: తెలంగాణ రాష్ట్రంలోని ప్రాథమిక విద్యా వ్యవస్థ తీవ్ర సంక్షోభంలో కూరుకుపోతోంది. పాఠశాలల్లో ఉపాధ్యాయుల కొరత కారణంగా విద్యాబోధన పూర్తిగా దెబ్బతింటోందని ప్రభుత్వ టీచర్లు తీవ్ర వేదన వ్యక్తం చేస్తున్నారు. ముఖ్యంగా UDISE+ 2025-26 గణాంకాల ప్రకారం రాష్ట్రవ్యాప్తంగా 4,793 ప్రాథమిక పాఠశాలలు కేవలం ఒక్క ఉపాధ్యాయుడితోనే నడుస్తుండటంతో క్షేత్రస్థాయిలో బోధన సాగక ఉపాధ్యాయులు తీవ్ర మానసిక ఒత్తిడికి గురవుతున్నారు. పాఠశాలల నిర్వహణ భారమంతా ఒక్కరిపైనే పడటంతో విద్యార్థులకు అందాల్సిన ప్రాథమిక హక్కు అయిన ఉచిత, నాణ్యమైన విద్య దూరమవుతోందని టీచర్లు ఆవేదన చెందుతున్నారు.

బోధనతో పాటు అదనపు బాధ్యతల భారం:
ఒకే ఉపాధ్యాయుడు 1 నుండి 5వ తరగతి వరకు ఉన్న విద్యార్థులందరికీ తెలుగు, ఇంగ్లీషు, గణితం, పరిసరాల విజ్ఞానం వంటి అన్ని సబ్జెక్టులను ఒకే సమయంలో బోధించాల్సి రావడం అసాధ్యంగా మారుతోంది. దీనికి తోడు రోజువారీ బోధనే కాకుండా పాఠశాల రికార్డుల నిర్వహణ, విద్యార్థుల నోట్‌బుక్స్ దిద్దడం, మధ్యాహ్న భోజన పథకం పర్యవేక్షణ మరియు ప్రధానోపాధ్యాయుడి (HM) విధులను కూడా ఆ ఒక్కరికే అప్పగించడం వల్ల బోధనపై శ్రద్ధ చూపలేకపోతున్నారు. ఉపాధ్యాయుడు వ్యక్తిగత అత్యవసర కారణాలతో లేదా అనారోగ్యంతో సెలవుపై వెళ్లినప్పుడు పాఠశాలలు పూర్తిగా మూతపడే భయంకరమైన పరిస్థితి నెలకొంటోంది. దీనివల్ల ప్రాథమిక స్థాయిలో పిల్లలకు అందాల్సిన అక్షరాస్యత, సంఖ్యా జ్ఞానం (FLN) వంటి పునాది నైపుణ్యాలు పూర్తిగా దెబ్బతింటున్నాయని ఉపాధ్యాయ వర్గాలు తీవ్ర ఆందోళన వ్యక్తం చేస్తున్నాయి.

దేశవ్యాప్త గణాంకాలు - ఉపాధ్యాయుల విజ్ఞప్తి:
కేవలం తెలంగాణలోనే కాకుండా దేశవ్యాప్తంగా 1,00,843 ఏకోపాధ్యాయ పాఠశాలలు ఉండగా, అందులో దాదాపు 29.12 లక్షల మంది విద్యార్థులు నాణ్యమైన విద్యకు దూరమవుతున్నారని గణాంకాలు స్పష్టం చేస్తున్నాయి. ఈ తీవ్రమైన సమస్యకు శాశ్వత పరిష్కారం చూపి, ప్రతి ప్రాథమిక పాఠశాలలో కనీసం ఇద్దరు ఉపాధ్యాయులు లేదా విద్యా వాలంటీర్లను నియమించేలా చర్యలు తీసుకోవాలని కోరుతూ ఆదిలాబాద్ పార్లమెంట్ సభ్యుడు గోడం నగేష్‌కు ఉపాధ్యాయ సంఘాల ప్రతినిధి కలవల శంకర్ విజ్ఞప్తి పత్రం సమర్పించారు. ఎంపీ గోడం నగేష్ గారు స్వయంగా ఆదిలాబాద్ జిల్లాలో ఉపాధ్యాయుడిగా పనిచేసిన అనుభవం ఉన్నవారు కావడంతో తమ సమస్యలను లోతుగా అర్థం చేసుకోగలరని టీచర్లు ఆశిస్తున్నారు.

ప్రభుత్వాల సత్వర చర్యలకు డిమాండ్:
ఈ విద్యా సంవత్సరంలోనే రాష్ట్రంలోని 4,793 సింగిల్ టీచర్ పాఠశాలల్లో కనీసం ఇద్దరు ఉపాధ్యాయులను ఉండేలా చూడాలని లేదా శాశ్వత నియామకాలు జరిగే వరకు తక్షణమే విద్యా వాలంటీర్లను నియమించేలా తెలంగాణ ముఖ్యమంత్రి రేవంత్ రెడ్డి దృష్టికి ఈ అంశాన్ని తీసుకెళ్లాలని ఉపాధ్యాయులు కోరారు. అదేవిధంగా విద్యాహక్కు చట్టం (RTE-2009)లో తగిన సవరణలు చేసి, ఏ బడిలోనూ సింగిల్ టీచర్ లేకుండా చట్టబద్ధం చేయడంతో పాటు సమగ్ర శిక్షా నిధులను బలోపేతం చేసేలా ప్రధాని మోదీ దృష్టికి తీసుకెళ్లాలని ఎంపీని ప్రత్యేకంగా కోరారు.

Also Read: 

వంటగది నుంచి వ్యాపారం దాకా.. స్ట్రీట్ ఫుడ్ రంగంలో సంచలనం సృష్టిస్తున్న బిహార్ మహిళలు..!!