Netanyahu Elections: ఇజ్రాయెల్ ఎన్నికల్లో ప్రధాని నెతన్యాహుకు బిగ్ షాక్..మెజారిటీ సాధించడంలో విఫలం..రాజీనామా చేస్తారా?

Netanyahu Israel Elections: ఇజ్రాయెల్ పార్లమెంట్ (నెసెట్)లో మొత్తం 120 సీట్లు ఉండగా, నూతన ప్రభుత్వాన్ని ఏర్పాటు చేయడానికి 61 స్థానాలు మ్యాజిక్ ఫిగర్గా ఉన్నాయి. ఈ ఎన్నికలలో ప్రధాని బెంజమిన్ నెతన్యాహు నేతృత్వంలోని అధికార కూటమి 54 స్థానాలు మాత్రమే గెలుచుకుని, మెజారిటీకి ఇంకా 7 సీట్ల దూరంలో నిలిచిపోయింది. 

మరోవైపు మాజీ మిలటరీ చీఫ్ ఐసెన్‌కోట్ నేతృత్వంలోని ప్రధాన విపక్ష కూటమి 48 సీట్లు దక్కించుకోగా, అరబ్ పార్టీలు 18 స్థానాల్లో విజయం సాధించాయి. ఏ కూటమికి స్పష్టమైన ఆధిక్యం రాకపోవడంతో, రాబోయే సంకీర్ణ ప్రభుత్వ ఏర్పాటులో అరబ్ పార్టీలు కీలక నిర్ణయాత్మక శక్తిగా అవతరించే అవకాశం కనిపిస్తోంది.

అరబ్ పార్టీలపై తీవ్రస్థాయి ఆరోపణలు
ఎన్నికల ఫలితాల అనంతరం నెతన్యాహు నేతృత్వంలోని లికుడ్ పార్టీ ఎన్నికల ప్రక్రియపై తీవ్రస్థాయిలో మండిపడింది. అరబ్ పార్టీలు అవినీతి, భౌతిక దాడులు, ఓటర్లను బెదిరించడం, నిషేధిత సాఫ్ట్‌వేర్లను ఉపయోగించడం ద్వారా ఓటింగ్‌ను తీవ్రంగా ప్రభావితం చేశాయని ఆరోపించింది. అలాగే ఓటర్లను ఆకర్షించేందుకు నగదుతో కూడిన వేలాది కవర్లను, రామ్ (Raam) పార్టీ బ్యాలెట్లను పంపిణీ చేశారని వెల్లడిస్తూ, దీనికి సంబంధించిన ఆధారాలను దర్యాప్తు అధికారులకు సమర్పించింది.

అధికారుల స్పందన, అరెస్టులు
ఓటింగ్ ప్రారంభమైన మంగళవారం నుంచే నెతన్యాహు ఈ అక్రమాలపై బహిరంగంగా ఆరోపణలు చేయడం ప్రారంభించారు. ఈ ఘటనలపై సెంట్రల్ ఎలక్షన్ కమిటీ డైరెక్టర్ జనరల్ డీన్ లివ్నే స్పందిస్తూ.. ఇవి అత్యంత అసాధారణ పరిణామాలని వ్యాఖ్యానించారు. 

పోలింగ్ ప్రారంభానికి ముందే లంచాలు ఇవ్వడానికి ప్రయత్నించిన పలువురు అనుమానితులను పోలీసులు అరెస్ట్ చేశారని, వారి నుంచి వేలాది కవర్లతో పాటు దాదాపు 24,000 షెకెళ్లను స్వాధీనం చేసుకున్నారని అధికారుల తరఫున ధ్రువీకరించారు.

ఎన్నికల ప్రచారం అంతటా ఇజ్రాయెల్ ప్రధానమంత్రి నెతన్యాహు అరబ్ పార్టీల ఉనికిని ప్రస్తావిస్తూ, తమ మద్దతుదారులను పెద్ద సంఖ్యలో తరలిరావాలని పిలుపునిచ్చినప్పటికీ కావలసిన సీట్లు రాకపోవడంతో ప్రభుత్వం ఏర్పాటుపై తీవ్ర అనిశ్చితి నెలకొంది. అరబ్ పార్టీలతో కలిసి సంకీర్ణ ప్రభుత్వాన్ని ఏర్పాటు చేసే ప్రసక్తే లేదని, వారితో కలిసి పనిచేయబోనని నెతన్యాహు స్పష్టం చేశారు. 

అరబ్బుల భాగస్వామ్యంతో ఏర్పడే ప్రభుత్వం దేశానికి ప్రమాదకరమని ఆయన హెచ్చరించారు. కాగా, నెతన్యాహు ప్రధాన ప్రత్యర్థి ఐసెన్‌కోట్ మాత్రం కొన్ని షరతులకు లోబడి అరబ్ పార్టీలతో భాగస్వామ్యానికి తలుపులు తెరిచి ఉంచడం గమనార్హం.