తెలంగాణలో 50 డిగ్రీలకు చేరనున్న ఎండలు? రైతులకు మంత్రి తుమ్మల కీలక హెచ్చరిక!

Telangana Summer Alert: రాష్ట్రవ్యాప్తంగా వాతావరణ మార్పులు తీవ్ర సంక్షోభానికి దారి తీసే పరిస్థితులు కనిపిస్తున్నాయి.  అంతర్జాతీయంగా విస్తరిస్తున్న సూపర్  ఎల్ నినో ప్రభావం ఈసారి వేసవిలో తీవ్ర రూపం దాల్చబోతున్నట్లు.. ఎండల తీవ్రత ఏకంగా 50 డిగ్రీల సెల్సియస్ దాటే ప్రమాదం ఉందని రాష్ట్ర వ్యవసాయ శాఖ మంత్రి తుమ్మల నాగేశ్వరరావు తీవ్ర ఆందోళన వ్యక్తం చేశారు. వర్షాభావ పరిస్థితుల కారణంగా భూగర్భ జల మట్టాలు పాతాళానికి పడి పడిపోయాయని.. జీవనది గోదావరి సైతం నీరు లేక వెలవెలబోతోందని ఆయన స్పష్టం చేశారు..

భద్రాద్రి కొత్తగూడెం జిల్లా అశ్వంతపురం మండలంలోని అమ్మగారిపల్లి వద్ద ఉన్న గోదావరి ఆనకట్టను మంత్రి స్వయంగా పరిశీలించారు. ఈ సందర్భంగా ఆయన మాట్లాడుతూ.. ప్రస్తుతం వాతావరణ పరిస్థితులు రైతులకు గడ్డు కాలాన్ని సూచిస్తున్నాయన్నారు.. ఎగువ ప్రాంతాల నుంచి ఆశించిన మేర వరద రాకపోవడంతో పాటు వర్షాలు లేకపోవడంతో గోదావరి బేసిన్‌లో తీవ్ర నీటి ఎద్దడి ఏర్పడిందని ఆయన అన్నారు..

నదుల్లో నీరు లేకపోవడంతో పాటు జలాశయాలు అడుగంటి పోవడంతో, భూగర్భ జలాలు దారుణంగా పడిపోవడమే కాకుండా విద్యుత్ ఉత్పత్తి కూడా గణనీయంగా తగ్గే అవకాశం ఉందని మంత్రి పేర్కొన్నారు. ఇలాంటి విపత్కర పరిస్థితుల్లో రైతులు విస్తారంగా నీరు అవసరమయ్యే వారి పంట వైపు మొగ్గుచూపడం తీవ్ర నష్టాలకు దారితీస్తుందని ఆయన హెచ్చరించారు.  రైతాంగం ప్రస్తుత పరిస్థితిని దృష్టిలో ఉంచుకొని.. తక్కువ నీటితో పండే ఆరుతడి తో పాటు ప్రత్యామ్నాయక్ పంటలను మాత్రమే సాగు చేయాలని ఆయన పేర్కొన్నారు. పంటల ప్రణాళికలో మార్పులు చేసుకోకపోతే పెట్టుబడును సైతం దక్కే అవకాశం ఉండదని ఆయన స్పష్టం చేశారు..

రాబోయే కఠిన వేసవిని దృష్టిలో ఉంచుకొని ప్రజలకు తాగునీటి ఇబ్బందులు తలెత్తకుండా ప్రభుత్వం ముందస్తు చర్యలు చేపడుతూ ఉందని తుమ్మల నాగేశ్వరరావు వెల్లడించారు. ముఖ్యమంత్రి రేవంత్ రెడ్డి ఆదేశాల మేరకు దుమ్ముగూడెం ఆనకట్ట వద్ద యుద్ద ప్రాతిపదికన ఏర్పాట్లు చేస్తున్నట్లు తెలిపారు. కట్టపై ఇసుక బస్తాలు పేర్చి సుమారు ఒక టీఎంసీ నీటిని నిల్వ ఉంచేలా అత్యవసర పనులు చేపట్టాలని అధికారులను ఆదేశించినట్లు వివరించారు. ఈ నిల్వ నీరు వేసవికాలంలో స్థానిక ప్రజలకు.. చుట్టుపక్కల ప్రాంతాలకు తాగునీటి అవసరాలను తీర్చడానికి ఎంతగానో ఉపయోగపడుతుందని మంత్రి భరోసా ఇచ్చారు. ప్రకృతి విపత్తును ఎదుర్కొనేందుకు ప్రజలతో పాటు రైతాంగం ప్రభుత్వంతో సహకరించాలని ఆయన కోరారు..