TGSRTC Weekly Pass: పండగపూట ప్రయాణికులకు ఆర్టీసీ వరం..రూ.600కే 7 రోజుల పాటు ఏసీ బస్సుల్లో ప్రయాణం అన్‌లిమిటెడ్!

TGSRTC AC Bus Weekly Pass: రూ.600కే వారం రోజుల అపరిమిత ప్రయాణం హైదరాబాద్ మహానగరంలో బస్సుల్లో రాకపోకలు సాగించే సాధారణ పౌరులకు, ఉద్యోగులకు మరింత సౌకర్యవంతమైన, చౌకైన ప్రయాణాన్ని అందించే లక్ష్యంతో టీజీఎస్ ఆర్టీసీ ఈ సరికొత్త వీక్లీ పాస్‌ను ప్రవేశపెట్టింది. 

ప్రయాణికులు కేవలం రూ.600 రుసుము చెల్లించి ఈ పాస్ పొందితే, ఏడు రోజుల పాటు గ్రేటర్ హైదరాబాద్ పరిధిలోని అన్ని అర్హత గల సిటీ బస్సుల్లో ఎన్నిసార్లయినా ప్రయాణించవచ్చు. సాధారణ సర్వీసులతో పాటు ఏసీ సిటీ బస్సుల్లోనూ ప్రయాణించే వెసులుబాటు కల్పించడం ఇందులో ప్రధాన విశేషం. అయితే, శంషాబాద్ విమానాశ్రయానికి నడిచే పుష్పక్ ఎయిర్‌పోర్ట్ లైనర్ బస్సులకు మాత్రం ఈ రాయితీ వర్తించదు.

సమయం, ప్రయాణ ఖర్చులకు చెక్ ఉద్యోగాలు, వ్యాపార పనుల కోసం నగరానికి వచ్చే సందర్శకులు లేదా స్వల్పకాలిక పర్యాటకులు ప్రతి ట్రిప్పుకు విడివిడిగా టికెట్లు కొనుగోలు చేయాల్సి రావడం వల్ల ప్రయాణ ఖర్చులు పెరగడమే కాకుండా విలువైన సమయం వెచ్చించాల్సి వస్తుంది. ఈ సమస్యను నివారించేందుకు ఈ వీక్లీ పాస్ ఎంతగానో తోడ్పడుతుంది. 

ముఖ్యంగా ఒక ప్రాంతం నుంచి మరొక ప్రాంతానికి చేరుకోవడానికి తరచూ బస్సులు మారే వారికి ఇది ఎంతో ప్రయోజనకరంగా ఉంటుంది. ఇప్పటికే ఆర్టీసీ అందిస్తున్న రోజువారీ (డైలీ), నెలవారీ (మంత్లీ) బస్ పాసులకు అదనంగా ఈ వారపు పాస్ సదుపాయం అందుబాటులోకి వచ్చింది.

కౌంటర్లలో లభ్యత - ఆర్టీసీ పిలుపు 
ఈ రూ.600 వీక్లీ బస్ పాస్‌లు గ్రేటర్ హైదరాబాద్‌లోని అన్ని సిటీ బస్ పాస్ కౌంటర్లలో లభిస్తాయని ఆర్టీసీ స్పష్టం చేసింది. ఆసక్తి కలిగిన వారు తమ సమీప కౌంటర్‌ను సంప్రదించి ఈ పాస్‌ను కొనుగోలు చేయవచ్చు. 

నగర ప్రజలకు అందుబాటు ధరల్లో మెరుగైన ప్రజా రవాణా వ్యవస్థను చేరువ చేయడమే తమ ప్రధాన లక్ష్యమని టీజీఎస్ ఆర్టీసీ వైస్ ఛైర్మన్, మేనేజింగ్ డైరెక్టర్ వై. నాగిరెడ్డి పేర్కొన్నారు. నగరంలో వారం రోజుల పాటు ప్రయాణించే ప్రతి ఒక్కరూ ఈ అవకాశాన్ని వినియోగించుకోవాలని ఆయన సూచించారు.