Vikarabad Anganwadi Jobs: తెలంగాణలో అంగన్‌వాడీ పోస్టులకు ఆఖరి ఛాన్స్! 264 ఉద్యోగాలు, రెండే రోజులు గడువు!

Vikarabad Anganwadi Jobs 2026: తెలంగాణ రాష్ట్రంలోని వికారాబాద్ జిల్లా వ్యాప్తంగా ఉన్న అంగన్‌వాడీ కేంద్రాలలో ఈ నియామకాలు చేపట్టనున్నారు. మొత్తం 264 ఖాళీలలో 102 అంగన్‌వాడీ టీచర్ పోస్టులు, 162 అంగన్‌వాడీ ఆయా పోస్టులు ఉన్నాయి. ఈ పోస్టులను జిల్లా పరిధిలోని కోడంగల్, మర్పల్లి, పరిగి, తాండూరు, వికారాబాద్ ఐసీడీఎస్ ప్రాజెక్టుల వారీగా భర్తీ చేయనున్నారు.

ప్రాజెక్టుల వారీగా ఖాళీల వివరాలు..
పరిగి ప్రాజెక్టు కింద 27 టీచర్, 78 ఆయా పోస్టులు (మొత్తం 105) పోస్టులు ఖాళీగా ఉన్నాయి. అలాగే తాండూరు ప్రాజెక్టులో 23 టీచర్, 28 ఆయా పోస్టులు (మొత్తం 51)..  కోడంగల్ ప్రాజెక్టులో 13 టీచర్, 31 ఆయా పోస్టులు (మొత్తం 44).. మర్పల్లి ప్రాజెక్టులో భాగంగా 21 టీచర్, 14 ఆయా పోస్టులు (మొత్తం 35) ఉన్నాయి. చివరిగా వికారాబాద్ ప్రాజెక్టులో భాగంగా 18 టీచర్, 11 ఆయా పోస్టులు (మొత్తం 29) భర్తీ చేయనున్నారు.

విద్యార్హతలు, ఎంపిక ప్రక్రియ..
ఈ పోస్టులకు దరఖాస్తు చేసే అభ్యర్థులు తప్పనిసరిగా ఇంటర్మీడియట్ (12వ తరగతి) ఉత్తీర్ణులై ఉండాలి. అయితే, అంగన్‌వాడీ ఆయా (హెల్పర్) పోస్టులకు ఇంటర్మీడియట్ అర్హత కలిగిన అభ్యర్థులు అందుబాటులో లేని పక్షంలో పదో తరగతి ఉత్తీర్ణులైన వారిని పరిగణనలోకి తీసుకుంటారు. వయోపరిమితి, స్థానికత వంటి ఇతర వివరాలను అధికారిక నోటిఫికేషన్‌లో పరిశీలించవచ్చు. జిల్లా కలెక్టర్ లేదా సంబంధిత చైర్మన్ నేతృత్వంలో నిబంధనల ప్రకారం అభ్యర్థుల ఎంపిక జరుగుతుంది.

ముఖ్యమైన తేదీలు, దరఖాస్తు విధానం..
ఆన్‌లైన్ దరఖాస్తుల ప్రారంభ తేదీ: 10 అక్టోబర్ 2026
ఆన్‌లైన్ దరఖాస్తుకు చివరి తేదీ: 24 అక్టోబర్ 2026
ధ్రువీకరణ పత్రాల సమర్పణ గడువు: 26 అక్టోబర్ 2026 నుండి 1 నవంబర్ 2026 వరకు

ఆన్‌లైన్‌లో దరఖాస్తు పూర్తి చేసిన అభ్యర్థులు తమ దరఖాస్తు ప్రతితో పాటు అన్ని ధ్రువీకరణ పత్రాల జిరాక్స్ కాపీలను సంబంధిత ఐసీడీఎస్ ప్రాజెక్టు కార్యాలయంలో నిర్ణీత గడువులోగా సమర్పించాల్సి ఉంటుంది. అర్హులైన మహిళలు చివరి రోజు వరకు వేచి చూడకుండా ముందే అప్లై చేసుకోవడం మంచిది.