హైదరాబాద్ వాసులకు శుభవార్త.. నగరంలో మెట్రో, ఆర్టీసీ సేవలకు ఒకే టికెట్..

Common Road Transport Ticket: ఇక మెట్రోలలో ఫిజికల్ టికెట్ తీసుకోవాలంటే కౌంటర్ల వద్ద క్యూలైన్లలో నిల్చోవాల్సి ఉంటుంది. ఆర్టీసీ బస్సుల్లో టికెట్ తీసుకోవాలన్నా రద్దీ ఎక్కువగా ఉన్నప్పుడు చాలా సమయం పడుతుంది. ఈ సమస్యకు చెక్ పెడుతూ కామన్ పాస్‌ను తీసుకొచ్చింది. దీంతో పదే పదే టికెట్ తీసుకోవాల్సిన పని లేకుండా, వేగవంతమైన ప్రయాణం చేయవచ్చని అధికారులు తెలిపారు.

నేటి నుంచి ఆర్టీసీ, మెట్రో కామన్ పాస్.. 
ఆర్టీసీ, మెట్రో సర్వీసుల కోసం కామన్ పాస్‌ను నేటి నుంచి తెలంగాణ ప్రభుత్వం ప్రారంభించనుంది. ప్రజా భవన్‌లో జరగనున్న కార్యక్రమంలో డిప్యూటీ సీఎం భట్టి విక్రమార్క దీనిని లాంచ్ చేయనున్నారు. ఇందులో భాగంగా రోజువారీ, వారం రోజులు, నెలవారీ పాస్‌లను ప్రవేశ పెట్టనున్నారు. రోజువారీ పాస్ ధర 400 రూపాయలు, నెలవారీ పాస్ ధర 8500 రూపాయలుగా నిర్ణయించారు. పాస్‌తో మెట్రో, ఆర్టీసీ బస్సులు రెండింటిల్లోనూ నగర పరిధిలో ఎక్కడినుంచి ఎక్కడికైనా ప్రయాణం చేయవచ్చు.

నేడు ఆర్టీసీ, మెట్రో కామన్ పాస్.. 

ఇక రోజూ ప్రతీ బస్సులో, మెట్రోలో టికెట్ తీసుకోవాల్సిన పని తప్పుతుంది. తెలంగాణ ప్రభుత్వం, టీజీఎస్‌ ఆర్టీసీ, హైదరాబాద్ మెట్రో రైల్ సంయుక్తంగా ఈ కామన్ పాస్‌ను తీసుకొచ్చాయి. నేటి నుంచే ఈ పాస్‌లను ప్రజలు కొనుగోలు చేయవచ్చు. ఈ పాస్ హైదరాబాద్ పరిధిలో తిరిగే ఆర్డినరీ, మెట్రో లగ్జరీ, ఎలక్ట్రిక్, ఏసీ బస్సులు, మెట్రోలలో కూడా వర్తిస్తుంది.  ఔటర్ రింగ్ రోడ్ పరిధి వరకు ఈ పాస్‌లు చెల్లుబాటు అవుతాయి. దీంతో శివారు ప్రాంతాల ప్రజలకు కూడా ఉపయోగపడనుంది. అయితే ముందుగా ఎంఎంటీఎస్, క్యాబ్‌లకు కూడా ఇది వర్తింపజేయాలనుకున్నారు. కానీ చివరగా ఆర్టీసీ, మెట్రోలకే పరిమితం చేశారు. 

యాప్‌లోనే పాస్‌లు తీసుకునే వీలు కల్పించిన ప్రభుత్వం..

ఆర్టీసీ టికెట్ బుకింగ్ మరింత సులువు కానుంది. యాప్‌లో టికెట్ పొందే వీలుంది. రోజువారీ టికెట్‌తో పాటు డే, వీక్లీ, నెలవారీ పాస్‌లను యాప్ ద్వారానే పొందవచ్చు. దీని ఫిజికల్ టికెట్ అవసరం ఉండదు. ఇవాళ ఈ కొత్త సిస్టమ్‌ను టీజీఎస్‌ఆర్టీసీ ప్రారంభించనుంది. ఇప్పటివరకు పాస్ తీసుకోవాలంటే ఆర్టీసీ కౌంటర్లకు వెళ్లాల్సి వచ్చేది. ఇప్పటినుంచి ఆ బాధ తప్పుతుంది. సులువుగా మొబైల్ యాప్ ద్వారానే ఆర్టీసీ పాస్‌లు పొందవచ్చు. ఇక ఉమ్మడి పాస్ వల్ల టికెట్ కష్టాలు తొలగిపోనున్నాయి. అయితే ఈ రేట్లు మరీ మాములు జనాలకు టూ మచ్‌గానే కనిపిస్తున్నాయి. రోజుకు 400 అంటే మరీ ఎక్కువగా అనే కామెంట్స్ వినపడుతున్నాయి.