మేడ్చల్ రోడ్లకు మహర్దశ.. రూ.5.20 కోట్లతో కీలక అభివృద్ధి పనులు!

Medchal Road Development News: మేడ్చల్ నియోజకవర్గంలో మౌలిక వసతుల కల్పనతో పాటు రహదారుల అభివృద్ధికి ప్రభుత్వం అత్యంత ప్రాధాన్యతను అందిస్తోందని.. అందులో భాగంగానే మరో కీలక ముందడుగు పడిందని ఎల్లంపేట మున్సిపల్ వైస్ చైర్మన్ మేకల రజిత దేవేందర్ రెడ్డి తెలిపారు. స్థానిక ఎంపీ ఈటల రాజేందర్ ప్రత్యేకమైన చొరవతో హెచ్‌ఎండీఏ ద్వారా నియోజకవర్గ పరిధిలోని కీలక రహదారుల అభివృద్ధికి మొత్తం రూ.5.20 కోట్ల నిధులు మంజూరయ్యాయని ఆమె వెల్లడించారు..

ఈ సందర్భంగా మున్సిపల్ వైస్ చైర్మన్ మాట్లాడుతూ.. నియోజకవర్గంలో ప్రజలు ఎదుర్కొంటున్న రవాణా ఇబ్బందులను గుర్తించి.. అత్యవసరమైన రహదారులను రిపేర్లు చేసేందుకు ఈ నిధులను కేటాయించినట్లు తెలిపారు. అంతేకాకుండా రోడ్ల ఆధునీకరణకు కూడా ఈ నిధులనే వినియోగించబోతున్నట్లు వెల్లడించారు..

శ్రీరంగవరం బీటీ రోడ్డు విస్తరణకు రూ.3 కోట్లు..
ఎల్లంపేట మున్సిపాలిటీ పరిధిలోని బండ మాదారం గ్రామం మీదుగా జిల్లా పరిధిలోని శ్రీరంగవరం ఉన్నత పాఠశాల వరకు ఉన్న ప్రత్యేకమైన రహదారిని పూర్తిస్థాయిలో బీటీ రోడ్డుగా విస్తరించడంతోపాటు.. వివిధ రకాల పనుల కోసం దాదాపు మూడు కోట్ల నిధులు కేటాయించినట్లు తెలిపారు. విద్యార్థులతో పాటు రైతులు స్థానికులు నిత్యం ప్రయాణించే ఈ మార్గం విస్తరణకు నోచుకోవడం వల్ల ప్రయాణం మరింత వేగవంతంగా ఆరబోతుందన్నారు.

దేవరయాంజాల్ పరిధిలో బీటి రోడ్డు..
అలాగే దేవరయాంజాల్ పరిధిలోని మందాయిపల్లి రోడ్డు నుంచి దాదాపు ఔటర్ రింగ్ రోడ్డు ఎగ్జిట్ రోడ్డు వరకు కొత్తగా బీటీ రోడ్డు నిర్మాణానికి దాదాపు 2.2 కోట్ల నిధులు మంజూరైనట్లు కూడా తెలిపారు. ఓ ఆర్ ఆర్ అనుసంధానం మార్గంగా.. ఈ రోడ్డు అభివృద్ధి చెందడం వల్ల ట్రాఫిక్ సమస్య పూర్తిగా తగ్గిపోయే అవకాశాలు ఉన్నాయని వెల్లడించారు..

ఈ అభివృద్ధి పనులు త్వరగా మొదలై.. పూర్తయితే, ఆయా ప్రాంతాల ప్రజలకు అద్భుతమైన రవాణా సౌకర్యాలు అందుబాటులోకి వస్తాయని ఆమె తెలిపారు. నియోజకవర్గ ప్రజా సమస్యల పరిష్కారానికి ఎప్పుడూ ముందుండి.. అభివృద్ధి నిధుల మంజూరులో విశేష కృషి చేసిన స్థానిక ఎంపీ ఈటల రాజేందర్ కు మున్సిపాలిటీ ప్రజలతో పాటు మున్సిపల్ వాయిస్ ఛైర్మన్ ప్రత్యేకమైన ధన్యవాదాలు తెలిపారు. పనులను నాణ్యత ప్రమాణాలతో పూర్తి చేసేలా చర్యలు తీసుకుంటామని ఆమె పేర్కొన్నారు.