RTC Special Buses: దసరా పండుగకు తెలంగాణ ఆర్టీసీ భారీ శుభవార్త.. ఏమిటంటే?

RTC Dussehra Special Buses: తెలుగు రాష్ట్రాల్లో అతి పెద్ద పండుగ దసరాను పురస్కరించుకుని తెలంగాణ ఆర్టీసీ భారీ శుభవార్త ప్రకటించింది. ప్రయాణికులకు ఎలాంటి ఇబ్బందులు లేకుండా ప్రత్యేక బస్సులు ఏర్పాటు చేసినట్లు తెలంగాణ ఆర్టీసీ తెలిపింది. ఏపీ, తెలంగాణ ప్రయాణికులు ఆర్టీసీ సేవలు వినియోగించుకుని పండుగ మరింత ఆనందంగా.. సురక్షితంగా చేసుకోవాలని తెలంగాణ ఆర్టీసీ ఎండీ నాగిరెడ్డి సూచించారు. దసరాకు ఊరెళ్లే ప్రయాణికుల కోసం 7 వేల ప్రత్యేక బస్సులు వేసినట్లు టీఎస్ఆర్టీసీ ఎండీ ప్రకటించారు.

దసరా పండుగ ఏర్పాట్లు హైదరాబాద్‌ సికింద్రాబాద్‌లోని జూబ్లీ బస్‌స్టేషన్ (జేబీఎస్‌)ను శుక్రవారం ఆర్టీసీ ఎండీ నాగిరెడ్డి స్వయంగా పరిశీలించారు. ఎగ్జిక్యూటివ్ డైరెక్టర్లు సీహెచ్. వెంకన్న, శ్రీధర్‌తో కలిసి ఎండీ నాగిరెడ్డి జేబీఎస్‌లో పర్యటించి ఏర్పాట్లు చూసి.. ఆర్టీసీ ఉద్యోగులు, ప్రయాణికులతో మాట్లాడి వివరాలు తెలుసుకున్నారు. జేబీఎస్‌లో ప్రత్యేక విధులు నిర్వర్తిస్తున్న సికింద్రాబాద్ ఆర్ఎం సుచరిత, కరీంనగర్ ఆర్ఎం రాజుతో బస్సుల నిర్వహణ, ట్రాఫిక్ కు సంబంధించి ఎండీ నాగిరెడ్డి సమీక్ష చేశారు. గంటకు పైగా బస్ స్టేషన్‌లో పర్యటించిన ఆయన ప్రయాణికులతో మాట్లాడి ఏర్పాట్లు, సౌకర్యాలు, మౌలిక వసతుల గురించి వివరాలు అడిగి తెలుసుకున్నారు. బస్ స్టేషన్‌లో ప్రయాణికుల కోసం చేసిన ఏర్పాట్లపై ఆర్టీసీ ఎండీ సంతృప్తి వ్యక్తం చేశారు.

దసరా పండుగను పురస్కరించుకుని సొంత ఊళ్లకు వెళ్లే ప్రయాణికుల సౌకర్యార్థం తెలంగాణ రాష్ట్ర రోడ్డు రవాణా సంస్థ (టీఎస్ఆర్టీసీ) 7 వేల ప్రత్యేక బస్సులు నడుపుతున్నట్లు ఎండీ వై.నాగిరెడ్డి తెలిపారు. ఈ నెల 10వ తేదీ నుంచి ఇప్పటివరకు సుమారు 95 శాతం బస్సులను విజయవంతంగా నడిపినట్లు.. ప్రయాణికులను సురక్షితంగా గమ్యస్థానాలకు చేర్చినట్లు వెల్లడించారు. రానున్న రోజుల్లో మరింత ప్రయాణికుల రద్దీ ఉండే అవకాశం ఉండడంతో ప్రత్యేక చర్యలు తీసుకుంటున్నట్లు ఆర్టీసీ ఎండీ తెలిపారు.

ఈ నెల 17, 18 తేదీల్లో ప్రయాణికుల రద్దీ చాలా ఎక్కువగా ఉండే అవకాశం ఉండడంతో రద్దీకి అనుగుణంగా అవసరమైన ప్రాంతాల్లో అదనపు బస్సులను నడపాలని అధికారులను ఆర్టీసీ ఎండీ నాగిరెడ్డి ఆదేశించారు. దసరా ప్రత్యేక బస్సుల నిర్వహణలో ప్రయాణికులకు ఎలాంటి ఇబ్బందులు తలెత్తకుండా క్షేత్రస్థాయి అధికారులు నిరంతరం పర్యవేక్షించాలని సూచించారు. పండుగ ముగిసిన అనంతరం తిరిగి ప్రయాణాలు చేసే ప్రయాణికుల కోసం కూడా ఇదే తరహాలో ప్రత్యేక బస్సు సర్వీసులను సిద్ధం చేయాలని ఎండీ స్పష్టం చేశారు.

ఈ సందర్భంగా ​బస్ స్టేషన్లలో తాగునీరు, విశ్రాంతి వసతులు, పారిశుధ్యం, భద్రత విషయంలో ఎలాంటి లోటుపాట్లు లేకుండా అన్ని రకాల చర్యలు తీసుకుంటున్నట్లు ఆర్టీసీ ఎండీ నాగిరెడ్డి తెలిపారు. ప్రయాణికులు బస్సు రిజర్వేషన్లను అధికారిక వెబ్‌సైట్ www.tgsrtcbus.in ద్వారా బుక్ చేసుకోవాలని సూచించారు. ప్రత్యేక బస్సులకు సంబంధించిన పూర్తి సమాచారం, వివరాల కోసం ఆర్టీసీ కాల్ సెంటర్ నంబర్లు 040-69440000, 040-23450033 లను సంప్రదించవచ్చని వెల్లడించారు. ఆర్టీసీ సేవలను వినియోగించుకుని ప్రయాణికులు సురక్షితంగా, ప్రశాంతంగా తమ గమ్యస్థానాలకు చేరుకోవాలని ఆర్టీసీ ఎండీ నాగిరెడ్డి విజ్ఞప్తి చేశారు.