షుగర్ ఉన్నవారు ఏ పండ్లు తింటే బెస్ట్? డయాబెటాలజిస్ట్ రేటింగ్ ఇవే..! ఈ జ్యూస్‌లు మాత్రం అస్సలు వద్దు!

Best Fruits for Diabetes: పండ్లలో సహజ చక్కెరలు ఉన్నప్పటికీ, అతిగా తీసుకుంటే చక్కెర స్థాయిలు పెరగవచ్చు. కాబట్టి, డయాబెటిస్ ఉన్నవారు పండ్లను పరిమితంగా తీసుకోవడం ఆరోగ్యానికి మంచిదని నిపుణులు సూచిస్తున్నారు. పండ్లు తీసుకోవడం వల్ల ఇతర ఆహార పదార్థాలను అతిగా తినకుండా ఉండవచ్చు, తద్వారా రక్తంలో చక్కెర స్థాయిలు పెరగవు. పండ్లలో ఫైబర్ పుష్కలంగా ఉంటుంది. డయాబెటిస్ ఉన్నవారు కూడా కొన్ని రకాల పండ్లను తీసుకోవచ్చు, అవి రక్తంలో చక్కెర స్థాయిలను అదుపులో ఉంచుతాయి.

జామ పండు డయాబెటిస్ ఉన్నవారికి చాలా మంచిది, ఎందుకంటే ఇందులో గ్లైసిమిక్ ఇండెక్స్ తక్కువగా ఉంటుంది. డైటరీ ఫైబర్ కూడా ఉంటుంది. ఇది మెల్లిగా జీర్ణం అవ్వడం వల్ల గ్లూకోజ్ కూడా నెమ్మదిగా గ్రహించబడుతుంది. ఇందులో విటమిన్ సి కూడా ఉంటుంది.
బెర్రీ పండ్లలో స్ట్రాబెర్రీ, బ్లూబెర్రీ, రాస్బెర్రీ వంటివి ఉంటాయి. వీటిలో యాంటీ ఆక్సిడెంట్లు, విటమిన్లు, ఫైబర్ పుష్కలంగా ఉండి, చక్కెర స్థాయిలను నియంత్రణలో ఉంచుతాయి.

యాపిల్స్‌లో పెక్టిన్ ఉంటుంది. వీటిలో గ్లైసిమిక్ ఇండెక్స్ కూడా తక్కువగా ఉంటుంది. ఇది ముఖ్యంగా డయాబెటిస్ ఉన్నవారికి, చర్మ ఆరోగ్యానికి మేలు చేస్తుంది. ఇందులోని ఫైబర్ రక్తంలో చక్కెర స్థాయిలను నియంత్రణలో ఉంచుతుంది.

ఆరెంజ్ పండ్లలో విటమిన్ సి, ఫైబర్ ఎక్కువగా ఉంటాయని ఆరోగ్య నిపుణులు చెబుతున్నారు. ఇది రక్తంలో చక్కెర స్థాయిలు హఠాత్తుగా పెరగకుండా చూస్తుంది. కివి పండులో విటమిన్ సి, పొటాషియం, ఫైబర్ ఉంటాయి. ఇందులో గ్లైసిమిక్ ఇండెక్స్ కూడా తక్కువగా ఉండటం వల్ల, రక్తంలో చక్కెర స్థాయిలను నియంత్రణలో ఉంచుకోవడానికి కివి తీసుకోవడం మంచిది. బొప్పాయి పండులో సహజమైన యాంటీ ఆక్సిడెంట్లు, ఎంజైమ్స్ ఉంటాయి. ఇది జీర్ణక్రియకు మేలు చేయడమే కాకుండా మెటబాలిజం రేటును కూడా పెంచుతుంది.

దానిమ్మ పండులో యాంటీ ఇన్‌ఫ్లమేటరీ, యాంటీ ఆక్సిడెంట్ గుణాలు ఉంటాయి. ఇందులో సహజమైన చక్కెరలతో పాటు యాంటీ ఆక్సిడెంట్లు పుష్కలంగా ఉంటాయి. మామిడి పండులో ఖనిజాలు ఉన్నప్పటికీ, దీని గ్లైసిమిక్ ఇండెక్స్ ఎక్కువగా ఉంటుంది. ఇందులో సహజ చక్కెరలు ఉండటం వల్ల ఇది గ్లూకోజ్ స్థాయిలను హఠాత్తుగా పెంచుతుంది. కాబట్టి, దీనిని చాలా తక్కువ మొత్తంలో.. వైద్యుల సలహా మేరకు మాత్రమే తీసుకోవాలి.
చక్కెర సమస్య ఉన్నవారు ద్రాక్ష పండ్లను తీసుకోకపోవడం మంచిది, ఎందుకంటే వీటిలో చక్కెర స్థాయిలు ఎక్కువగా ఉండి, రక్తంలో గ్లూకోజ్ స్థాయిలను అకస్మాత్తుగా పెంచుతాయి.(Disclaimer: పాఠకులారా ఈ వ్యాసం కేవలం సాధారణ సమాచారం, సలహాలను మాత్రమే అందిస్తుంది. ఇది ఎంతమాత్రం వృత్తిపరమైన సలహా కాదు. ఈ సమాచారానికి జీ తెలుగు న్యూస్ ఎటువంటి బాధ్యత వహించదు.)