Father Son Property Rights: కొడుకు సంపాదన, ఆస్తిలో తల్లిదండ్రులకు హక్కు ఉంటుందా? వారసత్వ చట్టం ఏం చెబుతోంది!

Parents Right In Son's Property: ఒక వ్యక్తి కొనుగోలు చేసిన లేదా సంపాదించిన స్వయార్జిత ఆస్తిపై అతను జీవించి ఉన్నంతకాలం పూర్తి హక్కులు ఉంటాయి. తను బతికి ఉన్నప్పుడే ఆస్తి ఎవరికి చెందాలో వీలునామా (Will) ద్వారా నిర్ణయించే స్వేచ్ఛ ఉంటుంది. అయితే సదరు వ్యక్తి ఎలాంటి వీలునామా రాయకుండా మరణించినప్పుడు మాత్రమే చట్టబద్ధమైన వారసత్వ నిబంధనలు వర్తిస్తాయి.

Class-I వారసులుగా తల్లి హక్కులు..
చట్టంలోని సెక్షన్ 8 ప్రకారం వీలునామా లేని పక్షంలో ఆస్తి మొదట Class-I వారసులకు చెందుతుంది. ఈ జాబితాలో మరణించిన వ్యక్తి భార్య, కుమారులు, కుమార్తెలు, తల్లి ఉంటారు. సెక్షన్ 10 నిబంధనల ఆధారంగా వీరందరికీ సమాన వాటాలు లభిస్తాయి. ఉదాహరణకు, ఒక వ్యక్తికి భార్య, ఒక కుమారుడు, తల్లి జీవించి ఉంటే, అతని ఆస్తి మూడు సమాన భాగాలుగా విభజించబడి ముగ్గురికీ పంపిణీ అవుతుంది. ఒకవేళ సదరు వ్యక్తి పెళ్లికానివాడైతే, Class-I వారసురాలిగా మొదట తల్లికే ఆస్తిపై హక్కు దక్కుతుంది.

Class-II వారసుడిగా తండ్రి స్థానం..
ఈ చట్టంలో తండ్రి స్థానం Class-I లో కాకుండా Class-II వారసుల జాబితాలో మొదటి స్థానంలో ఉంటుంది. Class-I వారసులు ఎవరూ లేని పక్షంలో మాత్రమే Class-II వారసులకు ఆస్తి లభించే అవకాశం ఉంటుంది. అందువల్ల భార్య, పిల్లలు లేదా తల్లి ఉన్నంతకాలం తండ్రికి వారితో పాటు సమాన వాటా రాదు. తల్లి కూడా లేని పక్షంలోనే తండ్రికి ఆస్తి చేరుతుంది. Class-II జాబితాలో తండ్రి తర్వాత సోదరులు, సోదరీమణులు, ఇతర బంధువులు క్రమానుగతంగా ఉంటారు.

పూర్వీకుల ఆస్తికి, స్వయార్జిత ఆస్తికి వ్యత్యాసం..
పూర్వీకుల నుండి వచ్చిన ఆస్తిలో కుటుంబ సభ్యులకు కోపార్సెనరీ హక్కులు ఉంటాయి కాబట్టి, దానిని స్వయార్జిత ఆస్తితో పోల్చలేము. ఆస్తి ఎలా వచ్చింది, ఎవరి పేరుపై ఉంది, కుటుంబంలో ఎవరు జీవించి ఉన్నారు వంటి అంశాలు వారసత్వాన్ని నిర్ణయిస్తాయి. భవిష్యత్తులో కుటుంబంలో ఆస్తి వివాదాలు రాకుండా ముందే స్పష్టమైన వీలునామా రాసుకోవడం, అవసరమైతే న్యాయ నిపుణుల సలహా తీసుకోవడం శ్రేయస్కరం.

(గమనిక: ఇక్కడ పేర్కొన్న సమాచారం కేవలం కొందరి నిపుణుల సలహాలు, సూచనలను పాటిస్తూ పొందుపరిచినది. దీన్ని పాటించే ముందు సంబంధిత నిపుణుడ్ని సంప్రదించడం మేలు. దీన్ని జీ తెలుగు న్యూస్ ధ్రువీకరించడం లేదు.)