మీరు శాకాహారులా? ప్రోటీన్ లోపంతో బాధపడుతున్నారా? మీ డైట్‌లో ఇవి చేర్చుకోండి!

World Vegetarian Day: మానవ ఆరోగ్యం మాత్రమే కాదు.. పర్యావరణ పరిరక్షణ..జీవాల పట్ల కారుణ్యం వహించాల్సిన ఆవశ్యకతను చాటి చెప్పడానికి ప్రతి ఏడాది అక్టోబర్ 1వ తేదీన ప్రపంచ శాకాహార దినోత్సవాన్ని ఘనంగా నిర్వహిస్తారు. శాకాహార జీవన శైలి వల్ల కలిగే పోషకాలు, నైతిక, పర్యావరణ ప్రయోజనాలపై ప్రజల్లో చైతన్యం నింపేందుకు ఈరోజు ముఖ్య ఉద్దేశ్యం.

ఈ విశిష్ట దినోత్సవ వేడుకలను 1977లో నార్త్ అమెరికన్ వెజిటేరియన్ సొసైటీ మొదటిసారిగా ప్రారంభించింది. తర్వాత 1978లో ఇంటర్నేషనల్ వెజిటేరియన్ యూనియన్ కూడా దీనికి ఆమోదం తెలిపింది. ఈ రోజుతో ప్రారంభం అయ్యే అక్టోబర్ నెల మొత్తాన్ని ప్రపంచవ్యాప్తంగా శాకాహార అవగాహన మాసంగా పాటిస్తారు. చాలా మందిలో శాకాహారం తింటే శరీరానికి సరిపడే ప్రోటీన్ లభించదన్న భావన ఉంటుంది.  కానీ మన భారతీయ సాంప్రదాయ శాకాహారంలో ప్రొటీన్లు పుష్కలంగా అందించే అనేక ఆహార పదార్థాలు ఉన్నాయి. ప్రపంచ శాకాహార దినోత్సవం సందర్భంగా మన రోజువారీ భారతీయ భోజనంలో ప్రొటీన్లను అందించే ముఖ్యమైన ఆహారాల గురించి ఇప్పుడు తెలుసుకుందాం.

ప్రోటీన్ అధికంగా ఉండే భారతీయ ఆహార పదార్థాలు:

పప్పుధాన్యాలు: పప్పుధాన్యాలు లేకుండా భారతీయ భోజనం అసంపూర్ణమని చెప్పాలి. కాయధాన్యాలు, మసూర్ పప్పు,  ఎర్ర కందిపప్పు సులభంగా జీర్ణమవుతాయి. త్వరగా ఉడుకుతాయి. వీటిని అన్నం లేదా రోటీతో కలిపి తిన్నప్పుడు మంచి ప్రోటీన్ లభిస్తుంది.

రాజ్మా, చోలే: రాజ్మాను అన్నంతో కలిపి వడ్డించినప్పుడు అది అద్భుతమైన రుచిని, పోషకాలను అందిస్తుంది. ఇది ప్రోటీన్, ఫైబర్‌తో సమృద్ధిగా ఉంటుంది. చోలేను కూరగాయగా, ఉడకబెట్టి లేదా వేయించి, లేదా చిరుతిండిగా కూడా తినవచ్చు.

పనీర్, పాల ఉత్పత్తులు: శాకాహారులకు పనీర్ ఒక వరం. ఇది ప్రోటీన్,  కాల్షియంతో సమృద్ధిగా ఉంటుంది. పాలక్ పనీర్,  పనీర్ బుర్జీ వంటి వంటకాలు రుచికరమైనవి. ఆరోగ్యకరమైనవి. అదేవిధంగా, పాలు, పెరుగు, మజ్జిగ కూడా రోజువారీ ప్రోటీన్ అవసరాలను తీరుస్తాయి.

సోయా, టోఫు: సోయాబీన్స్, టోఫు (సోయా పనీర్) మొక్కల ఆధారిత ప్రోటీన్ కోసం అద్భుతమైన ఎంపికలు. శరీరానికి అవసరమైన ప్రోటీన్‌ను అందించడానికి వీటిని కూరలు, వేపుడు కూరలలో ఉపయోగించవచ్చు.

ఇతరాలు: పచ్చి బఠానీలను పులావ్,  కూరలలో ఉపయోగించవచ్చు. మొలకెత్తిన బఠానీలు, ఇతర పప్పులను సలాడ్‌లు, చాట్‌లలో వాటి పోషక విలువను పెంచడానికి చేర్చవచ్చు. తక్కువ ధరకు లభించే వేరుశెనగలలో ప్రోటీన్‌తో పాటు ఆరోగ్యకరమైన కొవ్వులు కూడా ఉంటాయి. వాటిని వేయించుకోవచ్చు లేదా చట్నీగా తినవచ్చు.

మొత్తంమీద, చక్కగా ప్రణాళికబద్ధంగా తీసుకున్న భారతీయ శాకాహార ఆహారం శరీరానికి అవసరమైన అన్ని పోషకాలను, ముఖ్యంగా ప్రోటీన్‌ను సులభంగా అందిస్తుంది. మీ రోజువారీ ఆహారంలో ఈ పదార్థాలను చేర్చుకోవడం ద్వారా, మీరు ఆరోగ్యంగా,  బలంగా ఉంటారు.