స్థానిక సంస్థల ఎన్నికలపై సుప్రీంకోర్టు తీర్పుపై ఏపీ ప్రభుత్వం ఆశలు..

AP Govt hopes on Supreme court Verdict: ఎస్సీ, ఎస్టీ, బీసీలకు కలిపి రాష్ట్రంలో అమలవుతున్న మొత్తం రిజర్వేషన్ల పరిమితి కేవలం 49.24 శాతం మాత్రమే ఉందని, ఇది సుప్రీంకోర్టు నిర్దేశించిన 50 శాతం గరిష్ట పరిమితిని ఏమాత్రం దాటలేదని స్పష్టం చేసింది. తాజా సమగ్ర సర్వే నివేదికల ప్రకారం రాష్ట్రంలో బీసీల జనాభా ఏకంగా 50.42 శాతంగా తేలిందన్నారు.  జనాభా దామాషాకు అనుగుణంగానే ఈ నిర్ణయం తీసుకున్నామని కోర్టుకు వివరించింది.

ప్రభుత్వం సమర్పించిన ఈ తాజా అధికారిక డేటాను, వాస్తవ గణాంకాలను హైకోర్టు సమగ్రంగా పరిగణనలోకి తీసుకోకుండా నిర్ణయం వెలువరించిందని ఏపీ ప్రభుత్వం సుప్రీంకోర్టు దృష్టికి తెచ్చింది. స్థానిక పాలనలో వెనుకబడిన వర్గాలకు రాజకీయ ప్రాతినిధ్యం కల్పించాల్సిన ఆవశ్యకత ఉందని, నిబంధనలకు లోబడే కేటాయింపులు జరిగాయని ప్రభుత్వం వాదించింది. అందువల్ల ఈ వ్యవహారంలో గతంలో హైకోర్టు ఇచ్చిన తీర్పుపై తక్షణమే స్టే విధించి, స్థానిక సంస్థల ఎన్నికల నిర్వహణ ప్రక్రియకు ఎలాంటి ఆటంకం కలగకుండా న్యాయం చేయాలని సర్వోన్నత న్యాయస్థానాన్ని కోరింది. ఈ పిటిషన్‌పై సుప్రీంకోర్టు తీసుకోబోయే నిర్ణయం రాష్ట్ర స్థానిక సంస్థల ఎన్నికలపై కీలకంగా మారనుంది.

స్థానిక ఎన్నికల్లో బీసీ కోటాపై వచ్చే వారంలో సుప్రీంకోర్టు నిర్ణయం రావొచ్చని సీఎం చంద్రబాబు టీడీపీ నేతలతో జరిగిన జూమ్ కాన్ఫరెన్స్‌లో అన్నారు. ఆ వెంటనే ఎట్టి పరిస్థితుల్లోనూ ఎన్నికలకు వెళ్లడం ఖాయమని స్పష్టం చేశారు. బీసీలకు 34శాతం రిజర్వేషన్లు ఇచ్చేందుకు సుప్రీంకోర్టు అంగీకరించకపోతే పార్టీపరంగా ఇస్తామని తెలిపారు. తొలి దశలో మున్సిపాలిటీలు, నగరపాలక సంస్థలు, నగర పంచాయతీలకు ఎన్నికలు జరుగుతాయన్నారు.