ఆస్పత్రులకు వెళ్లేవారికి అలర్ట్.. నేటి నుంచి హెల్త్ వర్కర్ల సమ్మె! డిమాండ్లు ఏంటంటే?

AP Contract Health Workers Strike: వైద్య ఆరోగ్య శాఖలోని కాంట్రాక్ట్ ఉద్యోగులు నేటి నుంచి సమ్మెకు దిగనున్నారు. తమ సమస్యల పరిష్కారానికి ప్రభుత్వం హామీ ఇవ్వకపోవడంతో ఈ నిర్ణయం తీసుకున్నట్లు ఏపీ మెడికల్ అండ్ హెల్త్ కాంట్రాక్ట్ ఎంప్లాయిస్ జాయింట్ యాక్షన్ కమిటీ తెలిపింది. ఇవాళ అత్యవసర సేవలు మినహా మిగిలిన సేవలను బహిష్కరిస్తామని, నేటి  నుంచి రాష్ట్రవ్యాప్తంగా 14,600 మంది ఉద్యోగులు సమ్మెలో పాల్గొంటారని పేర్కొన్నారు. జీతాల పెంపుతో పాటు, ముఖ్యంగా కాంట్రాక్ట్ ఉద్యోగులను రెగ్యులరైజ్ చేయాలని మరియు వారికి ఉద్యోగ భద్రత కల్పించాలని వారు కోరుతున్నారు.

వైద్య ఆరోగ్య శాఖలో ఏళ్ల తరబడి కాంట్రాక్ట్ విధానంలో పనిచేస్తున్నప్పటికీ, ఇప్పటికీ శాశ్వత ఉద్యోగుల తరహాలో తమకు భద్రత లేదని ఉద్యోగులు చెబుతున్నారు. ప్రభుత్వ వైద్య సేవల్లో కీలకంగా వ్యవహరిస్తున్నప్పటికీ, తమ ఉద్యోగాలు ఎప్పుడు ఉంటాయో, ఎప్పుడు పోతాయో తెలియని అనిశ్చితి నెలకొందని వారు ఆవేదన వ్యక్తం చేస్తున్నారు. అందుకే కాంట్రాక్ట్ ఉద్యోగుల రెగ్యులరైజేషన్ ప్రక్రియను ప్రభుత్వం వెంటనే చేపట్టి, పూర్తిస్థాయిలో అమలు చేయాలని డిమాండ్ చేస్తున్నారు.

మరోవైపు, విధి నిర్వహణలో ప్రాణాలు కోల్పోయే కాంట్రాక్ట్ ఉద్యోగుల కుటుంబాలకు ఆర్థిక భరోసా కల్పించాలని ఉద్యోగులు మరో ప్రధాన డిమాండ్ చేస్తున్నారు. విధి నిర్వహణలో మరణించిన ప్రతి ఉద్యోగి కుటుంబానికి రూ. 50 లక్షల పరిహారం అందించాలని, అలాగే మృతుడి కుటుంబంలో ఒకరికి కాంట్రాక్ట్ ఉద్యోగం కల్పించాలని వారు కోరుతున్నారు. ఉద్యోగి మరణంతో కుటుంబం ఆదాయ వనరును కోల్పోయే పరిస్థితుల్లో ప్రభుత్వం ఆ కుటుంబానికి అండగా నిలవాలని వారు అభిప్రాయపడ్డారు.

అంతేకాకుండా, రెగ్యులరైజేషన్ ప్రక్రియ పూర్తయ్యే వరకు కాంట్రాక్ట్ ఉద్యోగులకు 100 శాతం గ్రాస్ శాలరీ చెల్లించాలని డిమాండ్ చేస్తున్నారు. ప్రస్తుతం తమకు అందుతున్న వేతనంలో పలు రకాల కోతలు ఉండటం వల్ల ఆర్థిక ఇబ్బందులు ఎదుర్కొంటున్నామని ఉద్యోగులు చెబుతున్నారు. రెగ్యులరైజేషన్ జరిగే వరకు కనీసం పూర్తి గ్రాస్ వేతనం అందిస్తే తమ కుటుంబాల ఆర్థిక భారాన్ని కొంత మేర తగ్గించుకోవచ్చని వారు అంటున్నారు.

Read Also: తిరుపతిలో తీవ్ర విషాదం.. నైట్‌ షిఫ్ట్‌లో ఒక్కసారిగా పేలిన బాయిలర్.. నలుగురు అక్కడికక్కడే మృతి! పూర్తి వివరాలు..

వైద్య ఆరోగ్య శాఖ కాంట్రాక్ట్ ఉద్యోగుల ఈ సమ్మె నేపథ్యంలో, ప్రభుత్వ వైద్య సేవలపై దీని ప్రభావం ఎలా ఉంటుందన్నది ఇప్పుడు ఆసక్తికరంగా మారింది. ఇప్పటికే ఆసుపత్రులు, ప్రాథమిక ఆరోగ్య కేంద్రాలు ఇతర వైద్య సేవల్లో కాంట్రాక్ట్ సిబ్బంది కీలక పాత్ర పోషిస్తున్నారు. అలాంటి సిబ్బంది సమ్మెలోకి వెళ్తే, సేవల నిర్వహణపై ఒత్తిడి పెరిగే అవకాశం ఉంది.