AP ZPTC MPTC Elections: ఆంధ్రప్రదేశ్ రసవత్తరంగా పరిషత్ పోరు..ప్రధాన పార్టీల నుంచి పోటెత్తిన నామినేషన్లు..ఎవరి బలమెంత?

AP ZPTC MPTC Elections 2026: ఆంధ్రప్రదేశ్‌లో జెడ్పీటీసీ, ఎంపీటీసీ ఎన్నికల నామినేషన్ల పర్వం అధికారికంగా ముగిసింది. పరిషత్ పోరులో పోటీకి దిగేందుకు ప్రధాన రాజకీయ పార్టీలతో పాటు స్వతంత్ర అభ్యర్థుల నుంచి కూడా విస్తృతమైన స్పందన లభించింది. రాష్ట్రంలోని మొత్తం 28 జిల్లాల్లో ఉన్న 659 జెడ్పీటీసీ స్థానాల కోసం మొత్తం 5,724 నామినేషన్లు దాఖలు కాగా.. 9,829 ఎంపీటీసీ స్థానాలకు ఏకంగా 51,902 నామినేషన్లు దాఖలయ్యాయి. 

ముఖ్యంగా నామినేషన్ల స్వీకరణ చివరి రోజున ఎన్నికల వేడి తారాస్థాయికి చేరింది. ఆ ఒక్క రోజే జెడ్పీటీసీలకు 3,315, ఎంపీటీసీలకు 25,016 నామినేషన్లు రావడం పోటీ తీవ్రతను స్పష్టంగా సూచిస్తోంది.

పార్టీల వారీగా హోరాహోరీ పోటీ
నామినేషన్ల నమోదులో అధికార, ప్రతిపక్ష పార్టీల మధ్య తీవ్ర పోటీ నెలకొంది.

ఎంపీటీసీ స్థానాలు: రాష్ట్రవ్యాప్తంగా టీడీపీ తరఫున అత్యధికంగా 22,013 నామినేషన్లు దాఖలు కాగా, వైసీపీ నుంచి 20,556 మంది బరిలో నిలిచారు. కూటమిలోని జనసేన పార్టీ తరపున 4,609 మంది, బీజేపీ నుంచి 1,150 మంది తమ నామినేషన్లను సమర్పించారు.

జెడ్పీటీసీ స్థానాలు: టీడీపీ తరఫున 2,078 నామినేషన్లు దాఖలు కాగా, వైఎస్సార్సీపీ నుంచి 1,815 మంది అభ్యర్థులు రంగంలోకి దిగారు. అలాగే జనసేన తరఫున 679 మంది, బీజేపీ తరఫున 255 మంది నామినేషన్లు వేశారు.

జగన్ తీరుపై కూటమి నేతల విమర్శలు
రాష్ట్రంలో ఇంత భారీ సంఖ్యలో ప్రజాస్వామ్యబద్ధంగా నామినేషన్లు దాఖలైనప్పటికీ, కూటమి ప్రభుత్వంపై వైసీపీ అధ్యక్షుడు జగన్ మోహన్ రెడ్డి నిరాధారమైన, తప్పుడు ఆరోపణలు చేస్తున్నారని అధికార పార్టీ నేతలు మండిపడ్డారు. జగన్ వ్యవహార శైలిని వారు 'హిట్ అండ్ రన్' సిద్ధాంతంగా అభివర్ణించారు.

కేవలం ప్రెస్ మీట్లు పెట్టడానికే ఆయన బెంగళూరు నుంచి అమరావతికి వస్తున్నారని, ఆరోపణలు చేసి వెళ్లిపోతున్నారని విమర్శించారు. క్షేత్రస్థాయి వాస్తవాలను గమనించకుండా జగన్ మాట్లాడుతున్నారని ఆరోపించారు. నామినేషన్ల ఘట్టం ముగియడంతో పరిషత్ ఎన్నికల రాజకీయం మరింత వేడెక్కింది.