Chandrababu: స్థానిక ఎన్నికల్లో 57 శాతం స్ట్రైక్ రేట్ కంటే మెరుగ్గా రావాలి: చంద్రబాబు

Chandrababu Tele Conference: సార్వత్రిక ఎన్నికల్లో వచ్చిన 57 శాతం స్ట్రైక్ రేట్ కంటే మెరుగ్గా రావాలని పార్టీ నాయకులకు టీడీపీ అధినేత, సీఎం చంద్రబాబు ఆదేశించారు. రెబల్స్‌ వేసిన నామినేషన్‌లను ఉపసంహరించుకునేలా చూడాలని.. పార్టీ ఎంపిక చేసిన అభ్యర్ధుల విజయానికి కృషి చేయాలని సూచించారు. పార్టీ ఆదేశాలు ధిక్కరిస్తే చర్యలు తప్పవని హెచ్చరించారు. కూటమి పార్టీలు సమన్వయంతో వ్యవహరించాలని నేతలకు ఆదేశించారు.

తెలుగుదేశం పార్టీ ఎంపీలు, మంత్రులు, ఎమ్మెల్యేలు, ముఖ్య నాయకులతో టీడీపీ అధినేత, ముఖ్యమంత్రి చంద్రబాబు నాయుడు టెలీకాన్ఫరెన్స్ నిర్వహించి స్థానిక సంస్థల ఎన్నికలపై దిశానిర్దేశం చేశారు. స్థానిక సంస్థల ఎన్నికల్లో కూటమి అభ్యర్థుల గెలుపునకు కృషి చేయాలి. రెబెల్స్‌గా నామినేషన్లు వేసిన వారితో ఉపసంహరించుకునేలా చేయాలి. పార్టీ అధికారిక అభ్యర్థులకు త్వరగా బీ-ఫారాలు అందచేయాలి. పార్టీ ఆదేశాలను కాదని ముందుకెళ్తే పార్టీ నుంచి తప్పకుండా చర్యలు తీసుకుంటాం' అని టీడీపీ అధినేత చంద్రబాబు హెచ్చరించారు. కూటమి నుంచి సీట్లు కేటాయించిన వారిని గెలిపించాల్సిందేనని స్పష్టం చేశారు. కూటమిగా 3 పార్టీలు కలిసి పోటీ చేస్తున్నప్పుడు స్వతంత్రంగా వేయడం సరికాదని సూచించారు. కేటాయించిన స్థానాల్లో సమర్ధవంతమైన అభ్యర్ధులను నిలబెట్టాలని చెప్పారు.

'తాత్కాలిక ప్రయోజనాల కోసం అభ్యర్ధులను నిలబెట్టవద్దు. మిత్రపక్షాలతో సమన్వయం చేసుకుని బలాబలాలను చూసుకుని సమర్ధులను ఎంపిక చేయాలి. ఇంటింటి ప్రచారం చేపట్టాలి. బూత్ స్థాయి వరకు చేసిన అభివృద్ధి, సంక్షేమాన్ని ప్రజలకు వివరించాలి. నిరంతరం సేవ చేస్తూ ఉంటేనే లీడర్లు అవుతారు' అని పార్టీ నాయకులకు అధినేత చంద్రబాబు సూచించారు. 'ఈ నెల సమయం మన పనితనానికి పరీక్ష. కార్పొరేషన్లు, మున్సిపాలిటీలు, జెడ్పీటీసీ, ఎంపీటీసీలు, సర్పంచ్‌లకు ఎన్నికలు జరుగుతున్నాయి. ఇప్పుడు ఎన్నికలు జరగని మున్సిపాలిటీలకు కూడా త్వరలో జరుగుతాయి. అన్నింటిలో సార్వత్రిక ఎన్నికల్లో వచ్చిన 57 శాతం స్ట్రైక్ రేట్ కంటే మెరుగ్గా రావాలి' అని దిశానిర్దేశం చేశారు.

'నేను ముఖ్యమంత్రిగానే కాకుండా ఎన్నికలయ్యే వరకూ ఒక పార్టీ అధ్యక్షుడిగా వ్యవహరిస్తా. మంత్రులు, ఎమ్మెల్యేలు కూడా పార్టీ కార్యకర్తలగానే పని చేయాలి. విలువలు లేకుండా చేసే రాజకీయం, రౌడీయిజం, అధికారం దుర్వినియోగంతో చేసే రాజకీయం ఎప్పుడూ నిలబడదు' అని టీడీపీ అధ్యక్షుడు చంద్రబాబు సూచించారు. 11 కార్పొరేషన్లు 11 సామాజికవర్గాలకు కేటాయించామని.. అన్ని కులాలను రాజ్యాధికారంలో భాగం చేయడానికే ఈ నిర్ణయం తీసుకున్నట్లు తెలిపారు. వేలమందికి ఈ ఎన్నికలతో ప్రజలకు సేవ చేసే అవకాశం లభిస్తుందని.. ప్రజలు ఆమోదించిన వారిని , ప్రజల్లో గుర్తింపు ఉన్నవారిని ఎంపిక చేయండి అని సూచించారు.

'గ్రామాల్లో మంచి నాయకులు లేకపోతే ఆ గ్రామంలో కూడా పార్టీ బలహీన పడుతుంది. సమర్ధులను నియమించుకుంటే పార్టీ పటిష్టంగా ఉంటుంది. కార్యకర్తలు పార్టీ కోసం పని చేసిన వారికి పదవులు ఇచ్చేందుకు స్థానిక ఎన్నికలనేవి మంచి అవకాశం' అని పార్టీ నాయకులకు చంద్రబాబు తెలిపారు. పార్టీ కోసం పని చేసిన వేలాది మందికి స్థానిక ఎన్నికల్లో సీట్లు ఇవ్వవచ్చని.. సమీకరణాలు, పొత్తుల్లో భాగంగా ఎవరికైనా సీట్లు ఇవ్వలేకపోతే... అలాంటి వారికి నామినేటెడ్ పదవుల్లో స్థానం కల్పిస్తామని హామీ ఇచ్చారు.