రేపల్లెలో సీఎం చంద్రబాబు పర్యటన..

CM Tour: ఉదయం 10 గంటల 45 నిమిషాలకు ఉండవల్లి క్యాంప్ కార్యాలయం నుంచి సీఎం చంద్రబాబు బయలుదేరుతారు. 11 గంటలకు రేపల్లెకు చేరుకుంటారు. అనంతరం రేపల్లె పట్టణంలోని నాలుగో వార్డులో పర్యటించనున్నారు. ఉదయం 11 గంటల 25 నిమిషాలకు ఎన్టీఆర్ భరోసా పెన్షన్ లబ్ధిదారులతో సమావేశమవుతారు. ఈ సందర్భంగా లబ్ధిదారులతో నేరుగా మాట్లాడి వారి సమస్యలు, ప్రభుత్వం అందిస్తున్న సంక్షేమ పథకాల అమలు తీరును తెలుసుకోనున్నారు.

పింఛన్ల పంపిణీ కార్యక్రమంలో భాగంగా లబ్ధిదారుల ఇళ్లకు వెళ్లి సీఎం చంద్రబాబు స్వయంగా పింఛన్ అందించనున్నారు. ప్రభుత్వం ప్రతి నెలా పింఛన్లను సకాలంలో అందించడంపై దృష్టి పెడుతున్న నేపథ్యంలో.. ముఖ్యమంత్రి స్వయంగా లబ్ధిదారులను కలుసుకోవడం ప్రాధాన్యత సంతరించుకుంది. పింఛన్ పంపిణీతో పాటు..లబ్ధిదారుల కుటుంబ పరిస్థితులు, వారికి అందుతున్న ఇతర సంక్షేమ పథకాలపై కూడా సీఎం ఆరా తీయనున్నారు.

బహిరంగ సభలో ప్రసంగించనున్న సీఎం చంద్రబాబు.. 
మధ్యాహ్నం 12 గంటల 15 నిమిషాలకు రేపల్లెలో ఏర్పాటు చేసిన ప్రజావేదిక సభలో ముఖ్యమంత్రి పాల్గొని ప్రసంగిస్తారు. ఈ సందర్భంగా ప్రభుత్వ సంక్షేమ కార్యక్రమాలు, పేదల కోసం అమలు చేస్తున్న పథకాలు, వాటి ద్వారా లబ్ధిదారులకు అందుతున్న ప్రయోజనాలను వివరించే అవకాశం ఉంది. రేపల్లె ప్రాంత అభివృద్ధికి సంబంధించిన అంశాలను కూడా సీఎం ప్రస్తావించే అవకాశం ఉంది.

ఎన్టీఆర్‌ భరోసా పెన్షన్లు పంపిణీచేయనున్న సీఎం..
అనంతరం మధ్యాహ్నం 3 గంటల 25 నిమిషాలకు రేపల్లె నియోజకవర్గానికి చెందిన టీడీపీ నేతలు, కార్యకర్తలతో ముఖ్యమంత్రి చంద్రబాబు సమావేశమవుతారు. నియోజకవర్గంలో పార్టీ పరిస్థితి, స్థానికంగా ఎదురవుతున్న అంశాలు, ప్రజా సమస్యలు, ప్రభుత్వ కార్యక్రమాల అమలు తదితర అంశాలపై నేతలతో చర్చించనున్నారు. స్థానిక సంస్థల ఎన్నికల నేపథ్యంలో పార్టీ శ్రేణులతో సీఎం సమావేశం కావడం కూడా ప్రాధాన్యత సంతరించుకుంది.

రేపల్లె పర్యటనలో సీఎం చంద్రబాబు పలు కార్యక్రమాల్లో పాల్గొన్న అనంతరం సాయంత్రం 5 గంటల 20 నిమిషాలకు ఉండవల్లి క్యాంప్ కార్యాలయానికి చేరుకుంటారు. మొత్తంగా పేదల సేవలో కార్యక్రమం ద్వారా సంక్షేమ పథకాల అమలును క్షేత్రస్థాయిలో పరిశీలించడంతో పాటు.. లబ్ధిదారులతో నేరుగా మాట్లాడేందుకు సీఎం రేపల్లె పర్యటన వేదిక కానుంది.