Janasena Municipal Election: ఆంధ్రప్రదేశ్ పురపోరులో జనసేన పార్టీ చారిత్రాత్మక విజయం..100% స్ట్రైక్ రేట్‌తో మరో సరికొత్త రికార్డు!

Janasena Municipal Election Strike Rate: ఆంధ్రప్రదేశ్ పురపాలక, నగరపాలక సంస్థల ఎన్నికల ఫలితాల్లో ఏపీ డిప్యూటీ సీఎం పవన్ కళ్యాణ్ స్థాపించిన జనసేన పార్టీ జైత్రయాత్రను విజయవంతంగా కొనసాగించింది. గత అసెంబ్లీ, పార్లమెంటు ఎన్నికల్లో సాధించిన 100 శాతం విజయవంతమైన ట్రాక్ రికార్డును తిరగరాస్తూ, ఈ పురపోరులోనూ ఆ పార్టీ సంచలన ఫలితాలను రాబట్టింది.

ఎన్డీఏ కూటమి పొత్తు ఒప్పందంలో భాగంగా జనసేన పార్టీకి మొత్తం 4 కార్పొరేషన్లు, 18 మున్సిపాలిటీలు, 3 నగర పంచాయతీల స్థానాలు దక్కాయి. వీటిలో ఇప్పటివరకు పోలింగ్, ఎన్నికల ప్రక్రియ పూర్తయిన 2 కార్పొరేషన్లు (విజయవాడ, ఏలూరు), 15 మున్సిపాలిటీలు, 3 నగర పంచాయతీ స్థానాల్లోనూ జనసేన అభ్యర్థులు ఘనవిజయం సాధించి నూటికి నూరు శాతం ఫలితాలను రాబట్టడం విశేషం.

విజయవాడ మేయర్ పీఠం కైవసం..
ఈ స్థానిక ఎన్నికలను పార్టీ విస్తరణకు జనసేన పార్టీ వ్యూహాత్మకంగా ఉపయోగించుకుంది. పార్టీకి నియోజకవర్గ స్థాయిలో నేరుగా ఎమ్మెల్యే ప్రాతినిధ్యం లేని కీలకమైన విజయవాడ నగరంలో మేయర్ పీఠాన్ని దక్కించుకోవడం ప్రధాన మైలురాయిగా నిలిచింది. విజయవాడలో వంగవీటి రాధాను బరిలో నిలిపి శ్రేణుల్లో నూతనోత్సాహాన్ని నింపింది. ఏలూరుతో పాటు శ్రీకాకుళం కార్పొరేషన్‌లో పోటీ చేసి తన రాజకీయ పునాదులను విస్తరించుకుంది.

100% Strike rate Again ! 3/3 Nagar Panchayat chairmans ✅ 2/2 Mayors ✅ 15/15 Municipal Chairmans ✅ #JanaSenaStrikesAgain https://t.co/17AoedLLUU

— JanaSena Party (@JanaSenaParty) November 3, 2026

పార్టీకి సొంత ఎమ్మెల్యేలు ఉన్న తెనాలి, పిఠాపురం, పాలకొండ, భీమవరం, నరసాపురం నియోజకవర్గాలతో పాటు తుని, సామర్లకోట, దర్శి, తిరువూరు, చిలకలూరిపేట, ముమ్మిడివరం, అమలాపురం, పెడన, మడకశిర, పుట్టపర్తి, పుత్తూరు మున్సిపాలిటీల్లోనూ విజయం సాధించి కొత్త ప్రాంతాలకు శ్రేణులను విస్తరించింది. తెలుగు దేశం పార్టీ, వైఎస్సార్ కాంగ్రెస్ పార్టీ నుంచి వచ్చిన కొత్త నాయకులకు అవకాశాలు కల్పించడం ఈ 100 శాతం విజయానికి ఎంతగానో దోహదపడింది.

పిఠాపురంలో సంపూర్ణ ఆధిపత్యం
ఆంధ్రప్రదేశ్ ఉప ముఖ్యమంత్రి పవన్ కల్యాణ్ ప్రాతినిధ్యం వహిస్తున్న పిఠాపురం మున్సిపాలిటీలో కూటమి భాగస్వాములు సంపూర్ణ మెజార్టీని సొంతం చేసుకున్నారు. పిఠాపురం మున్సిపాలిటీలోని మొత్తం 36 వార్డుల్లో 3 స్థానాలు ఇప్పటికే జనసేన పార్టీకి ఏకగ్రీవమయ్యాయి. మిగిలిన 33 వార్డుల పోలింగ్ ఫలితాలలో జనసేన 16 వార్డులు, తెలుగుదేశం 5, భారతీయ జనతా పార్టీ 1, వైఎస్సార్ సీపీ 1 స్థానాన్ని గెలుచుకున్నాయి.

మిగిలిన 10 వార్డుల్లో స్వతంత్ర అభ్యర్థులు (వారిలో 8 మంది కూటమి రెబల్స్, 2 మంది వైకాపా రెబల్స్) విజయం సాధించారు. పిఠాపురం జనసేన ఛైర్మన్ అభ్యర్థి దానం లాజార్‌బాబు తన సమీప ప్రత్యర్థి పెదపాటి రాజేష్‌కుమార్‌పై 9,235 ఓట్ల భారీ మెజారీటీతో విజయం సాధించి ఛైర్మన్ పీఠాన్ని దక్కించుకున్నారు. ఈ చారిత్రాత్మక విజయంతో జనసేన అధినేత పవన్ కళ్యాణ్, పార్టీ నాయకులు, జనసైనికులు ఫుల్ జోష్‌లో ఉన్నారు.