MLA Kolikapudi Controversy: వివాదంలో టీడీపీ ఎమ్మెల్యే కొలికపూడి శ్రీనివాసరావు..టీచర్‌పై దాడి ఆరోపణలు..ఎమ్మెల్యే వివరణ!

Kolikapudi Srinivasa Rao Controversy: ఆంధ్రప్రదేశ్‌లోని తిరువూరు నియోజకవర్గ టీడీపీ ఎమ్మెల్యే కొలికపూడి శ్రీనివాసరావు మరోసారి వివాదంలో చిక్కుకున్నారు. విస్సన్నపేట మండలం నరసాపురం జెడ్పీ హైస్కూల్‌లో పీఈటీగా పనిచేస్తున్న మేరుగు రమేష్ అనే ఉపాధ్యాయుడిని ఈ నెల 25న ఎమ్మెల్యే తన ఇంటికి పిలిపించుకున్నారని సమాచారం. అక్కడ రమేష్‌ను దుర్భాషలాడి కర్రతో కొట్టారని ఆరోపిస్తూ ఏపీ టీడీపీ అధ్యక్షుడు పల్లా శ్రీనివాసరావుకు ఏపీ సామాజిక సంక్షేమ బోర్డు చైర్మన్ పోతుల బాలకోటయ్య లేఖ రాశారు.

రమేష్‌తో పాటు అదే పాఠశాల ప్రధానోపాధ్యాయురాలిని కూడా డిప్యూటీ డీఈవో ద్వారా పిలిపించి ఎమ్మెల్యే తిట్టారని, బాధితులిద్దరూ ఎస్సీ సామాజిక వర్గానికి చెందినవారని ఫిర్యాదులో పేర్కొన్నారు

వివాదానికి ప్రధాన కారణం..
నరసాపురం పాఠశాలలో ఇటీవల నిర్వహించిన ఆటల పోటీలకు ఎమ్మెల్యే కొలికపూడిని కాకుండా, స్థానిక టీడీపీ నేతను ముఖ్య అతిథిగా ఆహ్వానించారనే కోపంతోనే ఎమ్మెల్యే ఈ చర్యకు పాల్పడ్డారని బాలకోటయ్య తన లేఖలో ఆరోపించారు. ఎమ్మెల్యే ప్రవర్తన వల్ల పార్టీకి, ప్రభుత్వానికి చెడ్డపేరు వస్తోందని, ఆయనపై తక్షణమే చర్యలు తీసుకోవాలని కోరారు.

ఎమ్మెల్యే కొలికపూడి శ్రీనివాసరావు వాదన..
ఈ ఆరోపణలపై టీడీపీ ఎమ్మెల్యే కొలికపూడి శ్రీనివాసరావు స్పందిస్తూ తాను ఎవరినీ కొట్టలేదని, మందలించలేదని స్పష్టం చేశారు. పీఈటీ రమేష్‌పై అదే స్కూల్‌లో పనిచేసే మరో ఉపాధ్యాయుడిని కొట్టారనే ఆరోపణలు ఉన్నాయని తెలిపారు. అంతేకాకుండా, ఉపాధ్యాయులు లేదా తల్లిదండ్రుల పర్యవేక్షణ లేకుండా విద్యార్థినులను ఇతర ప్రాంతాలకు పంపించారని ఆరోపించారు. 

గతేడాది పదో తరగతి ఫలితాల్లో 22 మందికి గాను 11 మంది ఫెయిల్ అవ్వడానికి పీఈటీ తీరే కారణమని విమర్శించారు. పాఠశాలలో జరుగుతున్న అంశాలపై చర్చించేందుకే డిప్యూటీ డీఈవో, ఎంఈవో, హెచ్‌ఎం, పీఈటీ రమేష్‌లను ఇంటికి పిలిచి గట్టిగా అడిగి పంపాన తప్ప ఎవరినీ కొట్టలేదని వివరించారు.

గత వివాదాలు..
కొలికపూడి శ్రీనివాసరావు గతంలో ఎంపీ కేశినేని చిన్నితో విభేదాలు, నియోజకవర్గానికి సంబంధించిన పలు అంశాల్లో వివాదాస్పదమయ్యారు. ఇటీవల మంత్రి గొట్టిపాటి రవికుమార్ తిరువూరు పర్యటనలో ఎమ్మెల్యే కొలికపూడి, ఎంపీ కేశినేని చిన్ని ఒకే కార్యక్రమంలో పాల్గొన్నప్పటికీ ఇద్దరూ ఎడమొహం పెడమొహంగా ఉన్నట్లు తెలుస్తోంది. ఈ తాజా వివాదంపై టీడీపీ అధిష్టానం ఎలాంటి చర్యలు తీసుకుంటుందో వేచి చూడాలి.