Srisailam Karthika Masam: కార్తీక మాసం వేళ శ్రీశైలం వెళ్లే భక్తులకు అలర్ట్.. పరమశివుడి దర్శనం, సేవలపై కీలక మార్పులు!

Srisailam Karthika Masam 2026: శ్రీశైల మహాక్షేత్రంలో కార్తీక మాసోత్సవాలకు రంగం సిద్ధమైంది. నవంబర్ 10 నుంచి డిసెంబర్ 9 వరకు నెల రోజుల పాటు జరిగే ఈ ఉత్సవాలకు దేశంలోని వివిధ ప్రాంతాల నుంచి పెద్ద సంఖ్యలో భక్తులు తరలివచ్చే అవకాశం ఉంది. ఈ నేపథ్యంలో భక్తులకు మెరుగైన సౌకర్యాలు కల్పించడంతో పాటు, సాధారణ భక్తులకు ప్రాధాన్యత ఇచ్చేలా దేవస్థానం పలు కీలక నిర్ణయాలు తీసుకుంది.

పంచమఠాల్లో రూ.216కే అభిషేకం
కార్తీక మాసంలో స్వామివారికి అభిషేకం చేయించుకోవాలనుకునే భక్తుల కోసం శ్రీశైల దేవస్థానం ప్రత్యేక అవకాశం కల్పించింది. చారిత్రక ప్రాధాన్యం కలిగిన పంచమఠాల్లో ఆర్జిత అభిషేక సేవలను అందుబాటులోకి తీసుకొచ్చింది. ఈ సేవకు టికెట్ ధరను కేవలం రూ.216గా నిర్ణయించారు. ఒక్క టికెట్‌పై ఒక వ్యక్తి లేదా దంపతులు అభిషేకంలో పాల్గొనవచ్చు.

భక్తులు ముందుగానే టికెట్లు పొందేందుకు డిజిటల్ బుకింగ్ సౌకర్యం కూడా కల్పించారు. ఇందుకోసం 'మనమిత్ర' వాట్సాప్ నంబర్ 9552300009ను లేదా ఏపీటీఎస్ అధికారిక వెబ్‌సైట్ www.tms.ap.gov.inను వినియోగించుకోవచ్చు. రద్దీ సమయంలో టికెట్ల కోసం ఇబ్బందులు పడకుండా ముందస్తు బుకింగ్ చేసుకోవడం మంచిది.

ఏ సేవలు తాత్కాలికంగా నిలిపివేశారు?
కార్తీక మాసంలో భక్తుల రద్దీ ఎక్కువగా ఉండే రోజుల్లో కొన్ని ఆర్జిత సేవలను తాత్కాలికంగా నిలిపివేయాలని అధికారులు నిర్ణయించారు. ఇందులో భాగంగా రూ.5,000 గర్భాలయ అభిషేకాలు, రూ.1,500 సామూహిక అభిషేకాలు అందుబాటులో ఉండవు. ఉదయాస్తమాన సేవ, ప్రాతఃకాల సేవ, ప్రదోషకాల సేవల టికెట్లను కూడా నిలిపివేస్తున్నట్లు ప్రకటించారు. అమ్మవారి అంతరాలయంలో నిర్వహించే రూ.1,000 కుంకుమార్చన సేవలోనూ మార్పు చేశారు. భక్తుల రద్దీని నియంత్రించేందుకు ఈ సేవను ఆశీర్వచన మండపంలో నిర్వహించనున్నారు.

యథావిధిగా కొనసాగనున్న సేవలు
ఆర్జిత హోమాలు, కల్యాణోత్సవ సేవలను మాత్రం ఎలాంటి మార్పులు లేకుండా కొనసాగించనున్నారు. కార్తీక మాసంలో శ్రీశైలం వెళ్లాలని భావిస్తున్న భక్తులు ప్రయాణానికి ముందే సేవల వివరాలు, టికెట్ లభ్యత, దర్శన ఏర్పాట్లను అధికారిక మార్గాల ద్వారా నిర్ధారించుకోవాలి.