YS Jagan: మనం ప్రజాస్వామ్యంలో ఉన్నామా..?.. ఏపీ హింసాత్మక ఘటనలపై వైఎస్ జగన్ సంచలన వ్యాఖ్యలు..

YS Jagan fires on ap cm Chandrababu naidu over ap local body polls row: ఆంధ్ర ప్రదేశ్ లో రాజకీయాలు ఒక్కసారిగా హీటెక్కాయి. స్థానిక సంస్థల నామినేషన్ వేళ ఏపీలో పలు చోట్ల హింసాత్మక ఘటనలు చోటు చేసుకున్నాయి. ముఖ్యంగా పుంగనూరు, కడపతో పాటు పలు చోట్ల కూటమి వర్సెస్ వైఎస్సార్సీపీ కార్యకర్తల మధ్య తోపులాట  జరిగింది.పులివెందులలో పోలీసులు గాల్లో  ఏకంగా ఆరురౌండ్ల కాల్పులు జరిపారు. కొన్ని చోట్ల నామినేషన్ కేంద్రాల్లో పరస్పరం దాడులు, నామినేషన్లను చింపివేయడం వంటి ఘటనలు వెలుగులోకి వచ్చాయి. 

పోలీసులు లాఠీలకు పనిచెప్పి శాంతి భద్రతల సమస్యలు రాకుండా చర్యలు తీసుకున్నారు. టీడీపీ, వైసీపీ పరస్పరం ఎస్ ఈసీలకు ఫిర్యాదు చేసుకున్నాయి. ఈ క్రమంలో ఏపీలో ప్రస్తుతం రాజకీయాలు నివురు కప్పిన నిప్పులా ఉన్నాయి. తాడేపల్లి పార్టీ కేంద్ర కార్యాలయం నుంచి మాజీ సీఎం వైఎస్ జగన్ మీడియా సమావేశంలో మాట్లాడారు. ఏపీలో స్థానిక సంస్థల నామినేషన్ ల వేళ జరిగిన హింసాత్మక ఘటనలపై మండిపడ్డారు. 

అసలు రాజ్యాంగబద్ధ పాలనలో ఉన్నామా..?.. ఏపీరాష్ట్రంలో చట్టం న్యాయం ఉందా..?.. అంటూ సీఎం చంద్రబాబుపై తీవ్ర స్థాయిలో ధ్వజమెత్తారు. స్థానిక సంస్థల్లో కనీసం  అపోసిషన్ పార్టీలకు నామినేషన్లు కూడా వెయ్యనివ్వడం లేదంటూ ఆవేదన వ్యక్తం చేశారు. రాష్ట్ర ఎన్నికల కమిషన్ కూడా చంద్రబాబు చెప్పినట్టే వింటుందంటూ మండిపడ్డారు. దీనిపై ప్రతి ఒక్కరు గమనించాలని, ప్రతిదీ వాస్తవమే మాట్లాడుతున్నట్లు చెప్పుకొచ్చారు.

నారాసురుడు రక్త చరిత్ర రాస్తూ ఈ స్థానిక సంస్థల ఎన్నికలు జరుపుతున్నాడంటూ చంద్రబాబుపై విమర్శలు గుప్పించారు. వెన్నుపోటు పార్టీ నాయకుడు.. గొడ్డళ్లను సప్లై చేసే నాయకుడు అధర్మ చరిత్ర, రక్త చరిత్ర రాస్తున్నాడంటూ ఏపీ ప్రభుత్వంను ఏకీపారేశారు. అసలు.. ఇది ధర్మమేనా.. న్యాయమేనా అని ప్రజలు ఆలోచన చేయాలంటూ వైఎస్ జగన్ కోరారు. 

ఒకవేళ చంద్రబాబుకు.. ప్రజల మద్దతు నీకుందని భావిస్తే.. ఎందుకు నామినేష‌న్లు వేయ‌నీయ‌డం లేదంటూ జగన్ ప్రశ్నలు సంధించారు. పోలీసుల‌ను అడ్డుపెట్టుకొని దాడులు చేయిస్తున్నారని,అడ్డ‌గోలు దొంగ కేసులు పెట్టి కిడ్నాప్ చేయిస్తున్నాడంటూ మండిపడ్డారు.

రాష్ట్ర ఎన్నికల కమిషనర్ అనిల్ చంద్ర పునేఠా అనేవాడు చంద్రబాబుకు అభిమానంలో కరుడు గట్టిన ఉగ్రవాది లాంటోడని మండిపడ్డారు. అలాంటి వ్యక్తిని రిటైర్డ్ అయినా మళ్లీ పిలిచి ఈసీ బాధ్యతలు ఇస్తే, ఆయన గారి ఆధ్వర్యంలో ఎన్నికలు అంటే ఇలాగే ఉంటుందంటూ సెటైర్లు వేశారు.

 కేవలం రెండు రోజుల క్రితం రిజర్వేషన్లను ప్రకటించి, కేవలం 24 గంటల వ్యవధిలోనే నామినేషన్లు ప్రక్రియను ప్రారంభించడం ఏంటని మండిపడ్డారు. అపొసిషన్ పార్టీకి కనీసం అభ్యర్థిని ఎంచుకునే సమయం కూడా ఇవ్వలేదని మండిపడ్డారు. 

రాష్ట్రంలో ఎస్ఈసీ నిద్రపోతుందంటూ ఘాటు వ్యాఖ్యలు చేశారు. గతంలో నిమ్మగడ్డ రమేష్ కుమార్ కు ఎస్ఈసీగా ఉన్నారని, ఆయన ఎస్పీలను కలెక్టర్లను సైతం బదిలీచేశారని గుర్తు చేశారు. తాము గతంలో 13 మున్సిపల్ కార్పోరేషన్లు క్లీన్ స్వీప్ చేశామని, 85 శాతం డివిజన్లను కైవసం చేసుకున్నామని వైఎస్ జగన్ గుర్తు చేశారు.