Tirupati Rain: తిరుపతిలో కుండపోత వర్షం.. జలమయమైన పలు కాలనీలు

Rain Alert To Tirupati: ఎండ వేడిమి.. అధిక ఉష్ణోగ్రతలు.. ఉక్కపోతతో అల్లాడుతున్న తిరుపతి ప్రజలకు ఊరట లభించింది. తిరుపతిలో ఒక్కసారిగా భారీ వర్షం కురిసింది. సాయంత్రం పూట ఆకాశం మేఘావృతమై కారుమబ్బులు కమ్ముకున్నాయి. అనంతరం కొన్ని నిమిషాల్లోనే భారీ వర్షం పడింది. అకస్మాత్తుగా కురిసిన వర్షంతో తిరుపతి నగరం జలమయమైంది. నగరంలోని పలు ప్రాంతాలు జలమయమయ్యాయి. విధులు ముగించుకుని గమ్యస్థానాలకు చేరుకుంటున్న సమయంలో వర్షం పడడంతో వాహనదారులతోపాటు స్థానికులు తీవ్ర ఇబ్బందులు ఎదుర్కొన్నారు.

తిరుపతిలో సోమవారం సాయంత్రం వాతావరణం ఒక్కసారిగా మారిపోయి ఉరుములు, మెరుపులతో కూడిన భారీ వర్షం కురిసింది. కొద్దిసేపు కుండపోతగా వర్షం పడడంతో డ్రైనేజీలు పొంగిపొర్లాయి.. రోడ్లపైకి వర్షపు నీరు చేరడంతో వాహనాల రాకపోకలకు అంతరాయం ఏర్పడింది. డీఆర్ మహల్, లీలామహల్ సెంటర్‌తో పాటు పలు ప్రధాన రహదారుల్లో భారీగా వర్షపు నీరు చేరింది. దీంతో వాహనదారులు, స్థానికులు ఇబ్బందులు ఎదుర్కొన్నారు.

డీఆర్ మహల్ ప్రాంతంలో రహదారిపై భారీగా నీరు నిలిచిపోయింది. లీలామహల్ సెంటర్‌లోనూ ఇదే పరిస్థితి కనిపించింది. పలు లోతట్టు ప్రాంతాల్లో వర్షపు నీరు చేరడంతో ప్రజలు అప్రమత్తమయ్యారు. తిరుపతితో పాటు పరిసర ప్రాంతాల్లోనూ వర్ష ప్రభావం కనిపించింది. భారీ వర్షం కారణంగా ప్రధాన రహదారులపై నీరు నిలవడంతో ట్రాఫిక్ నెమ్మదించింది. బంగాళాఖాతంలో ఏర్పడిన అల్పపీడన ప్రభావంతో ఆంధ్రప్రదేశ్‌లో రానున్న రోజుల్లోనూ వర్షాలు కొనసాగే అవకాశం ఉందని వాతావరణ శాఖ తెలిపింది. రాయలసీమకు భారీ వర్షాలు, ఉరుములు, మెరుపులు, ఈదురుగాలుల హెచ్చరిక జారీ చేసింది.

వాయుగుండం కారణంగా సెప్టెంబర్ 22 నుంచి 25వ తేదీ వరకు విశాఖపట్నం, శ్రీకాకుళం, విజయనగరం, అనకాపల్లి, అల్లూరి సీతారామరాజు, పార్వతీపురం, కోనసీమ, తూర్పు గోదావరి, పశ్చిమ గోదావరి మరియు ఏలూరు జిల్లాల్లో అతి భారీ వర్షాలు కురుస్తాయని వాతావరణ శాఖ హెచ్చరించింది. అరకు, మారేడుమిల్లి, వనజంగి, ఒడిశా ప్రాంతాలకు పర్యటనలకు వెళ్లేవారు సెప్టెంబర్ 22-25 మధ్య ఆ ప్రయాణాలను కచ్చితంగా వాయిదా వేసుకోవాలని వాతావరణ శాఖ అధికారులు సూచించారు.