Gold Crown Donation: ఇంద్రకీలాద్రి కనకదుర్గమ్మకు బంగారు కిరీటం విరాళం.. ఎంత విలువ అంటే?

Vijayawada Kanaka Durga Gold Crown: దసరా శరన్నవరాత్రి ఉత్సవాలు విజయవాడలోని ఇంద్రకీలాద్రిపై కొలువుదీరిన కనకదుర్గ అమ్మవారి ఆలయంలో భక్తిశ్రద్ధలతో.. అంగరంగ వైభవంగా జరుగుతున్నాయి. రోజుకో రూపంలో అమ్మవారు దర్శనమిస్తుండగా.. పెద్ద ఎత్తున భక్తులు, ప్రముఖులు తరలివస్తున్నారు. ఈ క్రమంలో కనకదుర్గమ్మకు భారీ కానుక వచ్చింది. ఓ భక్తుడు అమ్మవారికి బంగారు కిరీటం బహూకరించాడు. ధగధగలాడుతున్న ఆ బంగారు కిరీటాన్ని అమ్మవారికి సమర్పించాడు. పూర్తి వివరాలు ఇలా ఉన్నాయి.

దాత ఎవరంటే?
దుర్గా మల్లేశ్వర స్వామి వార్ల దేవస్థానంలో అత్యంత వైభవంగా జరుగుతున్న దసరా శరన్నవరాత్రి మహోత్సవాల వేళ ఇంద్రకీలాద్రిపై కొలువుదీరిన జగన్మాత శ్రీ కనకదుర్గ అమ్మవారికి గురువారం ఉదయం విశేష స్వర్ణ కానుక సమకూరింది. శ్రీకాకుళం పట్టణానికి చెందిన భక్తులు కూర్మినాయుడు, పద్మావతమ్మ దంపతుల కుమారుడు కె. దుర్గా శ్రీనివాస్ అమ్మవారికి దివ్య స్వర్ణ కిరీటాన్ని భక్తిప్రపత్తులతో సమర్పించారు. ఈ బంగారు కిరీటం విలువ సుమారు రూ.75 లక్షలు ఉంటుంది.

కిరీటం విశేషాలు
ఎరుపు, నీలం, తెలుపు, పచ్చ రాళ్లతో అద్భుతంగా తీర్చిదిద్దిన ఈ బంగారం కిరీటం బరువు 494 గ్రాములు ఉంది. ఈ నవరత్న ఖచిత బంగారు కిరీటాన్ని దాతలు ఆలయ అధికారులకు అందజేశారు. బంగారు కిరీటాన్ని ఆలయ కార్యనిర్వహణాధికారి వి.కె. శీనా నాయక్, దసరా చీఫ్ ఫెస్టివల్ ఆఫీసర్ వి. త్రినాథరావుకు భక్తుడు సమర్పించారు. ​అనంతరం దాత కుటుంబసభ్యులు అంతరాలయంలో అమ్మవారిని దర్శనం చేసుకుని మొక్కులు తీర్చుకున్నారు. దర్శనానంతరం వేద పండితులు వేదాశీర్వచనం అందించారు. ​ఈ సందర్భంగా దాత కె. దుర్గా శ్రీనివాస్ మాట్లాడుతూ.. కనకదుర్గమ్మ దయతోనే తాము ఈ బంగారు కిరీటాన్ని కానుకగా సమర్పించుకున్నామని తెలిపారు. పవిత్రమైన దసరా శరన్నవరాత్రుల పర్వదినాల్లో అమ్మవారికి స్వర్ణ కిరీటం బహూకరించే భాగ్యం కల్పించారని పేర్కొన్నారు.

కొనసాగుతున్న నవరాత్రి ఉత్సవాలు
మరోవైపు విజయవాడ ఇంద్రకీలాద్రిపై దసరా శరన్నవరాత్రి మహోత్సవాలు భక్తిశ్రద్ధలతో కొనసాగుతున్నాయి. ఈ క్రమంలో జగన్మాత కనకదుర్గమ్మ లలితా త్రిపుర సుందరీ దేవి అలంకారంలో భక్తులకు దర్శనమిచ్చారు. సకల శుభాలను ప్రసాదించే అమ్మవారిని దర్శించుకునేందుకు భక్తులు పెద్ద సంఖ్యలో ఇంద్రకీలాద్రికి తరలివస్తున్నారు. అమ్మవారి దివ్య మంగళ స్వరూపాన్ని దర్శించుకుని భక్తులు భక్తిపారవశ్యంలో మునిగిపోతున్నారు. అమ్మవారి నామస్మరణతో ఇంద్రకీలాద్రి ఆధ్యాత్మిక శోభను సంతరించుకుంది.

చిన్నజీయర్‌ స్వామి బృందం దర్శనం
ఇంద్రకీలాద్రిపై కొలువుదీరిన కనకదుర్గమ్మను చిన్న జీయర్ స్వామి బృందం దర్శించుకుంది. దేవీ నవరాత్రి ఉత్సవాల సందర్భంగా అమ్మవారికి ప్రత్యేక సారె సమర్పించారు. ప్రతి ఏటా నవరాత్రుల సందర్భంగా సారె సమర్పించడం ఆనవాయితీగా వస్తోంది. చిన్నజీయర్‌ స్వామి బృందం అమ్మవారిని దర్శనం చేసుకున్నారు. విజయవాడ ప్రజలతో పాటు లోకమంతా సుఖసంతోషాలతో ఉండాలని చినజీయర్‌ స్వామి బృందం ఆకాంక్షించింది.