Prashna Ravan Funds: యూట్యూబర్ ప్రశ్న రావణ్ ఖాతాలో భారీగా విదేశీ నిధులు..పోలీసు విచారణ పెద్ద గుట్టు రట్టు!

Prashna Ravan Funds Case: పోలీసు దర్యాప్తులో యూట్యూబర్‌ ప్రశ్న రావణ్‌ ఖాతాలోకి విదేశాల నుంచి భారీగా నిధులు తరలినట్లు ఆధారాలు లభించాయి. విదేశాల నుంచి విడతల వారీగా రూ.29 లక్షలకు పైగా ఆయన ఖాతాలో జమ కాగా, అందులోనూ ప్రధానంగా ఒకే వ్యక్తితో ఎక్కువ సంఖ్యలో ఆర్థిక లావాదేవీలు జరిగినట్లు అధికారులు గుర్తించారు. 

అయితే, ఈ ఆర్థిక లావాదేవీల మూలాల గురించి పోలీసులు ఎంత ప్రశ్నించినప్పటికీ రావణ్‌ నోరు విప్పకుండా మౌనం వహించినట్లు సమాచారం. నిషేధిత మావోయిస్టు భావజాలాన్ని వ్యాప్తి చేయడం, రాష్ట్రంలోని కూటమి ప్రభుత్వాన్ని, కీలక నేతలను లక్ష్యంగా చేసుకుని వీడియోలు రూపొందించడం కోసమే ఈ నిధులు సమకూరినట్లు దర్యాప్తు అధికారులు అనుమానిస్తున్నారు.

వైకాపా నేతతో ఆర్థిక లావాదేవీలు
విదేశీ నిధులతో పాటు, వైకాపా నేత ఇంద్రసేనా నాయుడు ఖాతా నుంచి కూడా పలు దఫాలుగా దాదాపు రూ.25 లక్షల వరకు రావణ్‌కు బదిలీ అయినట్లు విచారణలో తేలింది. అంతేకాకుండా, రావణ్‌ వివిధ ప్రాంతాలకు ప్రయాణించడానికి అవసరమైన విమాన టికెట్లను సైతం ఇంద్రసేనా నాయుడే బుక్‌ చేసినట్లు వెల్లడైంది. ఇంద్రసేనాకు చెందిన ఫ్లాట్‌ నుంచే రావణ్‌ తన 'ప్రశ్న' అనే యూట్యూబ్‌ ఛానల్‌ కార్యకలాపాలను నిర్వహించడం ఇక్కడ గమనార్హం.

మావోయిస్టులతో సంబంధాలు, పర్యటనలు
మావోయిస్టు ప్రభావిత ప్రాంతాల్లో రావణ్‌ పలుమార్లు పర్యటించినట్లు పోలీసుల దర్యాప్తులో స్పష్టమైంది. ఆంధ్రప్రదేశ్, తెలంగాణ, ఒడిశా రాష్ట్రాల్లోని మావోయిస్టుల ప్రభావం అధికంగా ఉన్న ప్రాంత సందర్శనలతో పాటు, అక్కడి సానుభూతిపరులతో ఫోన్లలో తరచూ సంభాషించినట్లు బలమైన ఆధారాలు లభించాయి. 

ఏజెన్సీ ప్రాంతాల్లోని కొందరు వ్యక్తులతో కూడా ఆయనకు సంబంధాలు ఉన్నట్లు దర్యాప్తు సంస్థలు గుర్తించాయి. నిషేధిత మావోయిస్టు ఉద్యమాన్ని, అగ్రనేతలను కీర్తిస్తూ తన యూట్యూబ్‌ ఛానల్‌లో అనేక వీడియోలను రూపొందించినట్లు విచారణలో బయటపడింది.

వీడియోల నిర్మాణం, ప్రచారం, కుట్ర
మావోయిస్టు భావజాలాన్ని, సాయుధ పోరాటాన్ని ప్రచారం చేసే దిశగా వీడియోల తయారీ, ఎడిటింగ్‌, ప్రచార కార్యక్రమాలలో రావణ్‌ కీలక పాత్ర వహించాడని పోలీసులు భావిస్తున్నారు. రాష్ట్రంలోని కూటమి ప్రభుత్వం, కీలక నాయకులే లక్ష్యంగా వీడియోలు తయారు చేసేందుకు ఈ నిధులు సమకూరినట్లు ఆధారాలు లభించాయి. దీనితో పాటు రావణ్‌ యూట్యూబ్‌ ఛానల్‌ సబ్‌స్క్రైబర్లలో పెద్ద సంఖ్యలో నకిలీ ఖాతాలు ఉన్నాయనే అనుమానాలు వ్యక్తమవుతున్నాయి. ఈ క్రమంలో కేసులోని అన్ని అంశాలపై పోలీసులు ప్రస్తుతం మరింత లోతుగా దర్యాప్తు జరుపుతున్నారు.