Pithapuram Temples: టెంపుల్ టూరిజంగా ‘పీఠికాపురం’.. పవన్ కళ్యాణ్ మాస్టర్ ప్లాన్

Pithapuram Temples: పీఠికాపురం...మహారాజుల పరిపాలనలో వెలిగిపోయిన దివ్య క్షేత్రం. పిఠాపురం సంస్థానాధీశులు ఉమ్మడి తూర్పుగోదావరి జిల్లాలో ఆలయాల అభివృద్ధికి వందల ఎకరాల భూములు, నిధులు రాసిచ్చారు. ఇప్పుడు అదే రాజవంశపు దాతృత్వాన్ని, ఆధ్యాత్మిక వారసత్వాన్ని పునికిపుచ్చుకున్నారు డిప్యూటీ సీఎం పవన్ కళ్యాణ్. పిఠాపురం కోటలో జనసేన జెండా ఎగరేసిన ఆయన, నియోజకవర్గాన్ని ఆధ్యాత్మిక రాజధానిగా తీర్చిదిద్దేందుకు పెద్ద ఎత్తున నిధులు మంజూరు చేయిస్తున్నారు.

పిఠాపురం నియోజకవర్గ పరిధిలోని ప్రతి గ్రామంలోనూ భక్తి పారవశ్యం వికసించబోతోంది. శ్రీవాణి ట్రస్ట్ ద్వారా ఏకంగా 48 నూతన రామాలయాల నిర్మాణానికి 13 కోట్ల 10 లక్షల తిరుమల తిరుపతి దేవస్థాన నిధులను పవన్ కళ్యాణ్ మంజూరు చేయించారు. పిఠాపురం, గొల్లప్రోలు, యూ.కొత్తపల్లి మండలాల్లోని బీసీ, ఎస్సీ కాలనీల్లో ఈ రామాలయాలు కొలువుదీరనున్నాయి. దీంతో వాడవాడలా రామనామ స్మరణ మార్మోగనుంది

కేవలం ఆలయాల నిర్మాణమే కాదు..సామాజిక సంక్షేమానికి ఆలయ నిధులను జోడించారు పవన్ కళ్యాణ్. మత్స్యకారులు ఎక్కువగా నివసించే  యూ.కొత్తపల్లి ప్రాంతంలో ఎకరం విస్తీర్ణంలో రూ.2 కోట్లతో టిటిడి ఆధ్వర్యంలో అత్యాధునిక కళ్యాణ మండపానికి శ్రీకారం చుట్టారు. ఈ తీరప్రాంతంలో నిర్మితమవుతున్న మొట్టమొదటి కళ్యాణమండపం ఇదే కావడంతో పేద మత్స్యకార కుటుంబాలు హర్షం వ్యక్తం చేస్తున్నాయి. తమ పిల్లల పెళ్లిళ్లు సగౌరవంగా చేసుకోవడానికి ఇది ఎంతో ఉపయోగపడుతుందని ఆనందం వ్యక్తం చేస్తున్నారు.

దక్షిణ కాశీగా ప్రసిద్ధి చెందిన కుక్కుటేశ్వర స్వామి ఆలయం, పదవ శక్తిపీఠం పురుహుతికా అమ్మవారి దర్శనానికి దేశ విదేశాల నుంచి భక్తులు పోటెత్తుతారు. ఇక్కడ పిండప్రదానాలు చేయడం ఎంతో పుణ్యఫలంగా భావిస్తారు. అయితే స్థలం సరిపోక భక్తులు ఆరుబయట అల్లాడిపోయే పరిస్థితి ఉంది. ఈ సమస్యను గమనించిన పవన్ కళ్యాణ్, 5 కోట్లు కేటాయించి నూతన భవన రంగానికి పునాది వేశారు. ఈ భవనం అందుబాటులోకి వస్తే ఒకేసారి 500 మందికి పైగా భక్తులు పిండప్రదానాలు మరియు అన్నదానంలో పాల్గొనే సౌకర్యం కలగనుంది.

పవన్ కళ్యాణ్ దత్తపుత్రుడిగా ఆరాధించే శ్రీపాద శ్రీవల్లభ మహాసంస్థానానికి నిత్యం మహారాష్ట్ర, కర్ణాటక, గుజరాత్, తమిళనాడు రాష్ట్రాల నుంచి వేలాదిమంది భక్తులు వస్తుంటారు. ఉచిత వసతి, అన్నదాన సేవలు అందించే ఈ సంస్థాన అభివృద్ధికి డిప్యూటీ సీఎం రూ.2 కోట్లు కేటాయించారు. పవన్ కళ్యాణ్ సతీమణి అన్నా కొణిదల స్వయంగా ఈ ఆలయాన్ని సందర్శించి ఇక్కడి ఆధ్యాత్మిక వాతావరణానికి మంత్రముగ్ధులయ్యారు. ఈ నిర్మాణాలు పూర్తయితే విదేశాల నుంచి వచ్చే భక్తులకు కూడా వసతి లోటు తీరనుంది.

పంచ మాధవ క్షేత్రాలలో ఒకటైన పిఠాపురంలోని కుంతీ మాధవ స్వామి ఆలయంలోని పుష్కరిణి ఆకతాయిల అడ్డాగా మారడంపై చలించిపోయిన పవన్ కళ్యాణ్, వెంటనే దానికి పునర్వైభవం తీసుకురావాలని అధికారులను ఆదేశించారు. దీంతో పాటు రూ. 19.75 కోట్లతో జై గణేష్, సోమేశ్వర, సీతారామ, వేణుగోపాల, రామలింగేశ్వర, జగన్నాథ, వెంకటేశ్వర స్వామి ఆలయాలతో సహా మొత్తం 19 పురాతన ఆలయాలకు జీర్ణోద్ధరణ పనులు ప్రారంభమయ్యాయి. రాబోయే పుష్కరాల నాటికి ఈ పనులన్నీ పూర్తి చేయడానికి ప్రణాళికలు సిద్ధమయ్యాయి.

అన్నవరం సత్యదేవుని దర్శనానికి, ఇటు సామర్లకోట పంచారామ క్షేత్రానికి వెళ్లే భక్తులను ఆకట్టుకునేలా "స్పిరిచువల్ టూరిజం సర్క్యూట్" నిర్మిస్తున్నారు. దేవాదాయ, పర్యాటక శాఖల అధికారులతో రూట్ మ్యాప్ సిద్ధమవుతోంది. ఆలయాలకు శాశ్వత ఆర్థిక వనరులు సమకూరేలా, పిఠాపురం పేరు ప్రపంచ పటంలో నిలిచిపోయేలా పవన్ కళ్యాణ్ వేస్తున్న అడుగులపై సర్వత్రా ప్రశంసలు వ్యక్తమవుతున్నాయి. రాజకీయాలకు అతీతంగా ప్రత్యర్థి పార్టీల నేతలు సైతం 'శభాష్ పవన్' అని మెచ్చుకుంటున్నారు. ఏది ఏమైనా, పవన్ కళ్యాణ్ సంకల్పంతో పిఠాపురం చరిత్రలోనే ఇది ఒక సువర్ణాధ్యాయంగా నిలవబోతోంది..!