భూమి పొత్తిళ్లలో ఇంకా ఎంత బంగారం మిగిలుంది? ఇప్పటివరకు మనం ఎంత తవ్వి తీశామో తెలుసా?

Global Gold Reserves: భూమిపై బంగారం ఎక్కడి నుండి వచ్చింది? భూమి నుండి ఇప్పటివరకు ఎంత బంగారం వెలికితీశారు? దానిని ఎక్కువగా దేనికి ఉపయోగించారు? భూగర్భంలో ఇంకా ఎంత బంగారం దాగి ఉంది? వరల్డ్ గోల్డ్ కౌన్సిల్ (WGC) నివేదిక ఆధారంగా.. దీపావళి, ధంతేరస్ పండుగల సమయంలో ప్రతిఒక్కరూ ఆత్రుతగా కొనుగోలు చేసే బంగారం వెనుక ఉన్న ఈ ఆసక్తికరమైన గణాంకాలను అన్వేషిద్దాం.  

ప్రతి సంవత్సరం ధంతేరస్, దీపావళి వంటి పండుగల సమయంలో బంగారం, వెండికి డిమాండ్ గణనీయంగా పెరుగుతుంది. ఈ రోజుల్లో బంగారం కొనడం శుభప్రదంగా భావిస్తారు. పెట్టుబడిగా చూసినా, ఆభరణంగా చూసినా, బంగారంపై ఉన్న మోజు ప్రత్యేకమైనది. కానీ భూమి ఏర్పడినప్పటి నుండి ఎంత బంగారం వెలికితీశారు? వెలికితీసిన బంగారంలో ఎక్కువ భాగాన్ని దేనికి ఉపయోగించారో మీరు ఎప్పుడైనా ఆలోచించారా? భూమి కింద ఇంకా ఎంత బంగారం మిగిలి ఉందో మీకు తెలుసా? ఈ ఆసక్తికరమైన ప్రశ్నలన్నింటికీ సమాధానాలు వరల్డ్ గోల్డ్ కౌన్సిల్ తాజా నివేదికలలో వెల్లడయ్యాయి.

ఇప్పటివరకు ఎంత బంగారం వెలికితీశారు? వరల్డ్ గోల్డ్ కౌన్సిల్ ప్రకారం.. మానవ చరిత్రలో భూమి లోతుల నుండి సుమారుగా 222,600 టన్నుల బంగారం వెలికితీశారు. భూమిపై ఉన్న మొత్తం బంగారు నిల్వలు సుమారుగా 224,200 టన్నులుగా అంచనా అంచా. అయితే.. ఇప్పటివరకు వెలికితీసిన బంగారంలో మూడింట రెండు వంతులు (సుమారు 66 శాతం) 1950 తర్వాతే వెలికితీశారు. ప్రపంచంలో వెలికితీసిన బంగారాన్నంతటినీ కరిగించి ఒకచోట చేర్చితే.. అది కేవలం 74 క్యూబిక్ అడుగుల పరిమాణం గల ఒక చిన్న ఘనం అవుతుందని నిపుణులు చెబుతున్నారు.

దీనిని ఎక్కువగా దేనికి ఉపయోగిస్తారు?

మనం భూమి నుండి వెలికితీసిన 220,000 టన్నుల బంగారంలో, అధిక భాగం ఆభరణాల తయారీలో ఉపయోగించింది.

ఆభరణాలు (44శాతం): భూమిపై ఉన్న మొత్తం బంగారు నిల్వల్లో 98,700 టన్నులు ఆభరణాలు,అలంకరణ వస్తువుల తయారీలో ఉపయోగించారు.  ఇది మొత్తం నిల్వల్లో సుమారు 44 శాతానికి సమానం.

పెట్టుబడులు, బులియన్ (23%): సుమారుగా 52,400 టన్నుల (23%) బంగారాన్ని బంగారు కడ్డీలు, ఇంగోట్‌లు, నాణేలు, గోల్డ్ ఈటీఎఫ్‌ల తయారీకి ఉపయోగిస్తారు.

కేంద్ర బ్యాంకులు (18%): ప్రపంచవ్యాప్తంగా ఉన్న కేంద్ర బ్యాంకులు మూడవ అతిపెద్ద బంగారు నిల్వదారులు. అవి తమ ఆర్థిక భద్రత కోసం సుమారుగా 39,300 టన్నుల (18%) బంగారాన్ని నిల్వలుగా ఉంచుకుంటాయి.

ఇతర అవసరాలు (15%): మిగిలిన 33,800 టన్నుల (15%) బంగారాన్ని ఇతర పెట్టుబడి, పారిశ్రామిక, సాంకేతిక రంగాలలో ఉపయోగిస్తారు.

ఇంకా ఎంత మిగిలి ఉంది?

మానవులు ఇప్పటికే గణనీయమైన మొత్తంలో బంగారాన్ని వెలికితీసినప్పటికీ, భూగర్భంలోనే ఇంకా గణనీయమైన మొత్తంలో బంగారం ఉందని మైనింగ్ నిపుణులు భావిస్తున్నారు. అందుబాటులో ఉన్న సమాచారం ప్రకారం, ఆర్థికంగా వెలికితీయడానికి వీలయ్యే 61,000 టన్నుల బంగారు నిల్వలు ఇంకా ఉన్నాయి. అదనంగా, 114,400 టన్నుల బంగారు నిల్వలు ఉన్నాయని అంచనా వేసినప్పటికీ, వాటిని వెలికితీయడానికి అయ్యే ఖర్చు బంగారం  అసలు విలువను మించిపోవచ్చనే కారణంతో వాటిని వదిలివేస్తున్నారు. బంగారం భూమిలో భాగం కాదా?

శాస్త్రవేత్తల ప్రకారం, బంగారం భూమి కంటే పురాతనమైనది. అంటే.. బంగారం నిజానికి భూమిపై ఏర్పడిన లోహం కాదు. శాస్త్రవేత్తల అంచనా ప్రకారం, బిగ్ బ్యాంగ్ వంటి విశ్వ సంఘటనలలో, అంతరిక్షంలో న్యూట్రాన్ నక్షత్రాలు ఢీకొనడం వల్ల భారీ పేలుళ్లు సంభవించాయి. ఆ పేలుళ్ల ఫలితంగా ఉల్కలు లేదా బంగారు శకలాలు భూమిపై పడి, నెమ్మదిగా భూమి ఉపరితలం క్రిందకు మునిగిపోయాయి. భూమి చల్లబడిన తర్వాత, మానవులు పరిణామం చెందుతున్న కొద్దీ, వారు బంగారాన్ని, దాని విలువను గుర్తించి, దానిని తవ్వడం ప్రారంభించారు.

Also Read: 

శతాయుష్కుడిగా అడుగుపెడుతున్న భారతరత్న.. ఎల్‌.కె. అద్వానీ రాజకీయ ప్రస్థానంపై ప్రత్యేక కథనం..!!